چه‌كدارێن حه‌شد شه‌عبی ژ جیهادێ بۆ ئورۆپا د ڕه‌ڤن
ئه‌ڤرۆنیۆز، ئه‌یاد به‌روارى
میلیشیێن حه‌شد شه‌عبی یێن شیعی ئه‌وێن ب فه‌توایه‌كا مه‌رجه‌عیه‌تا ئایینی یا شیعی هاتینه پێكئینان و ل گه‌ل له‌شكرێ عیراقێ شه‌ڕێ داعشێ دكه‌ن، به‌ر ب په‌رت و به‌لاڤبوونێ ڤه دچن ژ ئه‌گه‌رێ چوونا هژماره‌كا مه‌زن یا چه‌كدارێن وان میلیشیان بۆ ئورۆپا، چه‌ندین چاڤدێر ژی ئه‌گه‌رێ مشه‌ختبوونا چه‌كدارێن حه‌شد شه‌عبی بۆ هه‌بوونا هژماره‌كا مه‌زن یا كوشتی و به‌رزه‌بوویان دناڤ رێزێن واندا زێده‌باری قه‌یرانا دارایی ل عیراقێ و گیرۆبوونا مووچێن وان وسه‌رپێچیێن مه‌زن یێن وان میلیشان دژی وه‌لاتیێن سڤیل ئه‌نجامداین.
سایتێ (الخلیج اونلاین) به‌لاڤكریه كو ل دووڤ به‌یاننامه‌كا رێكخراوا (السلام) یا مافێن مرۆڤی د مه‌ها ته‌باخا 2015ێ، نێزیكی 300 چه‌كدارێن حه‌شد شه‌عبی یێن ب به‌لگه‌نامێن ساخته چووینه ئورۆپا كو تێدا جهێ ئاكنجیبوونا خوه كریه مووسل یان ئه‌نبار.
سه‌عه‌د ئه‌عزه‌می سه‌رۆكێ هه‌ڤالبه‌ندا مافپه‌روه‌ریا نێڤده‌وله‌تی ژبۆ عیراقێ ل دۆر ئه‌گه‌رێ مشه‌ختبوونا ئه‌ندامێن حه‌شد شه‌عبی بۆ ده‌رڤه‌ى عیراقێ، دبێژیت” هژماره‌كا مه‌زن ژ چه‌كدارێن حه‌شد شه‌عبی د شه‌ڕێ دژى داعشێ یێن هاتینه كوشتن و قه‌یرانا دارایی ل عیراقێ، ئه‌گه‌رێن سه‌ره‌كی نه یێن په‌رت و به‌لاڤبوونا میلیشیێن حه‌شد شه‌عبی و به‌لگه ژی ل سه‌ر ڤێَ چه‌ندێ داخوازایێن ڤێ دووماهیێ یێن مه‌رجه‌عێن سیاسی و ئایینی و جڤاكی یێن شیعی بۆ داخوازكرنا زارۆیان و قوتابیان بۆ ناڤ رێزێن حه‌شد شه‌عبی”.
