مه‌زنترین پاركا شوونواری ل پارێزگه‌ها دهۆكێ هاته ڤه‌كرن
دهۆك، نه‌وزاد هلۆری:
ب مه‌ره‌ما زێده‌تر خزمه‌تكرنا كه‌رتێ گه‌شتوگوزاری، دوهی ل هولا رێڤه‌به‌ریا گشتی یا باژێرڤانیان ل پارێزگه‌ها دهۆكێ و ب ئاماده‌بوونا وه‌زیرێ باژێرڤانیان و گه‌شتوگوزار و پارێزگارێ دهۆكێ و بالیۆزێ ئیتالیا ل ئیراقێ و چه‌ند به‌رپرسێن حزبی و ئیداری د رێوره‌سمه‌كی دا پاركا فه‌یدیێ یا شوونواری هاته ڤه‌كرن.
د. عه‌لی ته‌ته‌ر، پارێزگارێ دهۆكێ د په‌یڤه‌كێ دا ل ده‌ستپێكا رێورسمێن ڤه‌كرنا پاركا شوونواری سوپاسیا هه‌ر ئالیه‌كی كر، كو هه‌ڤكاربووین بۆ ئاشكراكرن و كارێ ڤه‌كۆلینێ و گۆت: (جهێ داخێ یه مه نه‌شیایه وه‌كو پێدڤی شوونوارێن پارێزگه‌ها دهۆكێ و باژێرێ دهۆكێ بده‌ینه نیاسین، هه‌ر چه‌نده دهۆك ئێك ژ باژێرێن كه‌ڤن یێن جیهانێیه و گه‌له‌ك شوونوارێن كه‌ڤن لێ هه‌نه، ئه‌ڤرۆ ب سوپاسیڤه وه‌لاتێن ئیتالیا و ئه‌لمانیا و فره‌نسا هاریكاریا مه دكه‌ن بۆ دیتنا شوونواران و ئه‌ڤ شوونواره دیار دكه‌ن، كو ژ كه‌ڤن دا پێكڤه‌ژیانا ئولی و نه‌ته‌وه‌یی ل ڤێ ده‌ڤه‌رێ هه‌بوویه و نوكه ژی یا به‌رده‌وامه، ئه‌م دخوازین هه‌موو لایه‌ن گرنگیێ ب پاراستنا شوونواران بده‌ن).
ساسان عه‌ونی، وه‌زیرێ باژێرڤانی و گه‌شتوگوزارێ ل حوكمه‌تا هه‌رێما كوردستانێ دیار كر كو حوكمه‌تا هه‌رێما كوردستانێ به‌رنامه و پلانه‌ك دانایه كو زێده‌تر گرنگی ب پاراستنا شوونواران بهێته دان و گۆت: (نوكه 18 تیمێن شوونواران ل كوردستانێ كار دكه‌ن و هه‌شت ژ وان ل پارێزگه‌ها دهۆكێ نه، ئه‌م ب ئومێدین، كو پڕۆژێن وان ل سالا 2026 ب ته‌مامی بكه‌ڤنه د خزمه‌تا شوونوار و گه‌شتیاران دا، ئه‌م وه‌كو وه‌زاره‌ت یا د شان دا بیت دێ كه‌ین بۆ هه‌ر جۆره هاریكاریه‌كێ، سوپاسیا ئیتالیا ژی دكه‌ین، كو د ده‌ما چه‌ند سالێن بۆری دا شیایه خزمه‌ته‌كا باش بۆ ڤه‌دیتن و ئاشكراكرن و كارێ ڤه‌كۆلینان ل جهێن شوونواری بكه‌ت).
پاركا فه‌یدیێ یا شوونواری دكه‌ڤیته بنارا چیایێ ده‌كا و ژ دیتنا جوكه‌كا ئاڤدانێ ب درێژاهیا 10كم و ب فره‌هیا چار مه‌تران و چه‌ندین نه‌خشێن نكراندی د به‌ریدا پێك دهێت، كو مێژوویا وان بۆ سه‌رده‌مێ ئیمبراتۆریه‌تا ئاشووریان ڤه‌دگه‌ڕیت، ئه‌ڤ شوونواره ژ لایێ تیمه‌كێ ئیتالی و ب هه‌ڤكاری ل گه‌ل رێڤه‌به‌ریا شوونواران ل دهۆكێ دهێته ب رێڤه‌برن، قووناغا ئێكێ ژ وی پڕۆژه‌ی هاته ڤه‌كرن و كه‌فته د خزمه‌تا گه‌شتیار و وه‌لاتیان دا.
