دو بریندارێن دی یێن په‌قینا دهۆكێ گیانێ خوه ژ ده‌ست دا
ئه‌ڤرۆ، نه‌وزاد هلۆری:
پشتی هه‌ڤڕكیێن زۆر ل گه‌ل برینێن خوه، شه‌ڤا بۆری دو ژ بریندارێن دی یێن په‌قینا غازێ د رۆژێن بۆری دا ل دهۆكێ گیانێ خوه ژ ده‌ست دا.
حه‌جی ده‌رار، مامێ ئێك ژ وان قوربانیان بۆ ئه‌ڤرۆ گۆت: (ئێك ژ وان قوربانیێن روودانا په‌قینا غازێ ل دهۆكێ، برازایێ من بوو، بناڤێ “نێچیرڤان عه‌بدولعه‌زیز” كو كرێكارێ كۆمپانیا غازێ بوو، دیسا قوتابیێ زانكۆیێ ژی بوو، پشتی پێنج رۆژان ژ روودانێ، ل شه‌ڤا بۆری برازایێ من ژی ل وه‌لاتێ توركیا گیانێ خوه ژ ده‌ست دا و ل گورستانا شاخكێ هاته ڤه‌شارتن).
زێده‌تر گۆت: (نێچیرڤان د ژیێ 25 سالیێ دابوو، ل گه‌ل هه‌ڤالێن خوه ل پێش یاریێن موندیالێ بوو، تێله‌فۆنه‌ك بۆ هات، كو غاز یا ژ به‌ر سیسته‌ێ غازێ ل ئاڤاهیێ په‌قین تێدا روودای دچیت، له‌وا ئه‌و ژی ب مه‌ره‌ما چاره‌سه‌ركرنێ دچیت، هه‌ر ل ده‌مێ گه‌هشتی ئه‌و هه‌موو وان كه‌سان ل جهێ روودانێ ده‌ردئێخیته ده‌رڤه، داكو گیانێ وان یێ ب سلامه‌ت بیت، ئه‌وی هه‌موو رزگاركرن، به‌لێ ئه‌و بوویه قوربانی).
هه‌ر ل شه‌ڤا بۆری برینداره‌كێ دی بناڤێ (محه‌مه‌د مه‌حمود) كو گه‌نجه‌كێ 15 سالی بوو، ئه‌و ژی پشتی پێنج رۆژان ل نه‌خۆشخانا ته‌نگاڤیان ژ به‌ر دژواریا برینێن وی گیانێ خوه ژ ده‌ست دا و ل گورستانا شاخكێ هاته ڤه‌شارتن، د نوكه دا ب تنێ دو بریندار ل نه‌خۆشخانێ ماینه و چاره‌سه‌ریا وان دهێته كرن.
