ھەڤپەیمانان باوەری ب شەڕێ عیراقێ دژی داعشێ نەمایە
ئەڤرۆ نیوز:
فەرماندەکێ ھێزێن پێشمەرگەی راگەھاند، داخویانیێن ڤێ دووماھیێ یێن سەرۆک وەزیرێن بریتانیا ل دۆر رۆلێ پێشمەرگەی ددلخوەشکەرن بۆ مە و دخوازین ئەو داخویانی یە د رژدبن و پتر ھاریکاریا پێشمەرگەی د شەڕێ دژی داعشێ دا بھێتە کرن.
سەرۆک وەزیرێن بریتانیا (دیڤید کامیرۆن) د داخویانیەکێ دا گوتبوو” پێشمەرگە تاکە ھێزە ل عیراقێ کو پشتبەستنێ پێ دکەین و ب ھێزێن خوە دزانین.
عارف تەیفور ئێک ژ فەرماندێن پێشمەرگەی و جێگرێ بەری یێ سەرۆکێ پەرلەمانێ عیراقێ بۆ مالپەرێ پارتی گوت” دخوازین ئێدی وەلاتێن ھەڤپەیمان ب ڕێیا عیراقێ ھاریکاریا پێشمەرگەی نەکەن، بەلکو پێدڤیە راستەوخوە ھاریکاری بۆ پێشمەرگەی بھێنە پێشکەشکرن، چونکی پێشمەرگە تاکە ھێزە ل ھەموو جیھانێ روو ب روویا داعشێ بووی و د ھەموو شەڕان دا ژی سەرکەفتن یا بدەستڤەئینای”.
تەیفووری گوت ژی” ئەگەرێ باوەریا زێدە ب پێشمەرگەی، بۆ وێ چەندێ دزڤریت کو وان وەلاتان گەلەک باوەری ب عیراقیان نەمایە کو بشێن شەڕی دژی داعشێ بکەن ژ ئەگەرێ ناکۆکیێن د ناڤبەرا سونە و شیعان دا، لەوما ئەو وەلاتە یێن بێ ئومێد بووین و بزاڤا نێزیکبوونێ ژ پێشمەرگەی دکەن، ھەرچەندە نوکە پێشمەرگە پشکەکە ژ ھەڤپەیمانان، بەلێ ھەکە ببیتە فەرمی، وی دەمی مفا دێ گەلەک زێدەتر بیت”.
خویاکر ژی” لایەنێن عیراقی د دلگرانن ژوان داخویانیێن (کامیرۆن )ی و دبێژن ئەڤە دەستێوەردانە د کاروبارێن عیراقێ دا، بەلێ ئەوا ئەو دبێژن راست نینە، چونکی عیراق نەمایە ھەتاکو ب دەستێوەردان بھێتە ھژمارتن و عیراق نوکە یا بوویە سێ پارچە، پارچەک ددەستێ داعشێ دایە و پارچەک ددەستێ شیعان دایە و پارچا سیێ یا ددەستێ کوردان دا”.
ب دیتنا ڤی فەرماندێ پێشمەرگەی” ئەو پشتەڤانیا مەزن مفایێ کوردان تێدایە، چونکی بزاڤێن مە بۆ دروستکرنا دەولەتا کوردی یە، ئەڤ چەندە ژی دێ بیتە پالدەرەک بۆ وێ چەندێ کو بشێن ددەمەکێ نێزیک دا و بێ کێشە، دەولەتا کوردی ڕابگەھینین”.