سه‌رۆك بارزانی: هیڤیدارم سالا نوو سالا خوه‌شیێ و به‌خته‌وه‌ریێ بیت بۆ هه‌موو وه‌لاتیێن كوردستانێ و ئیراقێ
ب هه‌لكه‌فتا سه‌رێ سالا نوو یا زایینی، سه‌رۆك مه‌سعود بارزانی دووپاتیێ ل په‌یاما ئاشتیخوازنه و فه‌رهه‌نگا پێكڤه‌ژیانا گه‌لێ كوردستانێ دكه‌ت و دبێژیت، گه‌لێ كوردستانێ خوازیارێ وێ چه‌ندێ یه كێشه و گرفت ب ڕێیا دانوستاندنێ و ب زمانێ تێكگه‌هشتنێ و دووركه‌فتنێ ژ ده‌مارگێریێ بهێنه چاره‌سه‌ركرن.
سه‌رۆك مه‌سعود بارزانی د په‌یاما خوه‌دا سه‌ره‌رای پیرۆزباهیا سه‌رێ سالا نوو ل وه‌لاتیێن هه‌رێما كوردستانێ و مالباتێن سه‌ربلندێن شه‌هیدان و پێشمه‌رگێن قه‌هره‌مان، گوت” گه‌لێ كوردستانێ هه‌رده‌م باوه‌ری ب ئاشتیێ و برایه‌تیێ هه‌بوویه”.
سه‌باره‌ت ڕه‌وشا سیاسی یا ئیراقێ ژی، سه‌رۆك بارزانی د په‌یاما خوه‌دا ڕاگه‌هاند” ده‌لیڤه‌یه‌كا نوو بۆ چاره‌سه‌ركرنا كێشه‌یان د ناڤبه‌را هه‌رێما كوردستانێ و حوكمه‌تا فیدرالی یا ئیراقێ یا هه‌یو ب هه‌موو شیانان پشته‌ڤانیا بجهئینانا وان ڕێككه‌فتنان دكه‌ین كو د ناڤبه‌را ئالیێن سیاسی یێن ئیراقی و هه‌روه‌سا د ناڤبه‌را حوكمه‌تا هه‌رێمێ و حوكمه‌تا فیدرالی یا ئیراقی دا هاتینه كرن”.
سه‌رۆك بارزانی دیاركر ژی كو” ئه‌و چاڤه‌ڕێیه یا هه‌ی كو د قۆناغا داهاتی دا گاڤێن حوكمه‌تێ و پرۆسه‌یا سیاسی یا ئیراقێ د چارچۆڤه‌یێ دستووری و ب ئاراسته‌یا به‌رژه‌وه‌ندیێن گه‌لێن ئیراقێ و هه‌روه‌سا ل به‌رچاڤ وه‌رگرتنا پرنسیبێن هه‌ڤپشكی و هه‌ڤسه‌نگی و سازانێ دا بیت”.
د دووماهیا په‌یاما خوه‌دا، سه‌رۆك بارزانی هیڤیداره سالا نوو” سالا خوه‌شیێ و به‌خته‌وه‌ریێ بیت بۆ هه‌موو وه‌لاتیێن كوردستانێ و ئیراقێ و ئاشتی و ته‌باییێ بۆ ده‌ڤه‌را مه و هه‌موو مرۆڤایه‌تیێ په‌یدا ببیت”.
