ئه‌ڤرۆ ده‌ست ب سالا نوو یا خواندنێ دێ هێته كرن
هه‌ولێر، قائید میرۆ:
بڕیاره ئه‌ڤرۆ ل سه‌رانسه‌ری هه‌رێما كوردستانێ ئێكه‌م رۆژا سالا نوو یا خواندنێ بهێته ده‌ستپێكرن و به‌رپرسه‌كێ وه‌زاره‌تا په‌روه‌ردێ ژی دبێژیت: به‌رهه‌ڤیێن باش بۆ ده‌ستپێكرنا سالا نوو یا خواندنێ 2022 – 2023 هاتینه كرن و پلانا په‌روه‌ردێ وه‌ك خوه دێ هێته بجهئینان.
سه‌یوان عه‌لی، بریكارێ وه‌زاره‌تا په‌روه‌ردێ بۆ رۆژناما ئه‌ڤرۆ دیار كر، ده‌ستپێكا هه‌یڤا ئیلۆنێ مامۆستا ده‌ست ب كاربووینه و گۆت: “ئه‌ڤرۆ رۆژاسێشه‌مبی 13/9/2022 ئێكه‌م رۆژا سالا نوو یا خواندنێ دێ هێته ده‌ستپێكرن، وه‌زاره‌تا په‌روه‌ردێ به‌ری نوكه پلان بۆ سالا نوو یا خواندنێ دیاركریه و وه‌كو خوه دێ هێته بجهئینان، پرتووك هاتینه چاپكرن و هه‌موو به‌رهه‌ڤی بۆ ده‌ستپێكا سالا خواندنێ هاتینه كرن”.
سه‌یوان عه‌لی گۆتژی: “بۆ سالا نوو یا خواندنێ ملیۆن و 750 هزار قوتابی ل قووناغێن جودا یێن خواندنێ و 150 هزار مامۆستایێن هه‌میشه‌یی و گرێبه‌ست دێ به‌ر ب ناڤه‌ندێن خواندنێ چن، به‌رهه‌ڤیێن ته‌مام هاتینه كرن، ئه‌ڤ ساله بێ ئاریشه ده‌ست ب پرۆسا په‌روه‌ردێ دێ هێته كرن، چونكی به‌روه‌خت وه‌زاره‌تێ پلانا په‌روه‌ردێ دانایه و ل گوره‌ی پلانێ ژی دێ ساله‌كا سه‌ركه‌فتی بیت بۆ كه‌رتێ په‌روه‌ردێ”.
