سەرۆکێ ھەوالگیریا سوید: گەفا کریارەکا تیرۆرستی ل سوید یا ھەی
ئەڤرۆ نیوز، ئەیاد بەرواری
ھەوالگیریا سویدی دبێژیت گەفا کریارەکا تیرۆرستی ل سەر سوید یا ھەی ووان رادەیا بەرھەڤیا ڤێ گەفێ بۆ پلە چار ژ سەرجەمێ پێنج پلان.
ئەندریاس سورنبرگ، سەرۆکێ ھەوالگیریا سوید د کۆنگرەکێ رۆژنامەڤانی دا ل ستوکھولم ل رۆژا 18 ڤێ مەھێ گوت” ھەوالگیریا سویدی پێزانین یێن ھەین کو گەف یێن ھەین بۆ ئەنجامدانا کریارەکا تیرۆرستی یا وەکو ل پاریس ھاتیە ئەنجامدان و دبیت ھندەک جە و ئارمانجێن ستراتیژی ل سویدێ ببنە ئارمانج وان کریارێن تیرۆرستی و ئاشکراکر ژی کو وان کەسەکێ گومانلێکری ژی یێ دەستەسەرکری”.
دیارکر ژی” چو پەیوەندی د ناڤبەرا کەسێ ھاتیە دەستەسەرکرن و ئەنجامدەرێن ھێرشێن تیرۆرستی ل پاریس نینە، بەلێ ئەندامێن تۆرەکا تیرۆرستی ل ئاخا سوید دژین و ھەوالگیریا سویدی کار دکەت ژ بۆ دووڤچوون و دەستەسەرکرنا وان”.
شارەزایێ کاروبارێن تیرۆرێ (ماگنوس رانستوب) د داخویانیەکێ دا بۆ تەلەڤزیونا فەرمی یا سویدی ( SVT) گوت”گەفەکا مەزن یا ل سەر سوید ھەی ژلایێ لایەنگر یان ئەندامێن رێکخستیا دەولەتا ئیسلامی (داعش) ڤە و سوید ئارمانجەەکا پێشبینی کریە و راپۆرت ژی یێن ھەین کو ئاماژێ ددەنە شیانێن ڤێ رێکخستیا تیرۆرستی کو ھێرشێن ھەڤشێوێ ھێرشێن پاریس ئەنجام بدەن”.
پۆلیسێن سوید ژی ھەبوونا خوە ل پایتەختی (ستوکھولم) زێدەکریە کو بەری نوکە چو ھەبوونا ب وی شێوەی یا پۆلیسان ل سەنتەرێ باژێری و دەوروبەرێن پەرلەمانی و بالیۆزخانان و دەزگەھێن حوکمەتێ نەبوو”.
