ئه‌ڤرۆ دێ پێشانگه‌هه‌كا هونه‌ري بۆ زارۆيێن ئاواره هێته ڤه‌كرن
به‌رپرسێ هوبا چالاكيێن قوتابخانا ديار كر كو په‌روه‌ردا دهۆك يا رۆژهه‌لات به‌رده‌وام رادبيت ب ئه‌نجامدانا كار و چالاكيێن جۆراوجۆر بۆ زارۆيێن ئاواره، كو ب هه‌ماهه‌نگي د ناڤبه‌را مامۆستايێن هونه‌ري يێن قوتابخانا دگه‌ل پشكا چالاكيا دهێنه كرن.
بێوار ته‌حسين به‌رپرسێ هوبا چالاكيێن قوتابخانا بۆ رۆژناما ئه‌ڤرۆ ديار كر كو دبه‌رده‌وامن ل سه‌ر ئه‌نجامدانا چالاكيێن هونه‌ري وه‌كو شێوه‌كاري و شانۆ و كرنا ياريا بۆ زارۆيێن ئاواره ل سنوورێن قوتابخانێن په‌روه‌ردا رۆژهه‌لات و گۆت “ئه‌ڤرۆ ل ده‌مێ سپێدێ ل هنده‌ك قوتابخانا دێ هێنه كرن و هنده‌كێن دي ل ده‌مي ئێڤاري دێ ل وان قوتابخانا هێنه كرن ئه‌وێن ماموستايين هونه‌ري هه‌ماهه‌نگيێ دگه‌ل مه دكه‌ن”.
هه‌روه‌سا به‌رپرسێ هوبا چالاكيێن قوتابخانا گۆت “ئه‌ڤ جۆره چالاكيه دێ دبه‌رده‌وام بن هه‌تا ڤه‌بوونا ده‌رگه‌هێن قوتابخانا بۆ سالا خواندنێ يا نوو، هه‌ر ديسا پشتي ڤه‌بوونا قوتابخانا ژي دێ هه‌ر دبه‌رده‌وام بين ل سه‌ر ڤان چالاكيان، چونكي ئه‌م چ جياوازيه‌كێ نا ئێخينه د ناڤبه‌را زارۆيێن ئاواره و زارۆيێن دي دا”.
