نێچیرڤان بارزانی:رێزێ ل وان دگرین یێن د به‌رهنگاریا تیرۆرێ دا ل كوردستانێ گیانێ خوه به‌خشی
ئه‌ڤرۆ:
سه‌رۆكێ هه‌رێما كوردستانێ ب هه‌لكه‌فتا رۆژا جیهانی یا (رێزگرتنێ ل قوربانیێن تیرۆرێ) راگه‌هاند، رێزێ ل وان دگرین و بیرئانینا وان دكه‌ین یێن ل روو ب رووبوونا تیرۆرێ ل كوردستانێ و جیهانێ گیانێ خوه به‌خشی.
نێچیرڤان بارزانی، سه‌رۆكێ هه‌رێما كوردستانێ تویته‌ك ب هه‌لكه‌فتا رۆژا جیهانی یا ریچزگرتنێ ل قوربانیێن تیرۆرێ به‌لاڤكر و تێدا دبێژیت” ل ڤێ رۆژێ ئه‌م رێزێ ل وان دگرین و بیرئینانا وان دكه‌ین كو ژیانا خوه ژ پێخه‌مه‌ت روو ب رووبوونا تیرۆرێ ل كوردستانێ و جیهانێ به‌خشی”.
سه‌رۆكێ هه‌رێما كوردستانێ گوت ژی” پێدڤیه ل ئیراقێ د ئێكگرتی بین بۆ هاریكاریا قوربانیێن تیرۆرێ تاكو ژیانا وان ئاڤا بكه‌ین و به‌رهنگاریا په‌یدابوونا تیرۆرێ بكه‌ن”.
رۆژا 21 ئاب سالانه ژ ئالیێ نه‌ته‌وێن ئێكگرتی ڤه وه‌كو (رۆژا جیهانی یا رێزگرتنێ ل قوربانیێن تیرۆرێ) هاتیه دیاركرن، ده‌ستنیشانكرنا وێ رۆژێ ب مه‌ره‌ما پشته‌ڤانیكرنا قوربانیێن تیرۆرێ ورزگاربوویێن روودانێن تیرۆرستیه.
ب گۆره‌ی UN سالانه ب هزاران كه‌سێن بێ تاوان ژ ئه‌گه‌رێ كریارێن تیرۆرستی ل جیهانێ زیان دگه‌هیتێ یان ژی دهێنه كوشتن.
