غه‌ریب یوسف
به‌رى (32) سالان مینا ئه‌ڤرۆ دلێ مه‌زنێ پێشمه‌رگه‌ و ئه‌ندازیارێ ئاشتیێ شه‌هیدێ هه‌رده‌م ساخ (ئدریس بارزانى) ل وه‌لاتێ ئیرانێ ژ لێدانێ راوه‌ستیا و گه‌هشته‌ كاروانێ نه‌مران، ئه‌ز باوه‌رم كو مه‌ ب درێژاهیا دیرۆكێ چو كه‌س نه‌شێن ب دروستى و وه‌كى وى جهێ وى بگرن، له‌ورا ژ ده‌ستدانا وى نه‌به‌س زیان گه‌هانده‌ مالا وى، یان پارتى دیمۆكراتى كوردستان، به‌لكو زیان گه‌هانده‌ هه‌موو كوردان و ل هه‌ر جهه‌كێ دونیایێ بن، له‌ورا دێ بێژم قه‌ره‌بووكرنا قه‌هره‌مانێن وه‌سا دێ گه‌له‌كا ب زه‌حمه‌ت بیت.
هه‌لبه‌ت نیاسینا من ل گه‌ل نه‌مر ئدریس بارزانى بۆ سالا (1964) دزڤریت، كو وى ده‌مى ئه‌ز پێشمه‌ر گه‌بووم ل باره‌گایێ مه‌كته‌با سیاسیا پارتى دیمۆكراتى كوردستان ل گۆندێ (دێرێ) ل ده‌ڤه‌را رانیا و ئێدى هه‌ڤنیاسین د ناڤبه‌را مه‌دا چێبوو، و هه‌تا رۆژا چوویه‌ وه‌غه‌رێ ئه‌ز ئێك ژ كه‌سێن نێزیكى وى بووم، و خوه‌ ب سه‌رفه‌راز دبینم بۆ ده‌مێ چه‌ند سالان ئه‌ز ل خزمه‌تا وى بووم، و هه‌تا مرنێ شانازیێ ب وێ چه‌ندێ دبه‌م كو ل سالانێن خۆش و نه‌خۆش ئه‌ز ل گه‌ل دا بووم، له‌ورا ب ڤێ هه‌لكه‌فتێ حه‌ز دكه‌م چه‌ند رێزه‌كا بۆ دیرۆكێ دیار بكه‌م، یا ئێكێ د وارێ دبلۆماسى دا، هندى بێژى شه‌هید ئدریس بارزانى دبلۆماتكاره‌كێ شاره‌زا بوو و په‌یوه‌ندیێن گه‌له‌ك باش ل گه‌ل سه‌رۆك و سه‌ركردێن گه‌له‌ك وه‌لاتان هه‌بوون و ده‌مێ دچوو ژده‌رڤه‌ یان شانده‌ك ژده‌رڤه‌ دهاته‌ ده‌ف گه‌له‌ك رێز لێ دگرتن و هزره‌كا مه‌زن بۆ دكرن، هه‌روه‌سا د وارێ ب رێڤه‌برنا كارۆبارێن پارتى دا گه‌له‌كێ زیره‌ك بوو، و گه‌له‌ك رۆژان ل گه‌ل سه‌رۆك مه‌سعود بارزانى ل باره‌گایێ مه‌كته‌با سیاسى پێكڤه‌ دروونشتن و پێشوازیا شاند و مێهڤانان دكرن و ره‌فتارێن وى ل گه‌ل وان كه‌سێن دهاتنه‌ ده‌ف گه‌له‌ك دجوان بوون، ئانكو هه‌ر كه‌سه‌كێ دڤیا شیا ببینیت و هه‌رده‌م ده‌رگه‌هێ وى یێ ڤه‌كرى بوو و هه‌ر ئاریشه‌ك یان داخوازیه‌كا هه‌با دا چاره‌یه‌كى بۆ بینین و كه‌س بێ ئۆمێد نه‌دكر، هه‌روه‌سا مرۆڤه‌كێ زێده‌ رحه‌ت و ئارام و سه‌رخوه‌ بوو چو جاران تۆڕه‌ نه‌دبوو، ئانكو سنگێ وى هندێ چیایه‌كێ بۆ هه‌ر پرسیار و ره‌خنه‌كێ یێ ڤه‌كرى بوو.
بیرا من دهێت ل ئیلۆنا سالا (1981) شه‌هید ئدریس بارزانى ل گه‌ل پتر ژ (300) پێشمه‌رگه‌ى، كو ئه‌ز ژى ئێك ژوان بووم، ئه‌م هاتینه‌ ده‌ڤه‌را ده‌شتا به‌رازگر و مه‌ باره‌گایێ خوه‌ ل گوندێ (بێ كێڤرێ) دانا، كو وى ده‌مى هێزا بارزان ژى ل وێرێ بوو، مه‌ره‌م ژ وێ هاتنێ پاراستنا عه‌ردێ كوردستانێ وخه‌لكێ وێ بوو، له‌ورا ل هه‌یڤا یازده‌ ب چه‌كێ گران و سڤك مه‌ چه‌ندین شه‌ر ل گه‌ل له‌شكرێ عیراقێ یێ وى سه‌رده‌مى كرن، و ژبه‌ركو زیانه‌كا مه‌زن گه‌هشته‌ دوژمنى نه‌چار بوون داخوازا دانوستاندنێ ل گه‌ل شه‌هید ئدریس بارزانى بكه‌ن، له‌ورا چه‌ندین شاند هنارتن و هه‌تا بهارا سالا (1982) ئه‌م ماینه‌ ل وێرێ، هه‌روه‌سا تشته‌كێ دى دێ بۆ دیرۆكێ بێژم ئه‌و ژى ل سالا 1986 كۆنگرێ سه‌ركه‌فتنا گه‌لێ عیراقێ ل ته‌هرانا پایته‌ختێ ئیرانى هاته‌ گێڕان، ل وى ده‌مى شه‌هید ئدریس بارزانى ل گه‌ل خودێ ژێ رازى فه‌له‌كه‌دین كاكه‌یى و د. شه‌وكه‌ت بامه‌رنى ب ناڤێ پارتى ل وى كۆنگره‌ى به‌رهه‌ڤ ببوون و چه‌ندین په‌یڤ و گۆتار و ڤه‌كۆلین هاتنه‌ پێشكێشكرن، لێ كه‌سێ ژ وان به‌حسێ كوردان و ئه‌و زولما ژ لایێ رژێمێن ئێك ل دووڤ ئێكێن عیراقێ ل گه‌ل هاتیه‌كرن نه‌كرن، له‌ورا شه‌هید ئدریس رابوو و گۆته‌ وان هه‌وه‌ مافێ ملله‌تێ كورد خار، چونكو گه‌له‌ك نه‌خۆشى و ده‌رده‌سه‌رى ژ لایێ رژیمێ ڤه‌ دیتینه‌، ئه‌ڤجا لژنا بلندا وى گۆنگره‌ى بریاردان رۆژه‌كا دى ل سه‌ر كۆنگره‌ى زێده‌كه‌ن و د وێ رۆژێ دا شه‌هید ئدریس ب دوور و درێژى به‌حسێ دۆزا كوردى و ئه‌و كاره‌سات و نه‌خۆشیێن ب درێژاهیا دیرۆكێ ب سه‌رێ ملله‌تێ كورد هاتین به‌حسكرن و ئێدى هه‌تا رۆژا وه‌غه‌رێ ئه‌م ماینه‌ ل خزمه‌تا وى و شانازیێ ب وى ژى دبه‌م یێ كو من ل گه‌ل ئدریسێ جانه‌مه‌رگ بۆراندى، هه‌رده‌م خوه‌ ب قوتابیێ وێ قوتابخانێ دزانم كو ئه‌و ژى قوتابخانا كوردایه‌تیێ یه‌ ئه‌وا بابێ وى مه‌لا مسته‌فا بارزانى بوومه‌ داناى دبه‌م، و سۆزێ دده‌م هه‌تا دووماهیا چركا ژیانا خوه‌ هه‌ر قوتابیێ وێ رێبازى بم.

