پشتی ٢٣ى خزيرانێ سایکلۆژیا سیاسی یا ھندەک حزبان يا بەر ب ئالۆزیێ دچیت
ئەڤرۆ نيوز:
ل دووڤ ئەنجامێن ڤەکۆلینەکا ئەنستیتیۆتا نیشتمانی یا تایبەت ب دەستنیشانکرنا بەرژەوەندیان و ڤەکۆلینا پرسێن نیشتمانی و ستراتیژیێن ھەرێما کوردستانێ، ل دۆر پرسا سەرۆکاتیا ھەرێمێ و داھاتیا وێ، پێدڤیە گەل بریارێ بدەت، ڤەکۆلینا ناڤبری ب رۆھنی دیارکریە کو ئەزموونا پشتی ٢٣ خزیرانێ سەلماندیە کو سایکلۆژیا سیاسی یا ھندەک حزبان بەر ب ئالۆزیێ دچیت ھەتا وی رادەی کو د ئەنجامدا نەشێن بگەھنە رێککەفتنێ و سازانەکا نیشتمانی، لەوما پێدڤیە وەلاتی بھێنە سەرپشککرن بۆ بریاردانێ ل سەر پرسا سەرۆکاتیا ھەرێمێ.
ئەنستیتیۆتا نیشتمانی یا تایبەت ب دەستنیشانکرنا بەرژەوەندیان و ڤەکۆلینا پرسێن نیشتمانی و ستراتیژیێن ھەرێما کوردستانێ ل سەر بارودۆخێ سیاسیێ ھەرێمێ کوردستانێ د وێ ڤەکۆلینا خوەدا دبێژیت” ل دووڤ ڤەکۆلینێن سایکلۆژیا سیاسی، سەرکردێ رۆحی ھێزەکا کاریگەرە بۆ مان و سەربلندیا ھەر نەتەوەکی، ھەروەسا ب گۆرەی کولتۆرێ سیاسی و پاشخانا سیاسی یا ھەر نەتەوەکی ل جیھانێ، سەرکردە نەخشێ دیرۆکی و سیاسی د گوھۆرن و بەر ب پێشڤە دبەن، چونکی دیارە گەلەک ھاوکێشێن سیاسی یێن ھەین کو ب دیاربوونا سەرکردێن ژێھاتی ھەڤسەنگ دبن.
ھەر د وێ ڤەکۆلینێ دا ھاتیە کو ل دووڤ کۆدێن سایکلۆژیا سیاسی یا دەرکەفتی کو کەسایەتیا سەرکردەی گەلەک جھێ پیتەپێدانێ یە و رۆلەکێ گرنگ ژی دگێریت د بۆچوونێن دەولەتان و سیاسەتمەداران د نەخشێن سیاسەتێ دا، بۆ نموونە ھندەک سەرکردە خودان کاریزمایەکا تایبەتن ب خوەڤە کو بووینە سومبۆل بۆ گرنک نیاسینا پرسا نەتەوی یا وان، ژبلی وێ چەندێ کو تەوەر و کۆدێن گرنگ د سایکلۆژیا سیاسی دا پێکدھێت ژ رەفتارێ، لەوما رەفتارا سیاسەتمەداران، ب تایبەت تر رێبەرێن سیاسی کاریگەریەکا ھەژمونداری یا ھەی ل سەر تێروانین و ب حیساب ئینانا وان کەسایەتیان ژ روویێ ئەتەکێتا سیاسی و د جڤاکێ نێڤدەولەتیدا”.
ڤەکۆلینا ناڤبری ئاماژە ددەتە وێ چەندێ کو ھەرێما کوردستانێ پێدڤی ب پێنگاڤەکا دیرۆکی یا وەسایە کو پاشەرۆژ ژی یا پێڤە گرێدایە، چونکی بارودۆخێ وێ یێ سیاسی د قۆناغا لۆکالی و بریاردانا حزبی دا یا دەرکەفتی و پێدڤی ب بریارەکا سیاسی یا دروست یا ھەی.
ھەر د وێ ڤەکۆلینێ دا بەحس ل وێ چەندێ ھاتیە کرن کو ئەزموونا پشتی ٢٣ خزیرانێ سەلماند کو سایکلۆژیا سیاسی یا ھەندەک حزبان یا بەر ب ئالۆزیێ دچیت ھەتا وی رادەی کو د ئەنجامدا نەشێن بگەھنە رێککەفتنێ و سازانەکا نیشتمانی، لەوما پێدڤیە وەلاتی بھێنە سەرپشککرن بۆ یریاردانێ ل سەر پرسا سەرۆکاتیا ھەرێمێ، چونکی لادان ژ بنەمایێ تەوافوقێ نوکە شەرعیەتا قانوونی یا پەرلەمانی یا لەنگ کری و ھژمارەکا بەرچاڤ یا ئەندامێن پەرلەمانی ژی ژ روویێ بەرپرسیارەتیێ و نوونەرایەتیکرنا گەلی د وی پۆستی دا رەفتار نەکریە، ھندی وەکو حزبیەک ھەڤڕکیێن حزبی کرینە ھەکارەک بۆ دارێشتنا پرۆژە قانوونان، لەوما پێدڤیە گەل بریارێ ل سەر پاشەرۆژا پۆستێ سەرۆکاتیێ و پاشەرۆژا ھەرێما کوردستانێ بدەت، چونکی گەلێ کوردستانێ یێ ھشیارە و مافێ وی یێ قانوونی یە بریار بۆ خوە بدەت و پاشەرۆژ و داھاتێ خوە ژی دیار بکەت و نابیت حزب مافێ وێ بریاردانێ لێ ببڕیت.
