په‌رله‌مان چاڤه‌رێی كۆمبوونا لایه‌نێن سیاسی یه ل دۆر هه‌لبژارتنان
ئه‌ڤرۆ:
ئه‌ندامه‌كا لژنا قانوونی ل په‌رله‌مانێ كوردستانێ دیار كر، هه‌تا لایه‌نێن سیاسی نه‌گه‌هنه ئه‌نجامه‌كی، په‌رله‌مان ل دۆر بابه‌تێ هه‌لبژارتنان و درێژكرنا ژییێ په‌رله‌مانی چو كۆمبوونان ئه‌نجام ناده‌ت.
خه‌دیجه عومه‌ر، زێده‌تر بۆ ئاژانسا خانی گۆت: “بڕیاره ڤێ هه‌یڤێ جاره‌كا دی لایه‌نێن سیاسی ل سه‌رۆكاتیا هه‌رێما كوردستانێ كۆمببن و تێدا دووماهی بڕیار ل سه‌ر دیاركرنا ژڤانێ هه‌لبژارتنێن هه‌رێمێ و درێژكرنا ژییێ په‌رله‌مانی بده‌ن، به‌لێ دیار نینه هه‌تا نوكه دێ كه‌نگی كۆمبوون هێته كرن و بڕیارێن كۆمبوونێ و لایه‌نێن سیاسی دێ د چاوا بن”.
خه‌دیجه عومه‌ر ئاشكرا ژی كر، په‌یڕه‌وێ ناڤخوه یێ په‌رله‌مانی و دستوور و قانوونێ خۆلا په‌رله‌مانی بۆ ده‌مێ چار سالان دیار كرییه، ئه‌وا بوویه ئاسته‌نگ لایه‌نێن سیاسی به‌رهه‌ڤ نینن د ده‌مێ دیار كری دا هه‌لبژارتن بهێنه ئه‌نجامدان، له‌وما دێ په‌رله‌مان چاڤه‌ڕێی لایه‌نێن سیاسی كه‌ت، ل دۆر بابه‌تێ هه‌لبژارتنان و درێژكرنا ژییێ په‌رله‌مانی.
