رەوشا نوکە یا باژێرێ مووسل
ئەڤرۆ نیوز، بارزان مزووری:
عسمت رەجەب، بەرپرسێ لقا 14 يا پارتى ديموكراتى كوردستان ل مووسل بۆ ئەڤرۆ نیوز ئاشکرا کر کو دوھی 6ى كانوونا دويێ 2015 چەکدارێن تیرورستێن داعش دەست ب گرتنا پۆلیسا کریە ئەوێن سەر ب پولیسێن مووسل ڤە و بۆ جھەکێ نەدیار ڤەدگوھێزن.
ئاشكه‌را ژى كر كو ب سەدان ئەفسەرێن پلە بلند د ناڤ وان دا هه‌نه يێن وه‌كو لیوا تەیار ئەحمەد محەمەد عوبێدی و هەتا نھا چارەنڤیسێ وان یێ بەرزەیە.
به‌رپرسێ لقا پارتى ئاماژه ب وێ چه‌ندێ كر كو ژمارا دروست ل به‌ر ده‌ستێ وان نينه، به‌لێ دهێته پێشبينيكرن زێده‌ترى 400 كه‌سان ره‌ڤاند بن، “هێشتا ده‌نگويێ كوشتنا چو كه‌س ژ ڤان نه‌هاتيه زانين”.
زێده‌تر گۆت: “سپێده‌هيا ئه‌ڤرۆ و به‌رى چه‌ند ده‌مژمێره‌كێن كێم كوشتنا سێ كه‌سێن گه‌نج ژ لايێ چه‌كدارێن داعش ڤه د ناڤ باژێرێ مووسل دا هاته راگه‌هاندن كو ل به‌ر چاڤێن خه‌لكێ مووسل هاتنه گوله‌بارانكرن ب به‌هانه‌يا گه‌هاندنا پێزانينان ب هێزێن ئێمناهيێ ل ژ ده‌رڤه‌ى مووسل”.
عسمه‌ت ره‌جه‌ب ته‌كست ل سه‌ر وێ ئێكێ ژى كر كو ئێك ژ نه‌خۆشخانێن مه‌زن يێن داعش ل مووسل دورپێج كريه ژ به‌ر كو ژماره‌كا سه‌ركردێن وان د ناڤ دانه و هاتنوچوون ب تنێ بۆ چه‌كدارێن وان يا هه‌ى.
ژ لايه‌كێ دى ڤه دا زانين كو ئه‌ڤه حه‌فتيه‌كه تاخێ ته‌يران ژى دوورپێج كرى ژ به‌ر كو چه‌ند چه‌كدارێن نه‌نياس يێن دژى چه‌كدارێن داعش شه‌رى دكه‌ن چووينه سه‌ر مالا سه‌ركرده‌كێ وان و چه‌كدارێن وان يێ به‌رنياس “ئه‌حمه‌د شامى” يێ ره‌گه‌ز سورى ب چه‌كێ بێ ده‌نگ ل گه‌ل دو زێره‌ڤانێن وى كوشتينه.
ل دووماهيێ ژى گۆت: “چه‌كدارێن داعش د ناڤ باژێرێ مووسل دا له‌زگه ل ديوارێن جهێن گرنگ و هه‌ولاويستنا ئاگه‌هداريان داينه و ل سه‌ر نڤيسيه كو هه‌ر كه‌سێ پاره‌ك هه‌بيت دڤێت بگه‌هينيته وان ژ به‌ر كو ئه‌و يێ پاره‌كێ نوو يێ كانزايى دروست دكه‌ت و دێ ل ناڤ مووسل هێته به‌لاڤكرن و سه‌ره‌ده‌رى ل گه‌ل پارێ دى ناهێته كرن”.