غه‌ریب یوسف
ل به‌ره‌ ل ئێكشه‌مبا بهێت (30) ئیلۆنێ، جاره‌كا دى ئه‌م خه‌لكێ كوردستانێ بچینه‌ بنگه‌هێن ده‌نگدانێ و نوونه‌رێن خوه‌ بۆ خولا نوو یا په‌رله‌مانێ كوردستانێ ب هه‌لبژێرین، و تشتێ هه‌ره‌ خۆش ئه‌وه‌ پتریا خه‌لكێ مه‌ دزانن دێ ده‌نگى ده‌نه‌ كیژ لیستێ و هه‌ر وه‌كى دهێته‌ پێشبینى كرن لیستا (183) یا پارتى دیموكراتى كوردستانێ وه‌كو هه‌موو جارێن دى دێ لیستا ئێكێ و یا بێ هه‌ڤرك بیت، چونكو پتریا خه‌لكێ كوردستانێ حنێرا وێ لیستێ دزان و باوه‌ریا ب وێ چه‌ندێ هه‌ى به‌ربرژارێن پارتى به‌رنامه‌كێ تێر و ته‌سه‌ل بۆ خزمه‌تكرنا هه‌موو خه‌لكێ كوردستانێ بێى فه‌رق و جوداى دانایه‌ و دێ ب هه‌موو شیانێن خوه‌ ڤه‌ كارى بۆ سه‌رخستنا به‌رنامێ لیستا خوه‌ یا هژمار (183) كه‌ن، و سۆزێن خوه‌ كه‌نه‌ كریار و بجه ئینن، له‌ورا یا فه‌ره‌ ئه‌م لیستا شه‌هیدان، لیستا ئه‌مبراز شكێنان ژبیرنه‌كه‌ین و ل رۆژا ده‌نگدانێ ب كه‌رنه‌ڤال بچینه‌ بنگه‌هێن ده‌نگدانێ و بێژین به‌لێ بۆ لیستا ( 183) چونكو هه‌كه‌ ئه‌م پیچه‌ك هزرێن خوه‌ بكه‌ین به‌رى كێمتر ژ ساله‌كێ له‌شكرێ عیراقێ ب هه‌ڤكاریا حه‌شدا شه‌عبى و وه‌لاته‌كێ جیران بزاڤا ژناڤبرنا كوردستانێ كرن و هێزێن خوه‌ ب چه‌كێ گران ڤه‌ ژوانا تانكێن ئه‌مبرامز یێن ئه‌مریكى، كو ئه‌مریكا بۆ ژناڤبرنا شه‌رێ داعش دابوونه‌ عیراقێ ژبۆ هێرشان ل سنۆرێن كوردستانێ كۆمكرن و مه‌ره‌مێن خراب پێ هه‌بوون، ئه‌و ژى داگیركرنا هه‌رێما كورستانێ بوو و هنده‌ك لایه‌نێن كوردى ژى رێ بۆ خۆش دكرن، لێ پێشمه‌رگێن پارتى ب قه‌هره‌مانه‌ لێ هاتنه‌ ده‌ست و دربێن مه‌زن لێ دان هه‌تا گه‌هشتیه‌ وى راده‌ى ب ره‌ڤا خوه‌ را نه‌گه‌هشتن و هژماره‌كا كوشتى و برینداران ل گه‌ل كۆمه‌كا چه‌كێ گران و سڤك ل جهێ خوه‌ هێلان سه‌رتیرا وان ب به‌رى كه‌فت، و تشتێ ژوێ مه‌زنتر و خۆشتر ئه‌و بوو كو پێشمه‌رگێ قه‌هره‌مان شیان تانكه‌كا ئه‌مبرامز تێك بشكێنن و ئه‌ڤ چه‌نده‌ د هزرا عیراقێ هه‌تا ئه‌مریكا ژى دا نه‌بوو كو پێشمه‌رگه‌ ب چه‌كه‌كێ سڤك بشێن وێ ئه‌مبرامبزێ بشكێنن، چونكو وان هزرێن مه‌زن بۆ وى جۆرێ چه‌كى دكرن، لێ ئیرادا مه‌زنا پێشمه‌رگه‌ى وه‌كر ئه‌و چه‌كێ گران بهێته‌ تێك شكاندن، له‌ورا ب هه‌موو بیرو باوه‌رێن خوه‌ ڤه‌ دێ بێژم ده‌نگێ من بۆ لیستا ئه‌مبرامز شكێنایه‌ و دخوازم هه‌موو خه‌لكێ دلسۆز ده‌نگى بده‌نه‌ ڤێ لیستێ چونكو بتنێ ئه‌و دێ گره‌نتیا كوردستانه‌كا بهێز كه‌ت و دێ به‌رده‌وامیێ ده‌ته‌ به‌رنامێ سه‌ربه‌خوه‌یا كوردستانێ.

غه‌ریب یوسف

سالانه‌ د ڤێ هه‌یڤێ دا رۆژه‌كا پیرۆز دهێته‌ بیرا مه‌، ئه‌و ژى رۆژا (11) ئیلۆنێ یه‌، رۆژا ده‌ستپێكرنا شۆڕه‌شا مه‌زن و نه‌ته‌وى كو ل سالا 1961 ب رێبه‌یا نه‌مر مه‌لا مسته‌فاى هاتبوو ئه‌نجامدان و هندى كورد ماینه‌ ب تایبه‌ت ژى پێشمه‌رگێن پشكدارى د وێ شۆڕه‌شێ دا كرین چو جاران وێ رۆژێ ژبیرناكه‌ن، چونكو شۆڕه‌شا ئیلۆنێ ده‌نگڤه‌دانه‌كا باش و كێم وێنه‌ ل سه‌ر ئاستێ جیهانێ ب ده‌ستڤه‌ئینا و بوو ئه‌گه‌ر كو ملله‌تێ كورد هه‌رده‌م شانازیێ پێ ببه‌ن، له‌ورا  نه‌گه‌له‌كا ب ساناهى یه‌ ئه‌ڤرۆ د چه‌ند رێزه‌كا دا ئه‌م به‌حسێ مه‌زنیا شۆڕه‌شا ئیلۆنێ بكه‌ین، چونكو چو نڤیسین و ڤه‌كۆلین نه‌شێن ب دروستى مافێ وێ بده‌نێ، له‌ورا دێ بێژم به‌رپاكرنا وێ شۆڕه‌شێ پێدڤیه‌كا دیرۆكى بوو، له‌ورا مه‌لا مسته‌فایێ نه‌مر ب وێ شۆڕه‌شێ رابوو، و به‌رى ده‌سپێكرنا وێ پلانه‌كا باش بوو هاته‌ دان و مه‌لا مسته‌فا ب خوه‌ ل گه‌له‌ك گوند و ده‌ڤه‌رێن كوردستانێ گه‌ڕیا و هه‌ر جهه‌كێ گه‌هشتبایێ دا ل گه‌ل ریهسپى و ماقوول هه‌روه‌سا پێشمه‌رگێن وێ ده‌ڤه‌رێ كۆم بیت و د دگۆته‌ وان ئه‌م دێ ب شۆڕه‌شه‌كێ رابین كا هه‌تا چو راده‌ هوون دێ هاریكار و پشته‌ڤانێن مه‌بن و خۆشبه‌ختانه‌ ل هه‌موو جهان به‌رسڤ یا ئه‌رێنى بوو، و هه‌موویان پێكڤه‌ دگۆتن ئه‌م ب سه‌ر و مالێن خوه‌ بۆ شۆڕه‌شێ دبه‌رهه‌ڤین و ب تنێ ل هنده‌ك ده‌ڤه‌ران چه‌ند ئاغایه‌ك هه‌بوون خوه‌ نه‌دانه‌ ل گه‌ل ئه‌و ژى، چونكو وان ل وى ده‌مى هنده‌ك به‌رژه‌وه‌ندى ل گه‌ل رژێمێ هه‌بوون، و پشتى مه‌لا مسته‌فاى سه‌رده‌انێن خوه‌ ب دووماهى ئیناین ڤه‌گه‌ڕیا جهێ خوه‌ و ئێدى ب دروستى نه‌خشه‌ و پلان بۆ ده‌سپێكرنا شۆڕه‌شێ هاتنه‌ دانان و شه‌هیدێ قه‌هره‌مان ئه‌سعه‌د خۆشه‌ڤى بۆ سه‌په‌رشتێ ده‌ڤه‌را به‌هدینان و شه‌هیدێ قه‌هره‌مان عیسێ سووار بۆ سه‌په‌رشتێ ده‌ڤه‌را زاخۆ، شه‌هیدێ قه‌هره‌مان عه‌لى خه‌لیل بۆ دهۆكێ و شه‌هیدێ قه‌هره‌مان حسۆ قه‌هره‌مان بۆ ده‌ڤه‌را شێخان هاتنه‌ ده‌ستنیشانكرن و پشتى به‌رهه‌ڤى بۆ هاتینه‌ كرن ل رۆژا 11 ئیلۆنا 1961 ب چه‌كێ كێم ده‌ست ب شۆڕه‌شێ كر و چونكو پێشمه‌رگه‌ ل سه‌ر حه‌قیێ بوون د ده‌مه‌كێ كێم دا سه‌ركه‌فتنێن مه‌زن ب ده‌ست خوه‌ ڤه‌ ئینان و هژماره‌كا زۆرا ئه‌فسه‌ر و سۆپایێ عیراقێ هاتنه‌ كوشتن و هژماره‌ك ژى هاتنه‌ ئێخسیركرن، ل گه‌ل ب ده‌ستڤه‌ئینا هژماره‌كا زۆرا چه‌كێ سڤك و گران، و ئه‌ز دشێم بێژم ل وى ده‌مى شله‌ژانه‌ك كه‌فته‌ د ناڤ سۆپایێ عیراقێ دا و ئێدى نه‌شیان به‌رگریێ ژ خوه‌ بكه‌ن، له‌ورا ره‌ڤین كه‌فتێ و پرت و به‌لاڤ بوون، هه‌ر ل وى ده‌مى هژماره‌كا ئاژانسێن جیهانى سه‌ركه‌فتنێن پێشمه‌رگه‌ى ب گرنگى د كه‌نالێن خوه‌ دا به‌لاڤكرن، له‌ورا ئه‌ز دشێم بێژم د شۆڕه‌شا ئیلۆنێ وه‌رچه‌رخانه‌كا مه‌زن د دیرۆكا كوردان دا روودا و هندێ كورد مابن دێ شانازیێ پێ كه‌ن، هه‌روه‌سا دڤێت ژبیرنه‌كه‌ین ژى كو رۆلێ خه‌لكێ گوندان د پشته‌ڤانیكرنا شۆڕه‌شێ دا یێ به‌رچاڤ بوو، و هه‌ر ئێكى ل دووف شیانێن خوه‌ ئه‌وا ژ ده‌ستا دهات بۆ شۆڕه‌شێ دكر، بۆ نموونه‌ هنده‌ك شێره‌ ژن هه‌بوون به‌رده‌وام خوارن و نان بۆ پێشمه‌رگه‌ى به‌رهه‌ڤ دكرن و هه‌موویان پێكڤه‌ چو ته‌خسیرى نه‌دكرن، له‌ورا شۆڕه‌شێ سه‌ركه‌فتن ب ده‌ستڤه‌ئینا هه‌تا گه‌هشتیه‌ سه‌رهلدانێ و د ئه‌نجامدا په‌رله‌مان و حوكمه‌تا هه‌رێما كوردستانێ هاتنه‌ پێكئینان و ئێدى ره‌وشا كوردان به‌ر باشیێ ڤه‌ چوو و بریارا فدرالیێ هاته‌ دان، هه‌ر ژ ده‌ستكه‌فتنێن شۆڕه‌شێ بریار و ئه‌نجامدانا ریفراندۆما هه‌رێما كوردستانێ بوو كو ل 25 ئیلۆنا سالا بۆرى هاته‌ ئه‌نجامدان و پترى 92% ژ خه‌لكێ كوردستانێ ده‌نگێ خوه‌ بۆ به‌لێ بۆ سه‌رخوه‌بوونا كوردستانێ دان و هه‌كه‌ خیانه‌تا (16) ئوكتۆبه‌رێ نه‌با دا نوكه‌ ره‌وشا كوردستانێ گه‌له‌ك باشتر بیت، چونكو ده‌وله‌تبوون یا نێزیك بوو، له‌ورا هیڤیا من ئه‌وه‌ رۆژه‌ك بهێت ئه‌و كه‌سێن كه‌ركووك فرۆتین بهێنه‌ دادگه‌هكرن و ل دووڤ قانوونێ بگه‌هنه‌ سزایێ خوه‌.

غه‌ریب یوسف
هه‌ر چه‌نده‌ ئه‌ڤه‌ نێزیكى سێ هه‌یڤانه‌ هه‌لبژارتنێن په‌رله‌مانێ عیراقێ هاتینه‌كرن، لێ هه‌تا نوكه‌ نه‌یا دیاره‌ كا كه‌نگى دێ حوكمه‌تا نوو هێته‌ راگه‌هاندن و كیژ لایه‌ن یان كیژ كه‌س دێ پۆستێ سه‌رۆك وه‌زیرێن عیراقێ وه‌رگریت، هه‌روه‌سا سه‌رۆكێ عیراقێ و سه‌رۆكێ په‌رله‌مانى ژى ب هه‌مان شێوه‌ و ئه‌گه‌رێ ڤێ گیرۆبوونێ ژى هه‌بوونا ناكۆكیێن زۆره‌ د ناڤبه‌را لایه‌نێن شیعه‌ ب خوه‌ دا، هه‌روه‌سا د ناڤبه‌را شیعه‌ و سونان دا، كو ب درێژاهیا دیرۆكێ هه‌تا راده‌كى هه‌ڤركى و نه‌ڤیان د ناڤبه‌را وان دا هه‌بوویه‌، له‌ورا ئه‌ڤ ئه‌گه‌ره‌ و چه‌ندین ئه‌گه‌رێن دى هه‌نه‌ كو هه‌تا نوكه‌ حوكمه‌تا نوو یا عیراقێ نه‌هاتیه‌ پێكئینان و ژ ئه‌نجامێ وێ چه‌ندێ ڤالاهیه‌كا ئیمناهیێ هه‌روه‌سا یا خزمه‌تكاریان ل عیراقێ په‌یدابوویه‌ و ژ ڤه‌رێژا وێ چه‌ندێ خه‌لكێ عیراقێ تووشى بێ ئومێدى و بێ زاریێ بووینه‌، له‌ورا ل چه‌ند حه‌فتیێن بۆرى ل پتریا باژێرێن عیراقێ ب تایبه‌ت یێن باشور و ناڤه‌راست خه‌لكه‌كێ زۆر دارژیاینه‌ سه‌رجاده‌یان و ده‌ست ب خوه‌ نیشادانان كرینه‌ و داخوازێن وان یێن سه‌ره‌كى دابینكرنا ژیانه‌كا خۆش و ئاڤ و كاره‌بێ هه‌روه‌سا دامه‌زراندنانانه‌، زێده‌بارى وێ چه‌ندێ گڤاشتنێ ل سه‌ر ده‌ستهه‌لاتا عیراقێ دكه‌ن كو له‌زێ ل پێك ئینانا حوكمه‌تا عیراقێ بكه‌ن و ب دیتنا من ئه‌ڤ چه‌نده‌ دێ درێژتر لێ هێت، چونكو هه‌تا نوكه‌ ئه‌نجامێن هه‌لبژارتنان نه‌هاتیه‌ په‌سه‌ندكرن، هه‌روه‌سا هنده‌ك وه‌لاتێن جیران ژى كارتێكرنا خوه‌ ل سه‌ر هه‌لبژارتنا سه‌رۆك وه‌زیرێن داهاتى یێ عیراقێ هه‌یه‌ و هه‌تا هه‌موو نه‌هێنه‌ رازیكرن حوكمه‌تا نوو ناهێته‌ دانان، لێ دا بابه‌تێ خوه‌ درێژ نه‌كه‌ین پێدڤیه‌ ئه‌م به‌حسێ وێ چه‌ندێ بكه‌ین كا بۆ مه‌ كوردان چه‌ندا گرنگه‌ پشكداریێ د وێ حوكمه‌تێ دا بكه‌ین، چونكو عیراق هه‌موو دزانیت بێى پشكداریا كوردان كابینا نوو یا حوكمه‌تا عیراقێ ناهێته‌ پێك ئینان، و هه‌ر چه‌نده‌ به‌رى نوكه‌ سه‌ركردایه‌تیا كوردى ب تایبه‌ت ژى سه‌رۆك مسعود بارزانى و ل حه‌فتیا بۆرى نێَچرڤان بارزانى سه‌رۆكێ حوكمه‌تا هه‌رێما كوردستانێ ل به‌غدا د كۆمبوونه‌كێ دا ل گه‌ل عه‌بادى ئاشكرا كر كو كوردان ڤیتۆ ل سه‌ر چو كه‌سان نینه‌ ببیته‌ سه‌رۆك وه‌زیرێن بهێن یێ عیراقێ، لێ ب پشتراستیڤه‌ دێ بێژم بێى كوردان سه‌رۆك وه‌زیرێن بهێن یێ عیراقێ ناهێته‌ دانان، و سه‌رۆك بارزانى دێ رۆله‌كێ كاریگه‌ر د وێ چه‌ندێ دا هه‌بیت، هه‌روه‌سا بۆ وان دیاركرینه‌ كو كورد دێ پشته‌ڤانیێ ل وى كه‌سى كه‌ن یێن كو داخوازێن مه‌ بجه بینێن، ئه‌و ژى بجه ئینانا دستوورى و مادێ (140) و كێشا پێشمه‌رگه‌ى و میزانى و بۆدجا هه‌رێما كوردستانێ یه‌، كو ئه‌ڤه‌ هه‌موو د كارناما سه‌ركردایه‌تیا كوردستانێ دانه‌ و دڤێت ئه‌و په‌رله‌مانتارێن بۆ خولا نوو هاتینه‌ هه‌لبژاران ده‌مێ دچنه‌ به‌غدا شه‌ڕى بۆ وێ چه‌ندێ بكه‌ن، چونكو ب درێژاهیا سالێن بۆرى حوكمه‌تێن عیراقێ ب تنێ سۆزێن سه‌ركا غه‌زێ داینه‌ و ل ده‌مێ ته‌نگاڤیان كورد ب برایێن خوه‌ داناینه‌، لێ ده‌مێ به‌رپێن خوه‌ دبینن هه‌موو سۆزێن خوه‌ ژبیردكه‌ن و مرۆڤێن بێ وه‌فا ده‌ردچن.

