34 سالیا هه‌وێن ئه‌نفالێ ل به‌هدینان ل دهۆكێ هاته ساخكرن
ئه‌ڤرۆ:
ئه‌ڤرۆ ئێڤاریا رۆژا پێنچشه‌مبی ٢٥ی ته‌باخا ٢٠٢٢ێ ب چاڤدێری و به‌رهه‌ڤبوونا د. عه‌لی ته‌ته‌ر، پارێزگارێ دهۆكێ، ل رۆژا 25/8/2022 34 سالیا هه‌وێن ئه‌نفالێ ل ده‌ڤه‌را به‌هدینان ب به‌رهه‌ڤبوونا ئه‌ندامێن جڤاتا نوونه‌رێن ئیراقێ و ئه‌ندامێن په‌رله‌مانێ كوردستانێ و سه‌رۆكێ جڤاتا پارێزگه‌ها دهۆكێ و بریكارێ وه‌زاره‌تا كاروبارێن شه‌هید و ئه‌نفالكریان و هه‌ژماره‌كا زۆرا كه‌سوكارێن ئه‌نفالكریان و حزب و لایه‌نێن سیاسی هاته بیرئینان.
رێوره‌سمێن بیرئینانا هه‌وێن ئه‌نفالێ ل ده‌ڤه‌را به‌هدینان ب دانانا تاجه گۆلێن رێز و وه‌فایێ و ڤه‌كرنا پێشانگه‌ها ئه‌نفالان ده‌ست پێكر.
پارێزگارێ دهۆكێ د په‌یڤه‌كێ دا باس ل هه‌وێن ئه‌نفالێ و هشیاریا نه‌ته‌وه‌یی و نیشتمانی و دیكومێنتكرنا ئه‌نفالان و خزمه‌تكرنا كه‌سوكارێن ئه‌نفالكریان كر.
دیسا د مه‌راسیمان دا فلمه‌كێ دیكۆمێنتاری ژ به‌رهه‌مئینانا وار تیڤی ل دۆر ئه‌نفالان هاتاه نیشادان.
هه‌ر د رێوره‌سمان دا په‌یڤا كه‌سوكارێن ئه‌نفالكریان ژ لایێ خانم ”كه‌سه‌ر ئه‌مین” هاته خواندن و چه‌ندین داخوازی ژ حكومه‌تا هه‌رێما كوردستانێ كرن و ژ لایێ پارێزگارێ دهۆكێ ڤه هاتنه وه‌رگرتن.
دیسا هه‌ر د هه‌مان رۆژ دا و ل ئاڤاهیێ دادگه‌ها دهۆكێ و ب به‌رهه‌ڤبوونا فه‌رسه‌ت ئه‌حمه‌د، وه‌زیرێ داد یێ حكومه‌تا هه‌رێما كوردستانێ و د. عه‌لی ته‌ته‌ر، پارێزگارێ دهۆكێ و فه‌هیم عه‌بدوللا، سه‌رۆكێ جڤاتا پارێزگه‌هێ و بریكارێ وه‌زاره‌تا داد و سه‌رۆكێن دادگه‌ها شورایێ و دادگه‌ها دهۆكێ و چه‌ند رێڤه‌به‌رێن په‌یوه‌ندیدار دادگه‌ها كارگێری ل پارێزگه‌ها دهۆكێ هاتنه ڤه‌كرن.
