په‌رله‌مانتاره‌ك: هه‌تا قانوونا په‌ترۆل و غازێ نه‌هێته ده‌ركرن هه‌رێم په‌ترۆلێ ڕاده‌ستی به‌غدا ناكه‌ت
هه‌ولێر، قائید میرۆ
په‌رله‌مانتاره‌كێ فڕاكسیۆنا پارتی ل جڤاتا نوونه‌رێن ئیراقێ ئاشكراكر، هه‌تا پڕۆژه‌یێ قانوونا په‌ترۆل و غازێ نه‌هێته ده‌ركرن دێ هه‌رێما كوردستانێ یا به‌رده‌وامبیت ل سه‌ر بڕێڤه‌برنا كه‌رتێ په‌ترۆلێ و دبێژیت، ڕێككه‌فتن هاتیه‌كرن د ده‌مێ شه‌ش هه‌یڤاندا قانوونا په‌ترۆل و غازێ بهێته ده‌ركرن و پشتی ده‌ركرنا قانوونێ ب ڕێككه‌فتن دێ سه‌ره‌ده‌ری ل گه‌ل كه‌رتێ په‌ترۆل و غازێ ل هه‌رێما كوردستانێ هێته‌كرن.
شوان محه‌مه‌د، ئه‌ندامێ جڤاتا نوونه‌رێن ئیراقێ ژ فڕاكسیۆنا پارتی دیموكراتی كوردستان بۆ ڕۆژنامه‌یا (ئه‌ڤرۆ) گوت” پرۆسه‌یا ڕاده‌ستكرنا په‌ترۆلا هه‌رێما كوردستانێ گرێدای قانوونا په‌ترۆل و غازیا هه‌رێمێ و ده‌ركرنا قانوونا په‌ترۆل و غازێ ڤه هه‌یه ل ئیراقێ، چونكه هه‌تا نوكه ل ئیراقێ قانوونه‌كا فیدڕالی بۆ په‌ترۆل و غازێ نینه، به‌لكو ڕێككه‌فتن هاتیه‌كرن د ناڤبه‌را به‌غدا و هه‌رێما كوردستانێ دا و د قۆناغا ئێكێ دا ب ڕێككه‌فتن پڕۆژه‌یێ قانوونا په‌ترۆل و غازێ بهێته ده‌ركرن، ده‌مێ قانوونه‌كا ئێكگرتی بۆ په‌ترۆل و غازێ ل ئیراقێ بهێته ده‌ركرن، دێ پرۆسه‌یا ده‌رئینان و فرۆتنا په‌ترۆلێ و ڤه‌دیتنا په‌ترۆلا هه‌رێما كوردستانێ د چوارچوڤه‌یێ وێ قانوونێ دا هێته دیاركرن، به‌لێ ئه‌ڤه‌ژی دبیت ژئالیێ هه‌ردو وه‌زاره‌تێن په‌ترۆلا ئیراقێ و سامانێن سرۆشتی یا هه‌رێما كوردستانێ بگه‌هنه ڕێككه‌فتنێ كا دێ چاوا سه‌ره‌ده‌ری دگه‌ل كه‌رتێ په‌ترۆلا هه‌رێمێ دا هێته‌كرن، هه‌تا ژئالیێ سیاسی ڤه پێدڤیه هه‌رێما كوردستانێ و به‌غدا بگه‌هنه ڕێككه‌فتنێ و پشتی ڕێككه‌فتنێ ئاریشه نینه كو هه‌رێم دێ په‌ترۆلێ ڕاده‌ستی به‌غدا بكه‌ت یان ژی پاره‌یێ فرۆتنا په‌ترۆلێ دێ هێته ڕاده‌ستكرن.
په‌رله‌مانتارێ گوت ژی” به‌ری ده‌ركرنا قانوونا په‌ترۆل و غازێ دێ هه‌روه‌كو به‌رێ سه‌ره‌ده‌ری ل گه‌ل كه‌رتێ په‌ترۆلا هه‌رێما كوردستانێ هێته‌كرن و پێدڤیه د ده‌مێ شه‌ش هه‌یڤان دا ئه‌و قانوون بهێته ده‌ركرن، هه‌رێما كوردستانێ ژی هه‌تا وی ده‌می دێ په‌ترۆلا خوه فرۆشیت، چونكه ڕێككه‌فتنا به‌رێ ژی هه‌یه كو د ناڤبه‌را هه‌ردو حوكمه‌تان دا هاتیه‌كرن و ل سه‌رده‌مێ حوكمه‌تا كازمی ٢٠٠ ملیار دینار هه‌یڤانه بۆ هه‌رێما كوردستانێ هاتبوونه دیاركرن، حوكمه‌تا نوكه یا ئیراقێ ژی ڕازیبوویه ب هه‌مان میكانیزم سه‌ره‌ده‌ری دگه‌ل هه‌رێما كوردستانێ بهێته‌كرن هه‌تا قانوون دهێته په‌سه‌ندكرن، چونكه سه‌رجه‌مێ داهاتێ په‌ترۆلێ هاتیه هه‌ژمارتن و هه‌ڤبه‌ركرن دگه‌ل بودجێ ئیراقێ و پشكا هه‌رێما كوردستانێ هاتیه دیاركرن و به‌غدا ژی ٢٠٠ ملیاران هه‌یڤانه بده‌ته هه‌رێما كوردستانێ، لژنه‌یا چاڤدێریا دارایی یا ئیراقێ ل هه‌یڤا شوباتا سالا بۆری ڕاپۆرتا خوه پێشكێشی حوكمه‌تا ئیراقێ كریه، ئانكو هنارتنا ٢٠٠ ملیارێن سالا بۆری بخێر بۆ هه‌رێما كوردستانێ نه‌هاتینه دیاركرن به‌رۆڤاژی دگه‌ل داهاتێ په‌ترۆلێ هاتیه هه‌ژمارتن”.
شوان محه‌مه‌د ئاماژه‌كر” ل كارنامه‌یا حوكمه‌تا سودانی ژی هاتیه دڤێت دده‌مێ شه‌ش هه‌یڤان دا قانوونا په‌ترۆل و غازێ بهێته ده‌ركرن، ئه‌ز باوه‌رم ئاریشه ل دۆر ڤێ چه‌ندێ نابن، ژ به‌ر كو دێ داهات هێنه هه‌ژمارتن و پشكا هه‌رێما كوردستانێ هێته دیاركرن، بۆ نموونه دێ داهاتێ په‌ترۆلا هه‌رێما كوردستانێ هێته دیاركرن و پشكا هه‌رێمێ ژی د ناڤا بودجه‌ی دا هێته دیاركرن و ددووڤدا دێ پێداچوون هێته‌كرن چه‌ند كێم بیت دێ به‌غدا پێگیر بیت ب هنارتنا پشكا هه‌رێما كوردستانێ، گرنگ ئه‌وه ڕێككه‌فتن به‌ری پێكئینانا حوكمه‌تا ئیراقێ هاتیه‌كرن و هه‌ردو ئالی ژی دێ پێگیربن ب ڤێ ڕێككه‌فتنێ وهوورده‌كاری دێ مینن بۆ قۆناغێن داهاتی كا دێ چاوا پڕۆژه‌یێ قانوونا په‌ترۆل و غازێ هێته به‌رهه‌ڤكرن و ماف و شایسته‌یێن هه‌رێما كوردستانێ هێنه گه‌ره‌نتی كرن، بۆ ئه‌ڤ ساله ژی دێ به‌غدا یا پێگیربیت ب هنارتنا پشكا هه‌رێما كوردستانێ”.
