هەڤپەیمانییا مەسیحی پڕۆژەیەكی بۆ پاراستنا رەسەناتییا مەسیحییان ل دەشتا نەینەوا رادگەهینیت
د پێنگاڤەكا گرنگ و چارەنڤیسساز دا بۆ پاراستنا پێكهاتەیێن رەسەن یێن ئیراقێ، هەڤپەیمانییا مەسیحی ل ئیراقێ د كۆمبوونا خوە یا ئاسایی یا مەهانە دا، ب فەرمی دەسپێشخەرییا نیشتمانی یا ب ناڤێ «تلكێف» راگەهاند. ئەڤ پڕۆژەیە وەك بەرسڤەك بۆ وان مەترسییان دهێت كو ل سەر هەبوونا دیرۆكی و ناسنامەیا دیمۆگرافی یا مەسیحییان ل دەڤەرێن دەشتا نەینەوا دروست بووینە.
هەڤپەیمانییا مەسیحی د راگەهاندنا خۆ دا دیار كر كو ئەڤ دەسپێشخەرییە ژ باوەرییەكا كوور یا نیشتمانی و مرۆڤایەتی ژێدەری دگریت. ئارمانجا سەرەكی پاراستنا وان بنەمایێن پێكڤەژیانێ و دادپەروەرییێ یە كو سەدان سالە ئیراق پێ دهێتە نیاسین. ناڤێ «تلكێف» ب مەبەست هاتییە هەلبژارتن؛ چونكی ئەڤ باژێڕكە سیمبۆلەكێ شارستانی و دیرۆكی یە بۆ مەسیحییێن كلدانی و هەموو گەلێن دەڤەرێ. ئەڤڕۆ تلكێف و دەشتا نەینەوا ب گشتی روو ب روو ئاستەنگێن مەزن بووینە، ژ وان ژی بزاڤێن گوهۆڕینا دیمۆگرافی و ژناڤبرنا ناسنامەیا رەسەن، لەوما ئەڤ دەسپێشخەرییە دهێتە هەژمارتن وەك سەنگەرەكێ سیاسی و یاسایی بۆ داكۆكیكرن ژ مافێن رەوا یێن ڤی گەلی.
ئەڤ دەسپێشخەرییە تنێ درووشم نینن، بەلكو بەرنامەیەكێ دارێژتی یە كو شەش تەوەرێن سەرەكی ل خۆ دگریت:
تەوەرێ یاسایی: كاركرن بۆ ڤەگەڕاندنا هەموو وان ئەرد و خانیێن ب زۆری یان ب بڕیارێن نەدادپەروەرانە ژ خودانێن وان هاتینە ستاندن، ب پشتگرێدای ب دەستوورێ ئیراقێ.
تەوەرێ سیاسی: گەهاندنا دەنگێ مەسیحییان بۆ جڤاكێ نێڤدەولەتی و ناڤەندێن بڕیارێ ل بەغدایێ، دا كو وەك هەڤپشكەكێ راستەقینە د وەلاتی دا بهێنە قەبوولكرن.
تەوەرێ ئابۆری: هاندانا وەبەرهێنانێ ل دەشتا نەینەوا و پەیداكرنا دەلیڤەیێن كاری بۆ گەنجان، دا كو ژ جهێن خۆ یێن رەسەن كۆچ نەكەن.
تەوەرێ كولتووری: پاراستنا كەلەپوور، زمان و شوونوارێن دیرۆكی یێن كلدان و سریان و ئاشووری و ئەرمەنان.
تەوەرێ گەنجان: ئاڤاكرنا نڤشەكێ نوو كو ب ئەردێ باب و كالێن خوە ڤە یێ گرێدایی بیت.
تەوەرێ نێڤدەولەتی: دروستكرنا پەیوەندییان ل گەل رێكخراوێن مافێن مرۆڤی بۆ پاراستنا كێمینەیان.
بەیاننامەیا هەڤپەیمانییێ ئاماژە ب وێ چەندێ كر كو پشكەكا مەزن یا كێشەیێن ئەڤرۆ دزڤڕن بۆ سیاسەتێن رژێما بەعس، ب تایبەتی بڕیارا هەژمار (117) یا سالا 2000ێ، كو ب وێ بڕیارێ دەست ب سەر هەزاران دۆنەمێن ئەردی ل تلكێف، تلسقۆف، حەمدانییە، بەرتلە و باتنایا دا هاتبوو گرتن. هەر چەندە پشتی سالا 2004ێ هەندەك بڕیار هاتنە هەلوەشاندن، لێ شوونوارێن وان یێن كارگێڕی هێشتا ماینە و بووینە ئاستەنگ ل پێشییا هاولاتییان. هەڤپەیمانییا مەسیحی داخواز دكەت ئەڤ شوونوارە ب تەمامی بهێنە راكرن و ئەرد بۆ خودانێن وان یێن رەسەن بهێنە ڤەگەڕاندن.
ل دووماهییا بەیاننامەیێ، هەڤپەیمانییا مەسیحی داخواز ژ هەموو هێزێن سیاسی یێن ئیراقی و هەرێما كوردستانێ، رێكخراوێن جڤاكێ مەدەنی و كەسایەتییێن نیشتمانی كر كو ببنە پشتەڤان بۆ «دەسپێشخەرییا تلكێف»ێ. هەروەسا دوپات كر كو بەرگریكرن ژ مەسیحییان، بەرگریكرنە ژ رەنگینی و جوانییا ئیراقێ وەك نیشتمانێ هەموویان. پاراستنا فرەڕەنگیێ ئەركەكێ نیشتمانی یە و نابیت هێلین ڤێ پێكهاتەیا دێرین ل بن هەر گڤاشتنەكێ یان گوهۆڕینەكا دیمۆگرافی دا بەرزە ببیت.
