پارێزگارێ دهۆكێ و قونسلێ بریتانیا ره‌وشا پارێزگه‌هێ و ئاواره و په‌نابه‌ران گه‌نگه‌شه كر
ئه‌ڤرۆ:
د. عه‌لی ته‌ته‌ر، پارێزگارێ دهۆكێ دوهی 29/8/2022 ل كوچكا مێهڤانداریان پێشوازی ل دایڤید هوند قونسلێ گشتی یێ وه‌لاتێ بریتانیا ل هه‌رێما كوردستانێ و شاندێ د گه‌ل دا كر و د هه‌ڤدیتنه‌كێ دا به‌حسێ په‌یوه‌ندیێن دو قولی د ناڤبه‌را هه‌رێما كوردستانێ و ده‌وله‌تا بریتانیا دا و ره‌وشا پارێزگه‌هێ ژ روویێ ئێمناهی و ئاڤه‌دانیێ و ره‌وشا ئاواره و په‌نابه‌ران و كارتێكرنا دیاردا هشكه‌سالیێ ل سه‌ر ده‌ڤه‌رێ ب گشتی هاته كرن.
پارێزگارێ دهۆكێ چه‌ندین رۆهنكرن دانه سه‌ر ره‌وشا ئاواره و په‌نابه‌ران و ئه‌و گڤاشتنا وان ئێخستیه سه‌ر هه‌موو بیاڤێن خزمه‌تگوزاری ل پارێزگه‌ها دهۆكێ و داخواز ژ بریتانیا و جڤاكێ نێڤده‌وله‌تی كر كو گڤاشتنان بێخنه سه‌ر حكومه‌تا ئیراقێ، كو رێككه‌فتنا شنگالێ بهێته بجهئینان و ئارامیا شنگالێ بهێته به‌رقراركرن و خزمه‌تگوزاری بهێنه دابینكرن و هێزێن چه‌كدار بهێنه دووركرن و ئیدارا شه‌رعی ڤه‌گه‌ڕیت، داكو ببیته ئه‌گه‌ر ئاواره ب حه‌زا خوه ڤه‌گه‌ڕنه سه‌ر جه و وارێن خوه”.
قونسلێ بریتانیا ژی خوشحالیا خوه ل هه‌مبه‌ر ئه‌و هاریكاریێن حكومه‌تا هه‌رێمێ و پارێزگه‌ها دهۆكێ پێشكێشی ئاواره و په‌نابه‌ران دكه‌ن ده‌ربڕی و دیار كر، ئه‌و دێ بۆچوونێن پارێزگارێ دهۆكێ ل دۆر هه‌موو بابه‌تێن هه‌ڤدیتنێ گه‌هینیته لایه‌نێن په‌یوه‌ندیدار، داكو یا پێدڤی بهێته ئه‌نجامدان.
