پێزانين ل سه‌ر مووچێ فه‌رمانبه‌ران يێ هه‌يڤا ته‌باخێ
ئه‌ڤرۆ نيوز:
هه‌ر چه‌نده حوكمه‌تا هه‌رێما كوردستانێ راگه‌هاند بوو كو ئێدى مووچه ب ره‌نگه‌كێ هه‌يڤانه دێ د ژڤانێ خوه دا هێته دابينكرن، لێ هه‌يڤه‌ك بۆرى و هێشتا ب تنێ دو سێ وه‌زاره‌تان مووچێ هه‌يڤا ته‌باخێ وه‌رگرتيه و ژڤانێ يێن دژى ديار نينه.
ژێده‌ره‌كێ ئاگه‌هدار ل وه‌زاره‌تا دارايى و ئابوورى بۆ “خه‌لك” راگه‌هاند كو نوكه پارێ پێدڤى بۆ مووچێ فه‌رمانبه‌رێن هه‌رێما كوردستانێ نه‌گه‌هشتيه وه‌زاره‌تا دارايى و ژ به‌ر هندێ ژى دشيان دا نينه مووچێ فه‌رمانبه‌ران بهێته مه‌زاختن.
ژێده‌رێ نه‌ڤياى ناڤێ خوه ئاشكه‌را بكه‌ت به‌حس ل وێ چه‌ندێ ژى كريه كو بڕيار بوو هه‌يڤانه 850 مليۆن دۆلاران ژ كۆمپانيا “فيتل” وه‌ربگريت و وه‌كو مووچه بهێته به‌لاڤكرن، بۆ وێ چه‌ندێ كێشا پاشكه‌فتنا زێده‌تر يا مووچه‌ى نه‌مينيت، به‌لێ هه‌تا نوكه ئه‌و پاره وه‌رنه‌گرتيه.
به‌رى نوكه ئاشتى هه‌ورامى وه‌زيرێ سامانێن سرۆشتى راگه‌هاند بوو به‌رامبه‌ر هنارتنا 600 هزار به‌رميلێن په‌ترۆلێ هه‌يڤانه، كۆمپانيا “فيتل” كۆژمێ 850 مليۆن دۆلاران بده‌ته حوكمه‌تا هه‌رێمێ و ب وێ چه‌ندێ ژى هه‌يڤانه دشيان دايه مووچێ هه‌يڤانه د ده‌مێ خوه بهێته به‌لاڤكرن.
ئه‌وى ژێده‌رى ئه‌و ئێك ژى ئاشكه‌را كر كو د ڤى ماوه‌ى دا چاڤه‌رێ وه‌زاره‌تا سامانێن سرۆشتى دكه‌ن بۆ وه‌رگرتنا پارێ پێدڤى و ناهێته زانين كه‌نگى دێ وێ پشكا پاره‌ى وه‌رگرن هه‌تا مووچه‌ى به‌لاڤ كه‌ن.