ستێر دێ بۆ نەخۆشخانێن ئەھلی ھێنەدانان
سەرپەرشتیارێ پشکنین و پێداچوونێ ل وەزارەتا ساخلەمیێ ل دۆر نەخۆشخانێن ئەھلی دیار کر، دوڤچوون ل سەر ھەر نوشدارەکێ ل دەرڤە بھێتە کوردستانێ دھێـتەکرن کا نوشدارە یان نە، دیسا نەخۆشخان و سەنتەرێن ئەھلی شیاینە خەلکی ژ باشور و ناڤەراستا عیراقێ و ھەتا وەلاتێ ئیرانێ ژی بیننە کوردستانێ، ئاشکرا کر ژی کر کو نەخۆشخانە و سەنتەرێن ئەھلی ھەنە بێ موولەت کاردکەن.
ئەڤرۆ، سالار دوسکی:
د. ئارام روستەم عەبدوللا شیرەتکارێ وەزیرێ ساخلەمیێ و سەرپەرشتیارێ پشکنین و پێداچوونێ ل وەزارەتا ساخلەمیێ بۆ رۆژناما ئەڤرۆ دیار کر، ھەتا نوکە نێزیکی ٦٠ نەخۆشخان ل گەل سەنتەرێن ئەھلی ھەرێما کوردستانێ ھەنە و ھەنە یێن ھەرێمێ نە و ھەنە خەلکێ دەرڤەیی ھەرێما کوردستانێ سەرپەشتیێ ل سەر دکەن، ھندەکان موولەت ھەنە و ھندەکان ژی موولەت نینە و ئەو ژی ژبەر نەبوونا مەرجێن ساخلەمیێ تێدا دەرفەت بۆ نەھاتیە روخساندن موولەتا خوە نوو بکەن و ھەتا مەرجێن ساخلەمیێ ب جھبینن، بەردەوام دوڤچوون ل سەر نەخوشخانا و سەنتەر و کارێ وان دھێتەکرن و ھەر سەرپێچیەکا ھەبیت دھێنە سزادان و ھاتینە داخستن ژی.
ناڤبری زێدەتر گۆت: پشکا سکالا ھەیە و ھەر وەلاتیەکێ گازندە ژ نەخوشخان یان سەرنتەرێن ئەھلی ھەبیت دشێت سکالایەکێ تۆمار بکەت و وەزارەت دێ دووڤچوونێ ل سەر کەت و کێشە دێ ھێتە چارەسەرکرن، د ھەمان دەم دا شیرەتکارێ وەزیرێ ساخلەمیێ دیارکر ژی کو ھەبوونا نەخۆشخانە و سەنتەرێن ساخلەمیێ بارسڤکیەک د کارێن حوکمەتێ دا کریە.
د. ئارام روستەم دبێژیت: ھەبووینە د ھەلسنگاندنا وەزارەتا ساخلەمیێ و خواندنا بلند دا دەرنەچووینە و مە نەھێلایە کار بکەت، دیسا ل دووڤ مەرجێن ڤەکرنا نەخۆشخانا ئەھلی نابیت ٣٠% زێدەتر نوشدارێن بیانی بن و دڤێت دەلیڤە بۆ نوشدارێن کوردستانێ پتر ھەبیت رۆلێ خوە بگێرن، ئەڤە نە ب تنێ بۆ نوشداران، ھەر کارمەندەکێ گرێدایی کەرتێ ساخلەمیێ بیت دڤێت مولەتا سەندیکا کارمەندێن ساخلەمیێ ھەبیت و بێ موولەت نەشێت کاربکەت، ڤەکرنا نەخۆشخانێن ئەھلی د دەستێن رێڤەبەرێن گشتیێن ساخلەمیێ دایە و ئەو دزانن کا پێدڤی ب چەندا ھەنە و دەستھەلاتێن دانا مۆلەتێن نەخۆشخانا د دەستێ وەزارەتا ساخلەمیێ دانە، ئەڤە پشتی دووڤچوون و لیژنە کارێ خوە د ھەلسنگینن.
پتریا سەنتەر و نەخۆشخانێن تایبەت د بیاڤێن جودا دا ھەرێما کوردستانێ ھەنە، لێ ھەتا نوکە ھندەک سەنتەر ھەنە و پێدڤیە بھێنە زێدەکرن و خەلکی پێدڤی پێ ھەیە، ھەمبەر بھایێ نشتەگەریان ل نەخۆشخانە و سەنتەرێن ئەھلی یێن تایبەت، شیرەتکارێ وەزیرێ ساخلەمیێ، دانپێدان کر و گۆت” جوداھی ھەیە د بوھایێ نشتەگەریان و چارەسەرکرنا نەخوشان دا ل سەرنتەر و نەخوشخانێن ئەھلی، وەزارەتا ساخلەمیێ دێ دووڤچوونێ ل سەر بابەتی کەت”.
شیرەتکارێ وەزیرێ ساخلەمیێ گۆت ژی: کارێ ل سەر قانوونەکێ دھێـتەکرن کو نەخۆشخانا ستێر ھەبن و پلە و ھەتا نوکە نەکەڤیتە د بیاڤێ بجھئینانێ دا و بزاڤێن دھێنەکرن سەرێ سالا نوو بھایێ ھەموو نەخوشخانا بھێتە رێکخستن و دیسا کار ل سەر پلە و ستێرێن نەخوشخانە و سەنتەرێن ئەھلی بھێـتەکرن و بھێتە بجھئینان.
شیرەتکارێ وەزیرێ ساخلەمیێ گۆت ژی: نەخۆشخانە و سەنتەرێن ئەھلی ل ھەرێما کوردستانێ شیاینە گەلەک خەلکێ بیانی ژ ناڤەراست و باشورێ عیراقێ و دیسا وەلاتێ ئیرانێ ژی بینە کوردستانێ و قەستا ڤان نەخۆشخانان بکەن و ئەڤە ژی بوویە ئابوورەک بۆ ھەرێما کوردستانێ کو خەلک ل دەرڤە بھێتە ناڤ ھەرێما کوردستانێ، دیسا پتریا نەخۆشخانێن ئەھلی ل ھەولێرن، چونکە پایتەختە و پتر خەلک تێدا ھەیە و دیسا پتر خەلکێ دەرڤە قەستا ڤی باژێری دکەت.
د. ئارام دیارکر ژی کو خودانێن نەخۆشخانە و سەنتەران نوکە مژوولی دانانا کۆمەلەکێ نە ب ناڤێ کومەلا نەخۆشخان و سەنتەرێن ئەھلی ل ھەرێما کوردستانێ و مژوولن و پرۆژە ل پەرلەمانێ کوردستانێ یە بۆ رازیبوونێ ل سەر بابەتی .
ل دووماھیێ ژی شیرەتکارێ وەزیرێ ساخلەمیێ ژ خەلکێ کوردستانێ خواست پتر قەستا نەخۆشخانێن حکوومی بکەن و ھەموو پێدڤی و خزمەت و نشتەرگەری بۆ دھێنەکرن و بێ بەرامبەر، بۆچی دێ پارێ خوە ل نەخۆشخانەکا ئەھلی مەزێخیت، چونکە ئامیرێن نەخوشخانێن حکوومی ھەین، گەلەک باشترن ژ ئامیرێن نەخۆشخانێن ئەھلی.