وه‌زاره‌تا خواندنا بلند: نابیت قوتابی فۆرما زانكۆلاین ل سه‌نته‌رێن بازرگانی تژی بكه‌ن
هه‌ولێر، قائید میرۆ:
په‌یڤدارێ وه‌زاره‌تا خواندنا بلند داخواز دكه‌ت قوتابی فۆرما زانكۆلاین تژی بكه‌ن و دبێژیت: نابیت قوتابی ب رێیا سه‌نته‌رێن بازرگانی فۆرما زانكۆلاین تژی بكه‌ن ژ به‌ر شاشیێن دهێنه كرن و سالا بۆری ژی ئاریشه بۆ چه‌ندین ده‌رچوویێن 12ی ئاماده‌یی په‌یداببوون.
عه‌باس ئه‌كره‌م، په‌یڤدارێ وه‌زاره‌تا خواندنا بلند و ڤه‌كۆلینێن زانستی بۆ رۆژناما ئه‌ڤرۆ دیار كر، پشتی وه‌زاره‌تا خواندنا بلند و ڤه‌كۆلینێن زانستی په‌یڤا ده‌ربازبوونێ بۆ هه‌موو قوتابیێن ده‌رچوویی یێن پۆلا 12ی ئاماده‌یی پێشكێشی وه‌زاره‌تا په‌روه‌ردێ كرینه و گۆت: “د ده‌مێ نوكه دا هه‌موو قوتابیه‌ك دشێت سه‌ره‌دانا قوتابخانا خوه بكه‌ت بۆ وه‌رگرتنا په‌یڤا ده‌ربازبوونێ، به‌لێ پێدڤیه وه‌ك نهێنی ژ لایێ قوتابی ڤه بهێته پاراستن، هه‌تا قوتابی بشێت بچیته د ناڤا زانكۆلاین دا بۆ تژیكرنا فۆرما وه‌رگرتنێ ل زانكۆ و په‌یمانگه‌هان”.
عه‌باس ئه‌كره‌م گۆتژی: “د ده‌مه‌كێ نێزیك دا سیسته‌مێ زانكۆلاین دێ كه‌ڤیته كاری و داخوازێ ژ قوتابیان دكه‌ین بۆ تژیكرنا فۆرما زانكۆلاین ب تنێ شیانێن خوه بكار بینن، ب شێوه‌یه‌كی نمره‌یێن وان ل گه‌ل ئه‌و پشكێن دهێنه تژیكرن بگونجن، تژیكرنا فۆرما زانكۆلاین ب رێیا سه‌نته‌رێن بازرگانی دێ بیته ئه‌گه‌رێ په‌یدابوونا ئاریشه‌یان و سالا بۆری ناڤێ هه‌ژماره‌كا قوتابیان ڤه‌نه‌گه‌ڕیابوو هه‌ژماره‌كا دی ژی ئه‌ڤێ پشكا قوتابی داخوازكری ڤه‌نه‌گه‌ڕیابوو، له‌وڕا باشترین رێك ئه‌وه قوتابی ب خوه فۆرمێ بۆ خوه تژی بكه‌ت”.
