بانكا جیهانى دێ هاریكاریا حوكمه‌تا هه‌رێمێ كه‌ت
ئه‌ڤرۆ نيوز:
سه‌رۆك بارزانى دوهى ل هه‌ولێرێ پێشوازیا بان كى مون سكرتێرێ گشتى یێ رێكخراوا نه‌ته‌وێن یه‌كگرتى و شانده‌كێ ل گه‌لدا كر كو پێكهاتبوون ژ سه‌رۆكێ بانكا جیهانى و سه‌رۆكێ بانكا گه‌شه‌پێدانا ئیسلامى و چه‌ند راوێژكار و به‌رپرسێن نه‌ته‌وێن یه‌كگرتى، ئه‌حمه‌د عه‌لى سه‌رۆكێ بانكا گه‌شه‌پێدانا ئیسلامى راگه‌هاند” ئه‌و بۆ وێ یه‌كێ یێن هاتین كو ل گه‌ل بانكا جیهانى هاریكاریا حوكمه‌تا هه‌رێما كوردستانێ بكه‌ن د سه‌رخستنا چاكسازى و هاریكاریكرنا ئاواران ، هه‌روه‌سا هه‌ڤكاریكرن بۆ ڤه‌گه‌راندنا ژیانێ بۆ ده‌ڤه‌رێن ئازادكرى”.
بان كى مون خوشحالیا خوه ب دیدارا سه‌رۆك بارزانى راگه‌هاند و راگه‌هاند” بۆ نیشادانا پیشته‌ڤانی و هه‌ڤسوزیێ بۆ گه‌لێ كورد ئه‌م یێن هاتینه هه‌رێمێ”.
بان كى مون ئاماژه ب وێ یه‌كێ كر ژى كو جیهان ئاگادارى وان ته‌حه‌دیاتانه یێن كو روو ب روو هه‌رێمێ بووین و راگه‌هاند” سه‌ركه‌فتنا هه‌وه د شه‌رێ تیرورێ دا و د ره‌وشه‌كا دژوارا ئابوورى دا جهێ حێبه‌تیا هه‌موو جیهانێ یه”.
ژ ئالیێ خوه‌ڤه، سه‌رۆك بارزانى به‌حسێ قوربانیدانێن گه‌لێ كوردستانێ كر د شه‌رێ دژى تیرورستان دا و ئاماژه دا وێ چه‌ندێ كو سه‌ره‌راى شه‌ره‌كێ گران، كوردستان روو ب روو ته‌حه‌دیا قه‌یرانا دارایى یێ بووى و ب سه‌دان هزار ئاواره‌ژى یێن حه‌واندین و سه‌ره‌راى ئاماژه‌دان ب ئه‌گه‌رێن دروستبوونا قه‌یرانان، ئه‌و چه‌نده‌ژى راگه‌هاند كو هه‌تانوكه ژ ئالیێ دارایى ڤه چ لایه‌نه‌كى هاریكاریا كوردستانێ نه‌كریه و حوكمه‌تا عیراقێ ژى كار ب پابه‌ندبوونا خوه نه‌كریه د هاریكاریكرنا هه‌رێمێ بۆ ڤه‌حه‌واندنا ئاواران.
