ئاژانسا رویتەرز شیرەتەکێ ل کوردان دکەت
ئەڤرۆ نیوز:
ئاژانسا رویتەرز یا نووچەیان د راپۆرتەکێ دا دیار دکەت کو نھا رەوشا سووریایێ وەک جاران نەمایە و گوھۆرینێن نوو ل وی وەلاتی روو ددەن، ب تایبەتی ژی پشتی کو روسیا دەست ب ھێرشێن ئاسمانی ل دژی داعشێ و گرۆپێن دی یێن چەکداری کری رەوشەکا نوو دروست بوویە، د وێ رەوشا نوو دا کورد دشێن ببنە مفادارێ یەکێ و پێگەھێ خوە بۆ سووریا یا نوو گەلەک ب ھێز بکەن، چونکو نھا نە ئەمریکا و نە ژی روسیا دژبەریا کوردان ناکەن و ھەتا ھاریکاریا وان ژی دکەن و دڤێت کورد ژی مفایێ ژ وێ یەکێ وەربگرن و پێگەھێ خوە ب ھێز بکەن.
د پشکەکا دی یا راپۆرتێ دا ھاتیە دیار کرن کو دڤێت ھێزێن کوردی ل سووریایێ ببنە ئێک ل سەر ستراتیژیەکا ھەڤپشک کار بکەن و پەیوەندیێن خوە ل گەل روسیا و رۆژئاڤا باشتر لێ بکەن، چونکو ھێرشێن ئەسمانی یێن روسیا ل سەر داعشێ و گرۆپێن دی یێن چەکداری ل سووریایێ دێ وەسا کەت کو پێگەھێ کوردان ب ھێز کەڤیت، ئەو یەک بۆ کوردان دەلیڤەکا گەلەک باشە و ئەو ھاریکاریێن کو نھا ئەمریکا ددەنە وان ژی دشێت ببینە بنەمایەک مەزن بۆ پاشەرۆژا ھەرێما کوردی ل سووریایێ و ژ بەر ھندێ ژی دڤێت کورد ببنە ئێک و ل سەر بەرنامەک ھەڤپشک پێکڤە کار بکەن.
د پشکەکا دی یا راپۆرتێ دا ھاتیە دیار کرن کو دڤێت کورد ل سووریایێ لەزێ د راگەھاندنا ھەرێما کوردی یان ھەر پرۆژەکێ دی نەکەن، چونکو رەنگە ئەو یەک ببیتە ئەگەر ئەمریکا و روسیا پشتەڤانیا کوردان نەکەن. نھا ژ بەر شەرێ ل دژی داعشێ ئەمریکا و وەلاتێن رۆژئاڤا پشتەڤانیا کوردان دکەن و ئەو یەک بۆ کوردان دەلیڤەکا زێرینە و دڤێت کورد مفای ژێ وەربگرن، نھا روسیا و ئەمریکا ھەر دو ژی دبینن ل سووریایێ کورد ھێزەک سەرەکی نە و نھا دژبەریا وان ناکەن، روسیا دژبەریا کوردان ناکەت، چونکو نەڤێت کورد نھا شەرێ رژێما سووریایێ بکەن و ئەو باش دزانیت ھەکە کورد کارەکێ وەسا بکەن دێ رژێما بەشاری د دەمەکێ کورت دا ژناڤ چیت و ئەمریکا ژی ژ بەر شەرێ ل دژی داعشێ پێدڤی ب کوردان و ژ بەر ھندێ ژی دڤێت کورد وان ھەر دو خالان ب رەنگەکێ باش بۆ پاشەرۆژا خوە بکار بینن.
د دووماھیا راپۆرتێ دا ئەو یەک ژی ھاتیە دیار کرن کو دڤێت کورد ل سووریایێ بۆ تورکیا بسەلمینن کو ئەو ژی دشێن وەک کوردێن عیراقێ پەیوەندیێن باش ل گەل وان دروست بکەن و چو دەمەکێ نەبنە مەترسی ل سەر وان، چونکو ھەبوونا پەیوەندیێن باش یێن کوردێن سووریایێ ل گەل تورکیا بۆ پاشەرۆژا وان گرنگە.
