پڕەنسیب
زەكەریا حەمید ئاكرەیی
دەمێ ڤییابا باخڤیت كەسێ گوهدارییا وی نەدكر و دا ل وی جهی چن یێ ئەو چووبایێ.. هەمییان ڕك و كین دگەل هەلگرتبوون, بێزێن خۆ لێڤەدكرن, هەر گاڤ دابێژنێ تو یێ پیسی تو هەژی ژیانێ نینی نك مە هەڕە بێهن یا ژتە دهێت دا ژ وی ڕەڤن .. هند جاران ژی دا بێژنێ خۆزی تو لمە دویركەڤت بای دناڤ مەدا نەبای .!
ڕۆژەكێ ژ ڕۆژان دنیڤا بازاریدا چەند كەسەكان خۆلێكدان و هاتن ب سەروبەر تێر قوتان و جلكێن وی هەمی دڕاندن و بچویك كەفتنە دویف.. بەرباران كرن و هەمییان پێ دكرە كەنی…
نەچاربوو چ ب دلەكی و چ ب سەد دلا .. رێكا خۆ گرت و هێدی هێدی كەفتە ڕێ و قەستا باژێڕەكێ دیتر بكەت, دەما گەهشتی لسەر شۆستەكی لبن سها دارەكێ رۆینشت دا بێهنا خۆ ڤەدەت, ب رەخ ویڤە كەسەكێ جەنتەل یێ لبەر عەرەبانێ راوەستیایی بوو, ئەوی كەسی خۆ نزیك كر و لێ پرسی…
_تۆ كی و لكیڤە هاتی؟
_ناڤێ من پڕەنسپە, ئەز یێ ل باژێرەكێ دویر هاتیم.
_ خێرە تە چ كار هەیە ل باژێرێ مە؟
_ئەز یێ هاتیم من دڤێت لڤی باژێری بژیم.
_تە گۆت ناڤێ تە چ بوو؟
_ ڕەوشت.
_ بۆ تیق تیقا وی هاهاها ڕەوشت؟!
_ ما من تشتەكێ خەلەت گۆتییە؟
_ ها نە.. تە چ تشتێ خەلەت نەگۆتییە لێ من ژنوی زانی كێشا تە چییە..!
_چییە؟
_ د سەردەمەكیدا ئەز ژی مینا تە یێ پەریشان و بێ خۆدی و ژاربووم, چۆنكی ناڤێ من (ڕەوشت)بوو, پشكەكا مەزن یا خەلكی حەز ژمن نەدكرن و ئاریشە و كێشە بۆمن چێ دكرن…
ئەز هند ئێشاندم و لاواز ژی كرم دەهان بۆختان بمن كرن باوەربكە كاك پڕەنسیب ژ برسا و ترسان دا مرم…
ئەز ژی ب نەچاری ڕەڤیم و هاتمە ئەڤی شارەی لێ من ناڤێ خۆ گوهۆڕی و من دەست ب پیشەیەكا سەردەمی و مۆدرێن كر هەر ژ رۆژا دەستپێكرنا من بۆ ئەڤی كارەی هەمییان ئەز هەمبێزكرم و حەز ژمن كر و زوی ب زوی ناڤ و دەنگێ من ب باشی و خۆش مرۆڤی و مەردایەتی و شۆرەشگێر بەلاڤبوو…
ژهنگی وەرە هەر ژ وەزیری هەتا گزیری بێی من چ كاران ناكەن بۆ هەر گۆرانكارییەكا جڤاكی ئیداری و بۆ هەر بۆنەكا نەتەوەیی و ئاینی من داخوازدكەن و بۆچوونێن من وەردگرن لەوما داخوازێ ژ تە دكەم ناڤێ خۆ بگۆهوڕە و وەرە دگەل من كار بكە, دێ باشترین ژیان تە هەبیت .
_ چبكەم دگەل تە تو چ كاردكەی؟
_ ئەز دەوی دفرۆشم وەرە دگەل من كاربكە ئەز دێ تە فێركەم, باوەر بكە ئەز و تۆ دێ بینە باشترین ماستاوچی.!!
