دو كەڤالێن بێ پەرواز
ئەلند مزیری
(ئاخ)
ئەڤ چ ئاخە
هوسا یا بێ هیڤی و زاخە
من خۆ ژێرا كر هنجار
دا نەهێلم ئاخا كەڤنار
من گەلەك كۆلا و ڤەكۆلا
دا نەهێلم شۆپێن سۆلا
بۆ هیڤیێن وێ
من كرە شۆڤ
بۆ خۆزیێن وێ
خۆ كر تۆڤ
دەما من زانی..!
دلێ وێ پڕی داخە
ژڤینێ لێ ڤالایە ناخە
لەورا من دخواست
گرنژینا
لسەر بیابانا لێڤێن وێ
بكەم مشتاخە
لێ پشتی هاتیە بەری
ئەز كرم پیش و پەلاخە.
(رۆژ)
هەمی رۆژان
چاڤێ وێ ..
ل هەلاتنا رۆژێ بوو
كۆ هیڤیەكێ…
دگەل هەلاتنا خۆ
پێشكێشی وێ بكەت،
دەما كۆ رۆژ
ب هیڤی ڤە لێ هەلاتی
ئەوێ رۆناهیا وێ
د ئەردی ڤەدا.