غه‌ریب یوسف
ل دووڤ ژڤانێ بۆ هاتیه‌ دانان، ل به‌ره‌ ل شه‌مبیا بهێت رێكه‌فتى 12/5/2018 خه‌لكێ عیراقێ ب گشتى ب هه‌موو ئاین و نه‌ته‌وێن خوه‌ ڤه‌ به‌ربژارێن خوه‌ بۆ په‌رله‌مانێ عیراقێ ب هه‌لبَژێرن، و بێ گۆمانه‌ وان هه‌لبژاتنان گرنگیا خوه‌ هه‌یه‌ ب تایبه‌ت بۆمه‌ وه‌ك ملله‌تێ كورد كو پێدڤیه‌ ل وێ رۆژێ ئه‌م هه‌موو بچینه‌ ده‌نگدانێ و نوونه‌رێن خوه‌ هه‌لبژێرین، چونكو هه‌بوونا مه‌ كوردان ل به‌غدا ب تایبه‌ت دڤى ده‌مى دا گه‌له‌كا فه‌ره‌، ژبه‌ركو شه‌ره‌كێ مه‌زن ل پێشیا مه‌یه‌ ئه‌وژى شه‌ڕێ دستۆرى یه‌ و په‌رله‌مانته‌رێن مه‌ ل شوونا لولیا تڤه‌نگێ ئه‌ڤ جاره‌ دێ ب خامه‌ى به‌ره‌ڤانیێ ژ ده‌ستكه‌فتێن مه‌ كه‌ن و ئه‌و دێ بنه‌ پارێزڤانێن وان ده‌ستكه‌فتان، له‌ورا گه‌له‌كا گرنگه‌ ئه‌م ب هشیارى و هه‌ستیارى وێ لیستێ یان وان به‌ربژاران ب هه‌لبَژێرین كو بچنه‌ به‌غدا و ببنه‌ نوونه‌رێن راسته‌قینه‌یێن گه‌لێ كوردستانێ و ئه‌م هه‌موو باش دزانین تاكه‌ لیستا هیڤیێن مه‌ ل به‌غدا بجه بینیت لیستا (184) پارتى دیموكراتى كوردستانه‌ كو پتریا خه‌لكێ باوه‌ریه‌كا مه‌زن پێ هه‌یه‌ و بۆ هه‌موویان یا ئاشكرایه‌ كو بتنێ لیستا (184) دێ شێت گره‌نتیا ژیانا خه‌لكێ كوردستانێ كه‌ت و ناهێلیت پاشه‌رۆژا كوردستانێ و خه‌لكێ وێ بكه‌ڤیته‌ د ده‌ستێن وه‌لاتفرۆشان دا، چونكو وان حزب و لایه‌نێن بچووك هه‌ر دكه‌ڤندا یێ خوه‌ فرۆتى و هه‌كه‌ خودێ نه‌كه‌ت ئه‌و بچنه‌ به‌غدا ل وى ده‌مى دێ بێ شه‌رمانه‌ ده‌ستكه‌فتێن ڤى ملله‌تى و خوینا هزاره‌ها شه‌هیدان ژى فرۆشن، لێ من باوه‌ریه‌كا مه‌زنا هه‌ى خه‌لكێ كوردستانێ وان كه‌س و لایه‌نان باش دنیاسیت و دزانن ئه‌و وه‌لاتفرۆش دارده‌ستێن هنده‌ك وه‌لاتانه‌ و ب پارێ وان یێ بزاڤێ دكه‌ن ڤێ سه‌ربۆرا مه‌ به‌ر ب ئاقاره‌كێ نه‌دیار ببه‌ن، لێ ب پشته‌ڤانیا خه‌لكێ دلسۆزێ كوردستانێ ب تایبه‌ت ژى پێشمه‌رگه‌ و كادر و لایه‌نگرێن پارتى وه‌كو هه‌رجار دێ هه‌موو پلانێن وان پووچه‌ل كه‌ن و ناهێلن ئه‌و ب هزرێن خوه‌ یێن گه‌نى شاد ببن، هه‌روه‌سا خه‌لكێ مه‌ باش دزانیت ئه‌و حزبێن به‌رى سێ یان چار هه‌یڤان هاتینه‌ دانان نه‌شێن چو بۆ ڤى ملله‌تى بكه‌ن، چونكو د بنه‌ره‌تدا ئه‌و كه‌س دخاین و خۆفرۆشن و دامه‌زراندنا وان نه‌یا سروشتى یه‌، هه‌روه‌سا ئه‌و ب خوه‌ ژى باش دزانن چو جاران ئه‌و نه‌شێن هه‌ڤركیه‌كا وێ حزبێ بكه‌ن یا كو به‌رى (72) سالان ل سه‌ر ده‌ستێن رێبه‌ر و پێشه‌وا مه‌لا مسته‌فایێ بارزانى هاتیه‌ دانان، ئه‌و ژى پارتى دیوكراتى كوردستانه‌ كو ب درێژاهیا ژیێ وێ گه‌له‌ك كه‌س و حزب و لایه‌نان بزاڤ كرینه‌ كو ژناڤ كو پارتى و بنه‌مالا بارزان ژناڤ ببه‌ن لێ چو جاران نه‌شیاینه‌ و هه‌ر ئه‌و ب خوه‌ شه‌رمزار و فهێت بووینه‌ و هندى ئه‌و دساخ ژى بن نه‌شێن هه‌ڤركیا پارتى بكه‌ن، چونكو پارتى دیموكراتى كوردستانێ جهێ خوه‌ دناڤ دلێ هه‌ر كورده‌كى دا كریه‌ و هه‌ر دكه‌ڤندا هه‌تا نوكه‌ ل هه‌ر جهه‌كێ كورد لێ دژین شانازیێ ب پارتى دكه‌ن و هه‌موو باش دزانن هه‌كه‌ رۆژه‌كێ كورد بگه‌هنه‌ مافێن و خوه‌ ده‌وله‌تا كوردى بهێته‌ راگه‌هاندن بتنێ دێ ل سه‌ر ده‌ستێن پارتى و سه‌رۆك مه‌سعود بارزانى بیت و چو كه‌س ولایه‌نێن دى ئه‌و شیان نینن و هه‌تا دمرن نه‌شێن وێ چه‌ندێ بكه‌ن، له‌ورا ئه‌ڤرۆ نه‌ به‌س ل عیراقێ به‌لكو ل وه‌لاتێن عه‌ره‌بى و ئورۆپى و هه‌تا وه‌لاتێن زلهێزێن جیهانێ ژى هزه‌ركا مه‌زن بۆ پارتى و سه‌رۆك مه‌سعود بارزانى دهێته‌كرن، ئه‌و هه‌موو ژى دزانن هه‌كه‌ كورد بگه‌هنه‌ مافێن خوه‌ و ببنه‌ كیانه‌كێ سه‌ربه‌خوه‌ و خودان ده‌وله‌ت و ئالا بتنێ مه‌سعود بارزانى و پارتى دێ شێن ب وێ چه‌ندێ رابن، له‌ورا سه‌ركه‌فتنا لیستا (184) یا پارتى دیوكراتى كوردستان سه‌ركه‌فتنا هه‌موو كوردانه‌ و ئه‌ز پێشبینى دكه‌م پترى 80% ژ خه‌لكێ كوردستانێ دێ ده‌نگى ده‌نه‌ لیستا (184). له‌ورا ئه‌ز وه‌ك پێشمه‌رگه‌ بتنێ دێ پرسیاره‌كێ ژ ده‌نگده‌رێن هێژا كه‌م ئه‌و ژى ده‌مێ شه‌رێ داعش رووداى و تیرۆرست به‌ر ب سنۆرێن هه‌رێمێ ڤه‌ هاتین ئه‌و كى بوون به‌رسنگێن وان گرتنین و نه‌هێلاین ب خه‌ونێن خوه‌ یێن چه‌په‌ل شاد ببن؟ ئه‌رێ ما ئه‌و نه‌پێشمه‌رگێن پارتى بوون و خودێ دزانینت هه‌كه‌ پێشمه‌رگه‌ و سه‌رۆك بارزانى نه‌با دا چاره‌نڤیسێ باژێرێن دهۆك و هه‌ولێر و سلێمانیێ و هه‌تا كه‌ركووك ژى چو لێ هات و هه‌كه‌ پێشمه‌رگێن پارتى هه‌یبه‌تا داعشێ نه‌شكاندبا دوور نینه‌ حالێ باژێرێن كوردستانێ وه‌كو باژێرێ مووسل و هنده‌ك باژێرێن دى یێن عیراقێ لێ هاتبا، لێ پێشمه‌رگه‌ى ب مه‌ردانه‌ و قاره‌مانه‌ به‌رسنگێن وان گرتن و بۆ هه‌موویان دیاربوو پێشمه‌رگه‌ى ژ پێش هه‌موو وه‌لاتێن جیهانێ ڤه‌ شه‌ڕێ داعش كرن، له‌ورا هه‌ر زوو ناڤ و ده‌نگێ پێشمه‌رگه‌ى ل هه‌موو جیهانێ به‌لاڤ بوو و سه‌نگا كوردان ل پرانیا وه‌لاتێن جیهانێ بهێزتر لێ هات و هه‌موو ئاراسته‌ ژبۆ وێ چه‌ندێ دچوون كو پشتى ئه‌نجامدانا ریفراندۆمێ ل نێزیك كورد ب هه‌موو مافێن خوه‌ شادببن و ده‌وله‌تا كوردى بهێته‌ راگه‌هاندن، لێ مخابن خیانه‌تا شازده‌ى ئوكتۆبه‌رێ ب سه‌ردا هات و وه‌لاتفرۆشان پرۆژێ ده‌وله‌تبوونێ گیرۆكرن، لێ ئه‌م وه‌كو كورد و پارتى هه‌تا دمرین دێ شانازیێ ب ریفراندۆمێ و ئه‌نجامێن وێ به‌ین چونكو ئه‌و ئه‌نجامێن ریفراندۆمێ بوومه‌ وه‌ك چه‌كه‌كى نه‌ د به‌ریكا مه‌دا و دێ هه‌ر جاره‌كێ رۆژا وێ هێت. ل دووماهیێ داخوازا من ژوان خوشك و برا ئه‌وه‌ ئه‌وێن دچنه‌ به‌غدا و دبنه‌ نوونه‌رێن مه‌ ل وێرێ ئێك ده‌ست و ئێك دلبن، هه‌روه‌سا ل وێرێ كوردایه‌تیێ بكه‌ن نه‌ حزبایه‌تیێ.

غه‌ریب یوسف
هه‌رچه‌نده‌ د كه‌ڤندا دهێته‌ گۆتن كو عیراق جهێ پێكڤه‌ژیانا هه‌موو ئۆل و ئاین و نه‌ته‌وانه‌، ب تایبه‌ت ژى كورد و عه‌ره‌بان، لێ ب درێژاهیا دیرۆكێ بوومه‌ دیاربوو كو ئه‌ڤ چه‌نده‌ نه‌راسته‌ و هه‌رده‌مێ عه‌ره‌ب كه‌فتبنه‌ ته‌نگاڤیه‌كێ ل وى ده‌مى ژنه‌چارى گۆتینه‌ كورد برا و دوستێن مه‌نه‌، لێ ده‌مێ به‌رپێن وان به‌رفره‌ه دبن وێ چه‌ند ژبیردكه‌ن و ئه‌وا ژده‌ستێن وان دهێت ل هه‌مبه‌رى كوردان ب هه‌ر جۆره‌كێ هه‌بیت دژاتیا مه‌ دكه‌ن، ئانكو دشێم بێژم هنده‌ك كه‌سن ب تنێ ل دووڤ به‌رژه‌وه‌ندیا خوه‌ دچن و وه‌سا هزردكه‌ن كو عیراق به‌س یاوانه‌ و مافێ كه‌سه‌كێ دى لێ بژیت یان داخوازا مافێن خوه‌ یێن ره‌وا دكه‌ن، و سه‌باره‌ت نه‌رماتیا ڤێ دووماهیێ یا حوكمه‌تا عیراقێ ب تایبه‌ت ژى حه‌یده‌ر عه‌بادى یێ سه‌رۆك وه‌زیر كو د پێنگاڤا ئێكێ دا فرۆكخانێن كوردستانێ ڤه‌كرن، د دووڤ دا پشكه‌كا مووچێن فه‌رمانبه‌رێن كوردستانێ هنارت ئه‌ز وه‌سا دبینم كو ئه‌ڤه‌ نه‌رماتیه‌كا سیاسى یه‌ و كاودانان وه‌سا خواست كو ئه‌و ڤێ پێنگاڤێ پاڤێژیت، چونكو پشتى ریفراندۆمێ وان پلانێن مه‌زن بۆ لاوازكرنا سه‌نگا كوردان و حوكمه‌تا هه‌رێمێ دانا بوون و د پێنگاڤا ئێكێ پلانا خیانه‌تكاریا (16) ئوكتۆبه‌رێ ب هاریكاریا هنده‌ك كوردێن خوه‌فرۆش ئه‌نجامدا و باژێرێ كه‌ركووكێ داگیركرن، له‌ورا ئه‌ز ب خوه‌ وه‌ك كه‌سه‌ك نه‌شێم بێژم نه‌رماتیا حوكمه‌تا عیراقێ به‌رامبه‌ر كوردان 100% ژدله‌، به‌ركو ئه‌ز دبینم ئه‌ڤه‌ ژى جۆره‌ سیاسه‌ته‌كه‌ و گرێداى پرۆپاگنده‌یێن هه‌لبژارتنه‌، ئانكو عه‌بادى دڤێت ب ڤێ رێ دلێ كوردان بۆ خوه‌ راكێشیت و بێژیتێ ئه‌ڤه‌ ئه‌ز دێ ده‌ستێ خوه‌ ده‌مه‌ هه‌وه‌ و یا به‌رى نه‌ما، و مه‌ره‌ما وى ژڤێ چه‌ندێ ئه‌وه‌ دا لیستێن كوردى خوه‌ بده‌نه‌ ل گه‌ل وى ژ پێخه‌مه‌ت وێ چه‌ندێ دا دوباره‌ ببیته‌ سه‌رۆك وه‌زیرێن عیراقێ، له‌ورا گه‌له‌كا فه‌ره‌ سه‌ركردایه‌تیا كوردى ب هه‌موو حزبێن خوه‌ ڤه‌ گه‌له‌ك هشیارى ڤێ چه‌ندێ بیت و هه‌كه‌ رێكه‌فتنه‌ك ژى بهێته‌ كرن پێدڤیه‌ ب حازربوونا لایه‌نێ سیێ بیت، چونكو ئه‌م هه‌موو یێ دبینێن دچه‌نده‌ سالێن بۆرى دا چاوا دستوور یێ دهێته‌ پێشێلكرن و مافێن كوردان سۆر ب سۆر یێن دهێنه‌ خوارن، له‌ورا یافه‌ره‌ د قووناغا بهێت دا ئه‌م هه‌موو كورد دئێكگرتى بین و حزبایه‌تیێ بده‌ینه‌ لایه‌كى و ده‌ست ب كوردایه‌تیێ بكه‌ین، ئانكو هه‌ر حزب و لایه‌نه‌ك به‌رژه‌وه‌ندیا خوه‌ بدانه‌ لایه‌كى و به‌رژه‌وه‌ندیا كوردان ب سه‌ر هه‌ر هه‌موویان بێخن و جاره‌كا دى دێ بێژم ئێكرێزى كلیلا سه‌ركه‌فتنا مه‌یه‌ و دڤێت ئه‌ڤرۆ به‌رى سوبه‌هى ئه‌م ئێكرێزیا ناڤمالا كوردى پتر ب هێز و رێكبێخین، چونكو ب تنێ مه‌ ئه‌ڤ چاره‌ یا هه‌ى و هه‌كه‌ ئه‌م وه‌نه‌كه‌ین دێ دوژمنێن مه‌ پتر هاربن.
