ئالیێن سیاسی چاڤه‌رێی په‌رله‌مانێ كوردستانێ نه
ئه‌ڤرۆ:
هه‌موو ئالیێن سیاسی یێن هه‌رێما كوردستانێ ل سه‌ر وێ چه‌ندێ د هه‌ڤرانه كو قانوونا هه‌لبژارتنێن په‌رله‌مانی بهێته راستڤه‌كرن و نوكه چاڤه‌رێی ب دووماهی هاتنا بێهنڤه‌دانا په‌رله‌مانێ كوردستانێ نه.
دلشاد شه‌هاب، شیره‌تكارێ سه‌رۆكێ هه‌رێما كوردستانێ، دووپاتكر كو راستڤه‌كرنا قانوونا هه‌لبژارتنان و كۆمسیۆنا بلند یا سه‌ربخوه یا هه‌لبژارتن و راپرسیان ل هه‌رێما كوردستانێ، گرێدای هه‌ڤدوونه.
دلشادی گوت ژی” نوكه هه‌موو ئالیێن سیاسی ل سه‌ر راستڤه‌كرنا قانوونا هه‌لبژارتنان د هه‌ڤرانه، ئه‌و گرنگترین خاله، تنێ هوورده‌كاریێن دناڤ قانوونێدا یێن ماین ئه‌وژی دناڤ هۆلا په‌رله‌مانیدا دێ هێته ئێكلاكرن”.
كۆمسیۆنا بلند یا سه‌ربخوه یا هه‌لبژارتن و راپرسیان ل هه‌رێما كوردستانێ، قانوونا هه‌لبژارتنان و ب تایبه‌ت ئه‌و ماده و برگێن په‌یوه‌ندی ب بازنێن هه‌لبژارتنان و كورسیێن كۆتا ڤه هه‌ی، خالێن ناكۆكیێ نه د ناڤبه‌را ئالیێن سیاسی.
ب گۆره‌ی قانوونا (هه‌لبژارتنێن په‌رله‌مانێ كوردستانێ – ئیراق) هه‌لبژارتن ب ده‌نگدانا نهێنی یا راسته‌وخوه و ل دووڤ سیسته‌مێ لیستا ڤه‌كری یا سنوردار و ب شێوێ تاكبازنه‌یی دهێنه ئه‌نجامدان.
ل رۆژا ئێك ئاب، سه‌رۆك مه‌سعود بارزانی پێشوازی ل (جێنین هێنس پلاسخارت) هنارتیا تایبه‌ت یا سكرتێرێ گشتیێ نه‌ته‌وێن ئێكگرتی بۆ كاروبارێن ئیراقێ كربوو، وه‌كو دلشاد شه‌هاب دبێژیت” سه‌رۆك بارزانی د وێ كۆمبوونێ دا ده‌ستپێشخه‌ریك بۆ ئه‌نجامدانا هه‌لبژارتنێن په‌رله‌مانێ كوردستانێ راگه‌هاندبوو و ب جێنین پلاسخارتێ گوتبوو پێدڤیه به‌ربه‌ستێن ل به‌رده‌م هه‌لبژارتنان نه‌مینن و هه‌لبژارتن د زووترین ده‌مدا بهێنه ئه‌نجامدان و مافێن پێكهاته‌یێن نه‌ته‌وی و ئایینی ژی د پاراستی بن. بۆ وێ مه‌به‌ستێ ژی پارتی یا به‌رهه‌ڤه ل هه‌رده‌مه‌كی هه‌لبژارتن بهێنه ئه‌نجامدان”.
پارتی دیموكراتی كوردستان پێشنیازه‌كێ بۆ برێڤه‌چوونا هه‌لبژارتنێن په‌رله‌مانێ كوردستانێ ب شێوازێ (رێژه‌یا تێكهه‌ل) پێشكێش دكه‌ت. ب گۆره‌ی وێ پێشنیازێ 50 كورسیێن په‌رله‌مانی ب لیستا گرتی و ئیچك بازنه‌یی بهێنه هه‌لبژارتن و 50 كورسیێن دی ژی ب شێوه‌ێ لیستا ڤه‌كری و فره‌بازنه‌یی بیت.
هاوار محه‌مه‌د، به‌پرسێ پشكا قانوونی ل ده‌زگه‌هێ هه‌لبژارتن یێ پارتی ل رۆژا 11 ئاب راگه‌هاندبوو، پێشنیازا پارتی چاره‌سه‌ریه‌كا گونجایه بۆ هه‌ردو خواستێن سیسته‌مێ هه‌لبژارتنێن فره‌بازنه‌یی و تاكبازنه‌یی، ناڤه‌رۆكا پێشنیازێ ب دو شێوازان بوو، یا ئێكێ 50 كورسی كود بیته 50% ژ كورسیێن په‌رله‌مانی ب شێوازێ ئێك بازنه‌ییا نیشتمانی بیت، شێوازێ دوویێ فره‌بازنه‌یی بیت ل سه‌ر ئاستێ پارێزگه‌هان بهێته دابه‌شكرن كو 50% كورسیان بخوه‌ڤه دگریت”.
دیاركربوو ژی” دبیت شرۆڤێن جودا جودا بۆ وێ پێشنیازا پارتی بهێته كرن، دهێته گوتن ئه‌و سیسته‌مه پێشتر نه‌هاتیه بكارئینان، به‌لێ ئه‌ڤه سیسته‌مێ رێژه‌یا تێكهه‌له كو ب (M.M.P) یێ ناڤداره و ل گه‌له‌ك وه‌لاتان هاتیه په‌یره‌وكرن”.
سه‌باره‌ت مافێ پێكهاته‌یان گوت” به‌رده‌وام بۆچوونا پارتی ئه‌و دڤێت پێكهاته ب خوه بریارێ بده‌ن، داخوازا وان نوكه ئه‌وه كو هه‌لبژارتن تاكبازنه‌ییا نیشتمانی بیت و ل هه‌موو جهه‌كی بشێن ده‌نگ ب به‌ربژارێن خوه بده‌ن، هه‌روه‌سا ب شێوازێ لیستا گرتی بیت، بۆ وێ چه‌ندێ خه‌لكێ دیار و شایسته بهێنه هنارتن بۆ په‌رله‌مانی، ئه‌ڤه ژی داخوازا پتریا لایه‌نایه.
