ئەڤرۆ 14 بەربژێر دێ ھەڤڕکیێ ل سەر پۆستی پارێزگارێ مووسل کەن
ئه‌ڤرۆ نيوز، بارزان مزوورى:
سەرۆکێ کۆتلا برایەتی و پێکڤەژیانی بۆ ئەڤرۆ دیار کر کو بریار بوو دوھی 4ى چريا ئێكێ کەسەک بۆ پۆستی پاریزگارێ مووسل ھاتبا دەستنیشانکرن، لێ بۆ ئەڤرۆکە 5ى چريا ئێكێ ھاتیە پاشخستن، چونکی ھندەک بەربژێر ژ بەغدا نەگەھشتن.
سەیدو چەتو سەرۆکێ کۆتلا برایەتی و پێکڤەژیانی دیار کر کو ئەڤرۆ 5ى چريا ئێكێ ئەنجومەنێ پارێزگەھا نەینەوا ل ناحیا ئەلقوش دێ کۆمبوونا خوە بۆ دانانا پارێزگارەکێ نوو ئەنجام دەت و گۆت “15 کەسان خوە بەربژێر کربوون، لێ ئێک ژ وانا خوە ڤەکێشایە و نوکە 14 بەربژێر ماینە و د کۆمبوونا ئەڤرۆ دا یێ پڕانیا دەنگان بینیت دێ بیتە پارێزگارێ مووسل”.
سەیدو چەتو زێدەتر دیار کر کو ئەو کەسێ پۆستێ پارێزگارێ مووسل وەردگریت پێدڤیە کەسەکێ نێزیکی کوردان بیت و یێ ھەڤکار بیت دگەل حوکمەتا ھەرێما کوردستانی و حوکمەتا بەغدایێ و ب چ شێوەکێ ئێکلایەنی کار نەکەت و نابیت دەست د کەفتنا مووسلێ دا ھەبیت و نابیت ھاتبیتە دادگەھکرن ل سەر چ تاوانان زێدەباری چەندین مەرج و رینمایێن دی.
