په‌رله‌مانێ عیراقێ، دێ پرسا پشكداریكرنا رووسیا د شه‌رێ دژى داعش دا ئێكلاكه‌ت
ئه‌ڤرۆنیۆز، ئه‌یاد به‌روارى
په‌رله‌مانتاره‌كێ عیراقی پێشبینیا وێ چه‌ندێ دكه‌ت به‌ری ب دووماهی هاتنا ڤێ مه‌هێ په‌رله‌مان ده‌نگدانێ ل سه‌ر داخوازه‌كا فه‌رمی یا عیراقی بۆ ئه‌نجامدانا هێرشێن ئه‌سمانی ژلایێ روسیا ڤه دژی داعشێ ل عیراقێ.
موه‌فه‌ق روبێعی په‌رله‌مانتارێ ده‌وله‌تا قانوونێ و شیره‌تكارێ به‌رێ یێ جڤاتا ئاسایشا نیشتمانی یا عیراقێ بۆ ئاژانسا (سپوتنیك) یا روسی راگه‌هاند” ده‌نگدان ل سه‌ر ڤێ پرسێ دێ ل ڤێ مه‌هێ (چریا ئێكێ) هێته كرن”.
ژلایه‌كێ دی ڤه ئاژانسا (رویته‌رز) ل دووڤ هنده‌ك ژێده‌ران دناڤ هه‌ڤپه‌یمانیا نیشتمانی یا ده‌ستهه‌لاتدار ل عیراقێ به‌لاڤكریه كو ئه‌ندامێن هه‌ڤپه‌یمانیا نیشتمانی داخواز ژ سه‌رۆك وه‌زیرێن عیراقێ حه‌یده‌ر عه‌بادی كریه كو ب فه‌رمی داخوازا ئه‌نجامدانا هێرشێن ئه‌سمانی یێن روسی دژى داعشێ بكه‌ت.
دو ئه‌ندامێن وێ هه‌ڤپه‌یمانیێ بۆ رویته‌رزێ دیاركریه كو عه‌بادی یێ تۆشی فشارێن مه‌زن دبیت ژلایێ هه‌ڤپه‌یمانیا نیشتمانی ڤه ل دۆر وێ چه‌ندێ، ب تایبه‌تی پشتى حوكمه‌تا عیراقێ د گه‌له‌ك هه‌لكه‌فتان دا دلگرانیا خوه ژ كاریگه‌ریا هێرشێن ئه‌سمانی یێن هه‌ڤپه‌یمانیا نێڤده‌وله‌تی ب سه‌ركێشیا ئه‌مریكا دیاركری.
دهێته زانین سه‌رۆكێ ده‌سته‌یا ئه‌ركانێن هه‌ڤپشكێن ئه‌مریكی جه‌نه‌رال (جۆزێف دانفورد) ل رۆژا سێشه‌مبیا بۆری 20/10/2015 د كڤانێ سه‌ره‌دانا خوه‌دا بۆ هه‌ولێرێ گوتبوو كو عه‌بادی ب ئه‌مریكا راگه‌هاندیه كو به‌غدا داخوازێ ژ روسیا ناكه‌ت هێرشێن ئه‌سمانی ل عیراقێ ئه‌نجام بده‌ت.
به‌ری نوكه روسیا و ئیرانێ و سووریێ و عیراقێ بنگه‌هه‌كێ هه‌ڤكاریێ بۆ گوهارتنا پێزانینێن هه‌والگیری ل به‌غدا دانابوو ژبۆ هه‌ڤكاریێ د روو ب رووبوونا داعشێ دا ل عیراقێ و سووریێ.
