نێچیرڤان بارزانی: داخوازێ ژ ئالیێن هەڤپەیمانیا بڕێڤەبرنا دەولەتێ دكەین پێگیری ڕێككەفتنان بن
ئەڤرۆ
سەرۆكێ هەرێما كوردستانێ، نێچیرڤان بارزانی دلتەنگیا خوە ژ دەستكاریكرن و گوهۆڕینێن د مادەیێن 13 و 14 یێن پڕۆژەیێ قانوونا بودجەیا گشتی یا ئیراقێ دیاردكەت و دبێژیت: داخوازێ ژ هەموو ئالیەكی و ب تایبەتی ئالیێن هەڤپەیمانیا بڕێڤەبرنا دەولەتێ دكەین، پێگیری ڕێككەفتنان بن.
نێچیرڤان بارزانی، سەرۆكێ هەرێما كوردستانێ سەبارەت وان گوهۆڕینان پەیامەك بەلاڤكر و دبێژیت» ب دلتەنگیەكا مەزن ڤە ژ دەستكاری و گوهۆڕینێن د وان برگەیێن پڕۆژەێ قانوونا بودجەیا گشتی یا ئیراقێ دنێرین كو پەیوەندی ب مافێن دەستووری یێن هەرێما كوردستانێ ڤە هەی و ب ئێكجاری ڕەت دكەین».
سەرۆكێ هەرێمێ د پەیاما خوە دا گوت ژی» ئەو پێنگاڤە دروستكرنا ئاستەنگایە ل بەردەم پڕۆژەیێ قانوونا بودجەی كو هەموو وەلاتیێن ئیراقێ ب ئومێد ڤە چاڤەڕێنە بۆ دەمێ سێ سالێن داهاتی بهێتە پەسەندكرن».
هەروەسا گوت» پێگیری ب ڕێككەفتنا سیاسی یا هەڤپەیمانیا بڕێڤەبرنا دەولەتێ، بنەمایێ ئارامی و سەقامگیریا سیاسی یا ئیراقێ و پێنگاڤا دروستە بەر ب پاشەڕۆژەكا باشتر بۆ وەلاتی و هەموو پێكهاتەیان. بازدان ب سەر تێكگەهشتنێ و ڕێككەفتناندا و بزاڤكرن بۆ پێشێلكرنا مافێن دەستووری یێن هەرێما كوردستانێ، مامەلەكا تمام ناكۆكە ل گەل بەرپرسیارەتیا نیشتمانی دا و ژبلی نە ئومێدیێ و ئالۆزكرنا سەقامگیریا سیاسی یا وەلاتی، چ تشتەكێ دی نینە و زیانێ دگەهینیتە هەموو ئیراقێ».
د پەیاما سەرۆكێ هەرێما كوردستانێ هاتیە ژی» قۆناغێن بۆری و ئەزموونان سەلماندیە كو مامەلەكرن ب لۆژیكا هێزێ و زۆرینە و كەمینە و پێشێلكرنا ماف و شایستەیێن پێكهاتەیێن ئیراقێ، هیچ دەمەكی ئارامی و سەقامگیری بۆ وەلاتی نەئینایە و نائینیت، لەوما داخواز ژ هەموو ئالیەكی و ب تایبەتی ئالیێن هەڤپەیمانیا بڕێڤەبرنا دەولەتێ دكەین، پێگیری ڕێككەفتنان بن و ئەم هەموو د ئاستێ بەرپرسیارەتیێ دا ڕەفتارێ بكەین، هەروەسا پێدڤیە ئالیێن كوردستانی ژی ب ئێكڕێزی بەرگریێ ژ مافێن مە یێن دەستووری بكەن».
نێچیرڤان بارزانی دووپاتكر» هەرێما كوردستانێ وەكو بەردەوام ل سەر بنەمایێ دەستووری یا بەرهەڤە بۆ چارەسەركرنا هەموو كێشەیان و ئەزموونا چەند مەهێن بۆری یا پێكڤەكاركرنێ و تێكگەهشتنێ د ناڤبەرا هێز و ئالیێن ئیراقی دا و كاركرن ب ڕێككەفتنا پێكئینانا حوكمەتا فیدرالی، جهێ خوەشحالیا گەلێ ئیراقێ و دۆستێن وی بوو، لەوما پێدڤیە ئەو ئاراستەیە بهێتە پێشڤەبرن و ڕێك نەهێتە دان هندەك كەس ببنە ئەگەرێ پشت گوه هاڤێتنا ڕێككەفتنان و ئالۆزكرنا ڕەوشێ».
