زێمارا باسكێن خەریب
ژینێ رێكانی
پێلێن بای هێزك ب چپكێن بارانێ دكر
ل گۆلۆپا هنداڤی پەنجەرا مە
ل خاچێ ددان
هلمەكا سپی ژ هناڤێن وێ
ڕەشمالەكا رەنگ – رەنگ
دنەخشاند و
دبای وەركر
بێدەنگیێ كۆلان تژی سەما كر
باسكێن من
د خەیالا همبێزا تەدا
بەژنا شعرا من
بلندتر كر.
ڤێ باران و شلیێ
رحا منا ژ چاڤەرێی هاتنا تە
تەر و شل و كەرخی
دبن پەیڤێن هۆزانەكا
تژی ژ گزنگا سپێدەهیا ماچی دكەت ئەنیا تە
تنێبوونا خوە
د وەرزێ بێ هەبوونا تە دا
چیرۆكێن سیس بوویێن خوە
ئاڤچی دكەم و د خەونێن ژبیركری دا
كەزیێن بێدەنگیا شەڤێن درێژێن پاییزێ
ب ماندیبوونا هەستێن خوە
ل ناڤ مژا هەمی پەیا رێكێن
دهێنە بەردەرازینكا تە
هینكاتی سەمایا دلی دگریت
خەیالەكا سپی
تژی خوناڤا ماچ و همبێزا تە
ل سەر مەستییا هەستێن من دچینیت
رح مەست دبیت
باسكێن من بۆ همبێزكرنا تە
شل و خاڤی دگریت.