ل دووماهیێ دێ بێژم هه‌كه‌ ئه‌م د ئێكرێزبین، دێ شێین هه‌موو مافێن كوردان ئه‌وێن د دستوورێ عیراقێ دا هاتینه‌ بنه‌جهكرن دێ شێیێن بده‌ستڤه‌ ئینین، ژ وانا مادێ (140) كو ب دیتنا من كلیلا چاره‌سه‌ریا هه‌ر ئاریشه‌كێ یه‌، یا دویێ ئه‌م كورد خودانێن پێشمه‌رگێن چاڤنه‌ترس و قه‌هره‌مانین مه‌ باوه‌ریا ب شیانێن وان هه‌ین دێ شێن هه‌موو مافێن مه‌ ب ده‌ستڤه‌ئینن و جیهان هه‌موو شاهدیێ بۆ وێ چه‌ندێ دده‌ن كو پێشمه‌رگه‌ى ژ پێش هه‌موو وه‌لاتێن جیهانێ ڤه‌ شه‌رێ داعشكرن و پاشڤه‌برن، هه‌روه‌سا دڤێت ژبیرنه‌كه‌ین كو مه‌ سه‌رۆكه‌كێ حه‌كیم و سه‌ركردایه‌تیه‌كا حه‌كیمانه‌ یا هه‌ى و دوور یا نێزیك ده‌وله‌تا كوردى دێ ل سه‌ر ده‌ستێن سه‌رۆك مه‌سعود بارزانى هێته‌ راگرتن.

غه‌ریب یوسف
به‌رى (31) سالان، وه‌كى ئه‌ڤرۆ دلێ مه‌زنێ پێشمه‌رگه‌ و ئه‌ندازیارێ ئاشتیێ شه‌هیدێ هه‌رده‌م ساخ (ئدریس بارزانى) ل وه‌لاتێ ئیرانێ ژ لێدانێ راوه‌ستیا و گه‌هشته‌ كاروانێ نه‌مران، و ئه‌زل وێ باوه‌ریێ مه‌ ب درێژاهیا دیرۆكێ چو كه‌س نه‌شێن ب دروستى و وه‌كى وى جهێ وى بگرن، له‌ورا ژده‌ستدانا وى نه‌به‌س زیان گه‌هانده‌ مالا وى، یان پارتى دیمۆكراتى كوردستان، به‌لكو زیان گه‌هانده‌ هه‌موو كوردان و ل هه‌ر جهه‌كێ دونیایێ بن، له‌ورا دێ بێژم قه‌ره‌بووكرنا قه‌هره‌مانێن وه‌سا دێ گه‌له‌كا ب زه‌حمه‌ت بیت.
هه‌لبه‌ت نیاسینا من ل گه‌ل نه‌مر ئدریس بارزانى بۆ سالا (1964) دزڤریت، كو وى ده‌مى ئه‌ز پێشمه‌رگه‌بووم ل باره‌گایێ مه‌كته‌با سیاسیا پارتى دیمۆكراتى كوردستان ل گۆندێ (دێرێ) ل ده‌ڤه‌را رانیا و ئێدى هه‌ڤنیاسین د ناڤبه‌را مه‌دا چێبوو، و هه‌تا رۆژا چوویه‌ وه‌غه‌رێ ئه‌ز ئێك ژ كه‌سێن نێزیكى وى بووم، و خوه‌ ب سه‌رفه‌راز دبینم بۆ ده‌مێ چه‌ند سالان ئه‌ز ل خزمه‌تا وى بووم، و هه‌تا مرنێ شانازیێ ب وێ چه‌ندێ دبه‌م كو ل سالانێن خۆش و نه‌خۆش ئه‌ز ل گه‌ل دا بووم، له‌وار ب هه‌لكه‌فتا (31) سالیا وه‌غه‌ركرنا وى حه‌ز دكه‌م چه‌ند رێزه‌كا بۆ دیرۆكێ دیاربكه‌م، یا ئێكێ د وارێ دبلۆماسى دا، هندى بێژى شه‌هید ئدریس بارزانى دبلۆماتكاره‌كێ شاره‌زا بوو، و په‌یوه‌ندیێن گه‌له‌ك باش ل گه‌ل سه‌رۆك و سه‌ركردێن گه‌له‌ك وه‌لاتان هه‌بوون، و ده‌مێ دچوو ژده‌رڤه‌ یان شانده‌ك ژده‌رڤه‌ دهاته‌ ده‌ف گه‌له‌ك رێز لێ دگرتن و حسابه‌كا مه‌زن بۆ دكرن، هه‌روه‌سا دوارێ ب رێڤه‌برنا كارۆبارێن پارتى دا گه‌له‌كێ زیره‌ك بوو و گه‌له‌ك رۆژان ل گه‌ل سه‌رۆك مه‌سعود بارزانى ل باره‌گایێ مه‌كته‌با سیاسى پێكڤه‌ دروونشتن و پێشوازیا شاند و مێهڤانان دكرن و ره‌فتارێن وى ل گه‌ل وان كه‌سێن دهاتنه‌ ده‌ف گه‌له‌ك دجوان بوو، ئانكو هه‌ر كه‌سه‌كێ دڤیا شیا ببینیت و هه‌رده‌م ده‌رگه‌هێ وى یێ ڤه‌كرى بوو، و هه‌ر ئاریشه‌ك یان داخوازیه‌كا هه‌با دا چاره‌یه‌كى بۆ بینین و كه‌س بێ ئۆمێد نه‌دكر، هه‌روه‌سا مرۆڤه‌كێ زێده‌ رحه‌ت و سه‌رخوه‌ بوو چو جاران تۆڕه‌ نه‌دبوو، ئانكو سینگێ وى هندێ چیایه‌كێ بۆ هه‌ر پرسیار و ره‌خنه‌كێ یێ ڤه‌كرى بوو.
بیرا من دهێت ل ئیلۆنا سالا (1981) شه‌هید ئدریس بارزانى ل گه‌ل پتر ژ (300) پێشمه‌رگه‌ى، كو ئه‌ز ژى ئێك ژوان بووم، ئه‌م هاتینه‌ ده‌ڤه‌را ده‌شتا به‌رازگر، و مه‌ باره‌گایێ خوه‌ ل گوندێ (بێ كێڤرێ) دانا، كو وى ده‌مى هێزا بارزان ژى ل وێرێ بوو، مه‌ره‌م ژ وێ هاتنێ پاراستنا عه‌ردێ كوردستانێ وخه‌لكێ وێ بوو، له‌ورا ل هه‌یڤا یازده‌ ب چه‌كێ گران و سڤك مه‌ چه‌ندین شه‌ر ل گه‌ل له‌شكرێ عیراقێ یێ وى سه‌رده‌مى كرن، و ژبه‌ركو زیانه‌كا مه‌زن گه‌هشته‌ دوژمنى نه‌چار بوون داخوازا دانوستاندنێ ل گه‌ل شه‌هید ئدریس بارزانى بكه‌ن، له‌ورا چه‌ندین شاند هنارتن، و هه‌تا بهارا سالا (1982) ئه‌م ماینه‌ ل وێرێ و ئێدى هه‌تا رۆژا وه‌غه‌رێ ئه‌م ماینه‌ ل خزمه‌تا وى و شانازیێ ب وى ژى دبه‌م یێ كو من ل گه‌ل ئدریسێ جانه‌مه‌رگ بۆراندى، و هه‌رده‌م خوه‌ ب قوتابیێ وێ قوتابخانێ دزانم كو ئه‌و ژى قوتابخانا كوردایه‌تیێ یه‌ ئه‌وا بابێ وى مه‌لا مسته‌فا بارزانى بوومه‌ داناى دبه‌م، و سۆزێ دده‌م هه‌تا دووماهیا چركا ژیانا خوه‌ هه‌ر قوتابیێ وێ رێبازى بم.

