په‌رله‌مانتاره‌ك ئه‌نجنيدا پارتى بۆ قووناغا داهاتى ئاشكه‌را دكه‌ت
ئه‌ڤرۆ نيوز، نيوار محه‌مه‌د سه‌ليم:
ئافختنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ راگه‌هاند: ژ به‌ر مژووليا سه‌رۆكێ په‌رله‌مانى ب كارێن حزبايه‌تى و ئه‌جنيدايێن حزبا خوه د ناڤ په‌رله‌مانى دا نه‌شيناينه گه‌نگه‌شێ ل سه‌ر ئه‌گه‌رێن چوونا گه‌نجان بۆ ژ ده‌رڤه و گه‌له‌ك بابه‌تێن دى بكه‌ن.
محه‌مه‌د عه‌لى ياسين، ئافختنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ، د داخۆيانيه‌كا تايبه‌ت دا بۆ ئه‌ڤرۆ نيوز ئه‌نجنيدا پارتى بۆ قووناغا داهاتى ئاشكه‌را دكه‌ت و دده‌ته زانين ژى كو سه‌رۆكێ په‌رله‌مانى رێز بۆ په‌رله‌مانى نه‌هێلايه.
محه‌مه‌د عه‌لى ياسين دا زانبن كو ل ده‌سپێكێ بزاڤه‌ك هه‌بوو “روونشتنه‌كا تايبه‌ت ل سه‌ر چوونا گه‌نجان بۆ ژ ده‌رڤه‌يى وه‌لاتى هه‌بيت و گه‌له‌ك بابه‌تێن دى، بۆ نمۆنه، د بۆرينا ساله‌كێ ل سه‌ر كاره‌ساتا شنگال، مه هزر كر دێ تشته‌كێ باش هێته كرن و هنده‌ك رێنما د به‌رژه‌وه‌ندا وان دا ده‌ركه‌ڤن، به‌لێ ژ به‌ر مژووليا سه‌رۆكێ په‌رله‌مانى ب كارێن نه گرێدايى په‌رله‌مانى ل ناڤ هۆلا په‌رله‌مانى و په‌يره‌وكرنا ئه‌جنيدايێن حزبا خوه، چو نه‌هاته كرن”.
ئافختنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ خۆيا كر كو ئه‌و وه‌كو پارتى ڤێ چه‌ندێ قه‌بوول ناكه‌ن و هه‌كه سه‌رۆكێ په‌رله‌مانى ل سه‌ر بێ رێزكرا په‌رله‌مانى يێ به‌رده‌وام بيت، ئه‌و دێ كار ل سه‌ر وێ چه‌ندێ كه‌ن “هنده‌ك بژاردێن دى ل به‌ر مه‌هه‌نه و ژ وان دووباره پێداچوون ب وێ ته‌وافقێ يا كابينا هه‌شتێ ل سه‌ر هاتيه مه‌زارندن و پۆستێن په‌رله‌مانى ل سه‌ر هاتينه بلاڤكرن” ب به‌هانه‌يا وێ چه‌ندێ “نابيت گۆڕان د هه‌مان ده‌م حوكمه‌ت بيت و ئۆپۆزسيۆن بيت، دڤێت گۆڕان و سه‌رۆكێ په‌رله‌مانى باوه‌رى ب ديموكرسيا ته‌وافقى هه‌بيت”.
