پیرەژن و سە و «یالوڤا»
ئیسماعیل مستەفا
نێزیكی دەه سالانە رێیا من دكەڤتە ڤی باژێرێ جوان مینا پەریەكێ هەتا چۆكان پێن خو بەرداینە دڤی دەریای دا و سینگێ خو ژی كریە پارك و باخچە و گولێن هەمەرەنگ و بەژنا دار چناران كریە سیبەر لسەر وێ مەحفیرا كەسك كو جارنا ئەو و دەریا دەمێ هاتنا پێلا لڤێن هەڤدو ماچی دكەن.
مروڤ ژ دیمەنێن جوانیا وی و خەلكێ وی تێر نا بیت (یالوڤا) یا ژ بەهەشتێ بەشی، ئەڤ باژێرە ئارامبەخشە هەمی هەست خۆشیێ ددەنە مرۆڤ ماندیبون و وەستیانا سالێ دشۆت گەشینیەكا بەردەوام ئاسویێن دهەلێت.
ئێك ژ وان دیمەنین سالانە دوبارە دبن و بالا من دكێشا.
دیمەنێ پیرەژنەكا رێنجبەر و بناڤ سال ڤە چوویە. لێ سال نەشیاینە جوانیا وێ برەڤینن دیمەنێ سالانەیە یا لسەر كورسیا خو روینشتی یە، بەژنەكا تژی و بخۆڤە و دێمەكێ خر وەكی هەیڤا چاردە شەڤی و سۆر و سپی و پرچەكا زەر « ژنەكا ب سەروبەر و جوان و ماقیل، من چ جاران ژ پێرڤە نە دیتی یە مینا گولەكێ شاكێن خۆ بسەر كورسیێ دا شووركر بوون هەردەم ب گرنژینڤە دا پارا ژ مرۆڤان وەرگریت و دەمێ ژ دەستاڤێ دەردكەتن.
هەمی دەما تشتەكی بالامن دكێشا ئەو سەیێ رەنگ سۆر یێ مەزن هەمی گاڤان درێژكری سەرێ وی ل بەر پێن وێ, دێ بێژی هەڤالجێمكن هندی پێكڤە گرێداینە.
یا دیارە هەردو دلێنیی و هێزی ژ ئێكدو وەردگرن، لێ ڤێ جارێ دیمەنێ هەرجار نەبوو، تشتەكێ كێم بوو, نزانم چیە، لێ من باش هزرێن خۆ كرن دیمەنێن سالێن بۆری ئینانە بەرێك و بەراوردی دكرن, ئها هاتە بیرا، من ئەو ژی سە د دیمەنێ ئەڤ سالەدا نینە.
من هزكر یێ چوویە گەریانەكێ سەرەدانا هندەك هەڤالێن خۆ بكەت « چونكی ل (یالوڤا) سە و پشیك د ئازادن ب كەیفا خۆ دهێن و دچن و یا ژهندێ گرنگتر خەلك گەلەك سەرەدەریەكا جوان دگەل دكەن.
نزا چاوا بێێ من های ژ خۆ هەبیت من پرسیار ژ وێ پیرەژنێ دكر ئەوێ ژی ب دیمەكێ خەمگین ڤە ب هەستێن ئازریای دەستێ خو دانا سەر رویێ خۆ یێ خر و تژی بەرسڤا من ب تافیەكا ب رۆندكان دا.
یالوڤا 25/8/2023