هه‌رچه‌نده‌ ئه‌ز نه‌ مرۆڤه‌كێ ره‌شبینم، به‌لێ ئه‌ز ل وێ باوه‌ریێ مه‌ هندى تایفه‌گه‌رى ل عیراقێ هه‌بیت چو جاران ره‌وشا وى خۆش نه‌بیت، چونكو ئه‌و كه‌سێن حكومى ل عیراقێ دكه‌ن فه‌رمانا ژ وه‌لاتێن جیران وه‌ردگرن، ئانكو ئه‌و چو دبێژنێ ئه‌و وه‌دكه‌ن، گرۆڤه‌ژى گه‌له‌ك دمشه‌نه‌ لێ پێدڤى ناكه‌ت ئه‌م ب رێز بكه‌ین، چونكو خه‌لكێ كوردستانێ ب گشتى، هه‌تا یێ عیراقێ ژى باش دزانیت كا عه‌بادى دار ده‌ستێ كیژ وه‌لاتى یه‌ و چاوا فه‌رمانێن وان بجه دئینیت و مه‌ره‌م ژێ دانانا هیلاله‌كا شیعى یه‌ ل ده‌ڤه‌رێ، له‌ورا یێ بزاڤێ دكه‌ت كونترۆلێ ل سه‌ر هه‌ر تشته‌كى بكه‌ت و هه‌ر فه‌رمانه‌كا لێڤه‌گه‌ڕێ وان بده‌تێ 100% ب سوپاسیڤه‌ ئه‌و دێ بجه ئینیت، و دبیت هه‌تا راده‌كى بشێت خه‌ونێن خوه‌ ب ده‌ستڤه‌بینیت، لێ ئه‌ڤه‌ هندێ ناگه‌هینیت كو دێ شێت كونترۆلێ ل سه‌ر عیراقێ هه‌موویێ بكه‌ت، چونكو ئه‌م هه‌موو دزانین ژمێژه‌یه‌ عیراق یا پارچه‌ پارچه‌كرى یه‌ ل سه‌ر سێ هه‌رێمان (كورد، سونه‌، شیعى) و هه‌موو خه‌لكێ عیراقێ ڤێ چه‌ندێ باش دزانیت و بۆزانین نه‌به‌س ئه‌م كورد د مه‌غدۆرین، به‌لكو غه‌درا ل عه‌ره‌بێن سونه‌ ژى هاتیه‌كرن و مافێن وان ژى هاتینه‌ پێشێلكرن، چونكو گه‌له‌گ جاران سه‌ركردێن سونه‌ د كۆنگیرێن خوه‌ یێن رۆژنامه‌ڤانى دا ئاماژه‌ ب وێ چه‌ندێ كرینه‌ كو دعیراقێ دا ئه‌و خوه‌ ب مه‌غدۆر دزانن، له‌ورا پلانا دانانا هه‌رێمه‌كا سنى دانایه‌ و چو دوور یا نێزیك دێ پلانا وانژى سه‌رگریت و عه‌بادى و سه‌ركردێن شیعا بڤێت یان نه‌ڤێت عیراق دێ بیته‌ سێ پارچه‌ و ژ مێژه‌ به‌رنامه‌ بۆ هاتیه‌ دارشتن.
هه‌روه‌سا دڤێت ئه‌م بزانین كو سونه‌ و شیعه‌ چه‌ند دوژمنێن ئێكبن بۆ دوژمناتیا كوردان دبنه‌ دوستێن ئێك، له‌ورا پێدڤیه‌ ئه‌م پتر د ئێكگرتى بین و ناڤمالیا كوردى باشتر ب پارێزین، هه‌روه‌سا پێدڤیه‌ هه‌موو لیستێن كوردى ل په‌رله‌مانێ عیراقێ ئێكده‌نگ و ئێك رێزبن و دهه‌موو ده‌لیڤان دا ب تایبه‌ت ل سه‌ر پرسا كوردى پشتا هه‌ڤدۆ بگرن دا نه‌هێلن دوژمن ب خه‌ونێن خوه‌ شاد ببن، هه‌روه‌سا پێدڤیه‌ سه‌ركردایه‌تیا كوردى له‌زێ د راگه‌هاندنا ده‌وله‌تا كوردى دا بكه‌ن و ب دیتنا من ده‌لیڤه‌ بۆ ده‌وله‌تبوونێ یا باش و گونجایه‌، چونكو چه‌ندین جاران سه‌رۆك مه‌سعود بارزانى د دیدار و گۆتارێن خوه‌ دا گۆتیه‌ هه‌كه‌ ئه‌م ب خوه‌ ده‌وله‌تا خوه‌ نه‌راگه‌هینینن چوجاران كه‌سه‌ك یان وه‌لاته‌ك ناهێت بێژیت ئه‌ڤه‌ ده‌وله‌تا كوردى دیارى بۆ هه‌وه‌، له‌ورا مه‌ دڤێت ب سه‌ربلندى بژین نه‌كو هه‌تا مرنێ بنده‌ست بژین.
ل دووماهیێ من دڤێت بێژم هه‌كه‌ خیانه‌تا (16) ئوكتۆبه‌رێ نه‌با چو جاران كه‌ركووك و هنده‌ك ده‌ڤه‌رێن دى نه‌دكه‌فتنه‌ ده‌ستێن حه‌شدا شه‌عبى و سۆپایێ عیراقێ، لێ هنده‌ك خائین و خۆفرۆشێن كورد ب پیلانگێڕیا هنده‌ك وه‌لاتێن جیران ئه‌و خیانه‌تا مه‌زن ل ملله‌تێ كورد كر، له‌ورا هندى كورد مابن وان خۆفرۆشان ژبیرناكه‌ن و هیڤیا من ئه‌وه‌ رۆژه‌ك بهێت دادگه‌ه ب وان كه‌سان بهێته‌كرن و ب هه‌ر ئێك بگه‌هیته‌ سزایێ خوه‌.

وه‌كى ئه‌ڤرۆ و به‌رى (56) سالان چریسكا ئێكێ یا شۆڕه‌شا ئیلۆنا مه‌زن ب سه‌ركێشى و رابه‌ریا مه‌لا مسته‌فایێ بارزانى ل كوردستانێ سه‌رهلدا و ئێدى ئه‌و شۆڕه‌ش بۆ قوتابخانه‌كا مه‌زنا كوردایه‌تیێ و هه‌موو ده‌ستكه‌فتێن كوردستانێ ب تایبه‌تى ژى په‌رله‌مان و حوكمه‌تا هه‌رێما كوردستانێ به‌رهه‌مێن وێ شۆڕه‌شێ نه‌، هه‌روه‌سا ئه‌و شۆڕه‌ش بۆ بنیاته‌ك كو سه‌ركردایه‌تیا كوردستانێ بڕیارێ ل چاره‌نڤیسێ گه‌لێ خوه‌ بده‌ت و رۆژا 25 ڤێ هه‌یڤێ بۆ ئه‌نجامدانا ریفراندۆم و سه‌ربخوه‌بوونا كوردستانێ ده‌ستنیشان بكه‌ن.
بێ گومانه‌ ئه‌و شۆڕه‌ش ژ چو ڤالاهیان نه‌هاتبوو، به‌لكو پشتى وێ زۆلم و زۆرداریێ هات ئه‌وا حوكمه‌تا عیراقێ یا وى سه‌رده‌مى دژى كوردان دكر، له‌ورا بارزانیێ نه‌مر نه‌خشه‌ بۆ وێ شۆَره‌شێ دانا و به‌رى ده‌ست ب بجهئینانا وێ بكه‌ت بارزانى سه‌ره‌دانا پتریا ده‌ڤه‌رێن كوردستانێ كر و ل گه‌ل ریهسپى و ماقوولێن وان ئاخفت و گۆتێ مه‌ ل به‌ره‌ ده‌ست ب شۆڕه‌شێ بكه‌ین و ئه‌م دێ بۆ مرنێ كه‌ین، ئه‌ڤجا هه‌كه‌ وه‌ دڤێت ل گه‌ل مه‌ بن و هاریكاریا مه‌ بكه‌ن دێ ده‌ست پێ كه‌ین، چونكو دوژمنێن مه‌ یێ پیلانێن مه‌زن دژى كوردان ددانن و ئارمانجا وان ژناڤبرنا مه‌ هه‌موویانه‌، و خۆشبه‌ختانه‌ هه‌موویان خوه‌ دا ل گه‌ل بارزانى و گۆتێ بۆ مرن و مانێ ئه‌م ل گه‌ل ته‌ینه‌، پشتى پلانا شه‌رى هاتیه‌ دانان و میحوه‌ر هاتینه‌ به‌لاڤكرن، ل هه‌ر میحوه‌ركى به‌رپرسه‌ك بۆ هاته‌ دانان و ب سه‌دان پێشمه‌رگه‌ ل گه‌ل دابوون و پشتى ده‌ستپێكرنا شۆڕه‌شێ رۆژ بۆ رۆژێ گه‌نجێن كوردان گه‌هشتنه‌ ناڤ رێزێن شۆڕه‌شێ و چه‌كێ شه‌ره‌ف و كه‌رامه‌تێ هه‌لگرتن و بوونه‌ پێشمه‌رگه‌، و هه‌ر چه‌نده‌ ل وى ده‌مى چه‌كه‌كێ سڤك و كێم ل به‌رده‌ستێ پێشمه‌رگه‌ى بوو، دوژمنى ب ده‌هان فرۆكه‌ و ب سه‌دان تانك و زریپۆش ل به‌رده‌ست بوون لێ ئیرادا پیلاى یا پێشمه‌رگه‌ى هه‌موو هێرشێن وان شكاندن و زیانه‌كا ئێكجار مه‌زن گه‌هانده‌ دوژمنى و ب ده‌هان كه‌له‌خێن وان ل گه‌ل چه‌كى مابوونه‌ ل مه‌یدانا شه‌رى، له‌ورا حكومه‌تا عیراقێ نه‌چار بوو داخوازا دانوستاندنان ژ بارزانى بكه‌ن، لێ ژبه‌ر كو مه‌ره‌مێن وان دباش نه‌بوون و نه‌دڤیان دانپێدانێ ب مافێن كوردان بكه‌ن، له‌ورا شۆَره‌ش یا به‌رده‌وام بوو، و رۆژ بۆ رۆژێ ناڤوده‌نگیا كوردان و پێشمه‌رگه‌ى ل جیهانێ ده‌نگڤه‌دا، هه‌روه‌سا رۆژ بۆ رۆژێ شۆرَه‌ش گه‌رمتر لێ هات هه‌ر چه‌نده‌ هنده‌ك جاران شكه‌ستن هه‌بوون، لێ بارزانى یێ ب ئومێد بوو، و هه‌رده‌م دگۆت (ل سه‌ركه‌فتنا مه‌غرۆر نه‌بن و ل شكه‌ستان ژى بێ ئۆمێد نه‌بن)، له‌ورا رۆژ بۆ رۆژێ مۆرالا پێشمه‌رگه‌ى و خه‌لكێ كوردستانێ بلندتر لێ هات هه‌تا شۆڕه‌شا گولانێ دووڤدا سه‌رهلدان ب سه‌ردا هاتین و بۆ ده‌مێ پتر ژ (25) سالانه‌ ئه‌م كورد خودان په‌رله‌مان و حوكمه‌تین و مه‌ بۆ دۆست و دوژمنان دوپاتكر كو ئه‌م دشێین خوه‌ ب رێڤه‌ببه‌ین و نوكه‌ كاروانێ كوردینیێ یێ ل گوپیتكا سه‌ركه‌فتنێ، ب تایبه‌ت پشتى شه‌رێ داعش كو پێشمه‌رگه‌ى بۆ هه‌موو جیهانێ سه‌لماندن ئه‌و شیان ژ پێش هه‌موو جیهانێ ڤه‌ شه‌رى بكه‌ن و وێ گرۆپا تیرۆرستى ژناڤ ببه‌ن، و تشتێ مه‌ ماى پشتى دو حه‌فتێن دى ئانكو ل رۆژا 25 ڤێ هه‌یڤێ ئه‌م ب دله‌كێ پر شاد و كه‌یفخۆشى بچینه‌ سه‌رسندۆقێن ده‌نگدانێ و بێژین به‌لێ و هزار جاران به‌لێ بۆ ریفراندۆم و سه‌ربه‌خوه‌بوونا كوردستانێ.

د دیرۆكا پر سه‌روه‌ریا ملله‌تێ كوردا گه‌له‌گ ئه‌ڤرازى و نشیڤى هه‌نه‌، هه‌روه‌سا گه‌له‌ك رۆَژێن خۆش و نه‌خۆش ژى هه‌نه‌، كو ل هنده‌ك رۆژان ئه‌م كورد گه‌له‌ك پێ ئێشاینه‌ و ل هنده‌ك رۆژان ژى گه‌له‌ك كه‌یفا مه‌ هاتیه‌، ژ وانا رۆژا (16) ته‌باخێ كو رۆژه‌كا پر سه‌روه‌ریا ددیرۆكا ملله‌تێ كورد دا ئه‌و ژى رۆژا دامه‌زراندنا پارتى دیمۆكراتى كوردستانه‌ ل سه‌ر ده‌ستێ رابه‌ڕ و بلیمه‌تێ كوردان مه‌لا مسته‌فا بارزانى، كو هندى ئه‌م كورد هه‌یه‌ ڤێ رۆژێ ژبیرناكه‌ین چونكو ب دامه‌زرندنا پارتى چرایێ كوردان گه‌شتر لێ هات و دڤێت د هه‌موو ژیانا خوه‌ دا شانازیێ ب پارتا خوه‌، هه‌روه‌سا دامه‌زرێنه‌رێ وێ بارزانیێ نه‌مر بكه‌ین.
بێ گۆمانه‌ دامه‌زراندنا پارتى ژچو ڤالاهیان نه‌هاتیه‌، به‌لكو د سه‌رده‌مه‌كى دا هات كو مه‌ كوردان گه‌له‌ك پێدڤى پێ هه‌بوو، له‌ورا دێ ب سه‌ربلندى ڤه‌ بێژین دامه‌زراندنا پارتى ئێك ژ پێدڤیێن هه‌ره‌ گرنگ بوو، هه‌روه‌سا دڤێت چو جاران رۆلێ بارزانیێ نه‌مر ژبیرنه‌كه‌ین ژبه‌ركو نه‌ تشته‌كێ ب ساناهى بوو به‌رى (71) سالان تۆ حزبه‌كێ ب دامه‌زرینى، چونكو ل وى ده‌مى دوژمنێن كوردان گه‌له‌ك بوون و ئه‌وان هه‌موو بزاڤێن خوه‌ دمه‌زاختن دا ده‌نگێ كوردان بمرینن، لێ مه‌لا مسته‌فا یێ بارزانى ب شاره‌زاى و قه‌هره‌مانیا خوه‌ شیا هه‌موو نه‌خشه‌ و پلانێن وان ژناڤ ببه‌ت و پشتى دامه‌زراندنا پارتى رۆژ بۆ رۆژێ چرایێ كوردان ل هه‌موو جیهانێ گه‌شتر لێ هات، هه‌روه‌سا دوستێن كوردان ژى ل سه‌رتاسه‌رى جیهانێ زێده‌تر لێ هاتن و ئه‌ڤرۆ ژى ب سایا سه‌رێ سه‌رۆك مه‌سعود بارزانى، كو كۆڕێ مه‌لا مه‌سته‌فا یێ بارزانى یه‌، رۆژ بۆ رۆژێ دوستێن كوردان یێن زیده‌ دبن و هه‌كه‌ د ده‌مه‌كى دا به‌س چیا دۆستێن كوردان بوو، ئه‌ڤرۆ ل سه‌رانسه‌رى وه‌لاتێن جیهانێ كوردان دوست هه‌نه‌ و وه‌لاتێن زلهێز یێ پشته‌ڤانیێ لێ دكه‌ن، چونكو بۆ وان دیاربوو كو تاكه‌ هێزا شیاى هه‌یبه‌تا داعشێ بشكێنیت و ژناڤ ببه‌ت پێشمه‌رگێن كوردان بوو، له‌ورا ئه‌ڤرۆ كه‌ ل پرانیا وه‌لاتێن جیهانێ رێزه‌كا مه‌زنا ل كوردان و سه‌رۆك مه‌سعود بارزانى دهێته‌ گرتن و ل هه‌موو سه‌ره‌دانا خوه‌ دا بۆ ده‌رڤه‌ى وه‌لاتى و ئورۆپا پێشوازیه‌كا كێم وێنه‌ و ب ئالایێ كوردستانێ یا ل سه‌رۆك مه‌سعود بارزانى دهێته‌ گرتن، و دڤێت ئه‌م هه‌موو بزانین ئه‌ڤه‌ بۆ هه‌موو كه‌سان ناهێته‌ كرن، به‌س بۆ سه‌رۆك بارزانى وه‌كو سه‌رۆك كۆمارێ هه‌ر وه‌لاته‌كى پێشوازى لێ بهێته‌ كرن، و دڤێت ئه‌م هه‌موو شانازیێ پێ ببه‌ین چونكو ئه‌و نوونه‌رێ ئێكانه‌ و راسته‌قینه‌ یێ هه‌موو كوردان ل هه‌موو جیهانى.
ل دووماهیێ دێ بێژم سالرۆژا دامه‌زراندا پارتى دیمۆكراتى كوردستان، كو دهه‌مان ده‌مدا رۆژبوونا سه‌رۆك مه‌سعود بارزانى ژى یه‌ ل هه‌موو كوردان پیرۆز بیت و هیڤیا من ئه‌وه‌ ئه‌م خوینا وان قه‌هره‌مان ژبیرنه‌كه‌ین یێن كو گیانێ خوه‌ پێشكێشى ڤێ رۆژێ كرین و شه‌هید بووین، داخازێ ژ هه‌موو كوردان دكه‌م ل رۆژا بیست و پێنجى ئیلۆنا بهێت پێكڤه‌ بچنه‌ سه‌ر سندۆقێن ده‌نگدانێ و بێژن به‌لێ بۆ سه‌رخوبوونا كوردستانێ، دا گیانێ شه‌هیدێن مه‌ شاد ببیت و ئه‌م كورد ب ده‌وله‌تبوونا خوه‌ سه‌رفراز ببین.