سەرۆكێ دەستەیا وەبەرهێنانێ ل هەرێما كوردستانێ دیار كر، ل مەها گۆلانا ئەڤ سالە ل وەلاتێ ئیماراتێ‌ ئەو وەكو دەستەیا وەبەرهێنانێ دێ پشكداریێ د دیدارا سالانە یا وەبەر‌هێنانا جیهانی دا كەن.
د. محەمەد شوكری، سەرۆكێ دەستەیا وەبەرهێنانێ بۆ رۆژناما ئەڤرۆ گۆت: «ل حەفتیا دویێ ژ مەها گولانێ ل ئەبوزەبی ئەم دێ پشكداریێ د دیدارا سالانە یا وەبەرهێنانا جیهانی دا كەین، كو پڕانیا سازیێن فەرمی یێن وەبەرهێنانێ یێن وەلاتان دێ تێدا پشكدار بن، دەستەیا وەبەرهێنانا هەرێما كوردستانێ وەكو ئەندامەك د رێكخراوا وەبەرهێنانا جیهانی دا بۆ جارا ئێكێ دێ پشكدار بیت و دێ رۆل د وێ دیدارێ دا هەبیت».
د. محەمەد شوكری خویا كر، د وێ دیدارێ دا گۆتارەكا تایبەت یا دەستەیا وەبەرهێنانێ دێ هێتە خواندن و تایبەتمەندیێن وەبەرهێنانێ ل هەرێما كوردستانێ دێ هێنە بەرچاڤكرن، د سێ ڕۆژان دا شاندێ كوردستانێ دێ كاری بۆ ناساندنا پێشڤەبرنا هەرێما كوردستانێ ب مەرەما هاتنا یتر یا وەبەرهێنەرێن بیانی بۆ هەرێما كوردستانێ كەت.

زاخۆ، دلۆڤان هالۆ:

دكتۆر بژار زاخۆیی، د كۆنگرەیەكێ ڕۆژنامەڤانی دا دیار كر، سەنتەرێ جەلتا مێشكی ل زاخۆ دێ هێتە ڤەكرن و ئاڤاهیەكێ تایبەت بۆ سەنتەری دێ‌ هێتە دروستكرن.
دكتۆر بژار گۆت: «پشتی ئەز هاتیمە كوردستانێ و ل گەل گوهدار شێخۆ، سەرپەرشتێ ئیدارەیا سەربخوە یا زاخۆ و دكتۆر سیروان ڕێڤەبەرێ گشتی یێ ساخلەمیا زاحۆ و دكتۆر ئازاد نەجار و دكتۆر سامان بەرزنجی، وەزیرێ ساخلەمیێ و دكتۆر نەوفەل، ڕاگرێ كۆلیژا نۆشداری ل زانكۆیا زاخۆ و دكتۆر سەگڤان محەمەد و دكتۆر حەسەن كۆمبوویم، ل دووماهیێ ئەم گەهشتینە وێ چەندێ كو سەنتەرێ جەلتا مێشكی ل زاخۆ بهێتە ڤەكرن و ئاڤاهیەكێ تایبەت ژ بۆ ئەڤی سەنتەری بهێتە دروستكرن».
گۆتژی: «ئەڤ سەنتەرە دێ چارەسەریا وان كەسان كەت یێن ل دەمێ جەلتا مێشكی لێ ددەت، دەمارێن وان یێن خوین لێ ڕاوەستیایی بهێنە ڤەكرن و خوین بگەهیتە مێشكی و لەشێ وان ب دروستی كار بكەت و نەبیتە ئەگەرێ شەلەلێ یان ژ دەستدانا ئاخڤتنێ یان ژی گیان ژ دەست دانێ».

رۆژێن فەستیڤالا سەمایا دهۆكێ‌ ئەڤرۆ رۆژا دوشەمبی 29/4/2024 ل هۆلا كۆنفرانسان ل زانكۆیا دهۆكێ‌ ب پشكداریا چەندین هۆنەرمەند و شارەزا و جەماوەرەكێ‌ زۆر ل دەمژمێر 10ی سپێدێ‌ دێ‌ دەستپێكەن و بۆ دەمێ‌ دو رۆژان دێ‌ یا بەردەوام بیت و تێدا چەندین چالاكی و پانێل دێ‌ هێنە پێشكێشكرن.
رۆژێن فەستیڤالا سەمایا دهۆكێ‌ رۆژێن 29 و 30/4/2024 دێ‌ د بەردەوام بن ل دانێ‌ سپێدێ‌ و ئێڤاری، د رۆژا ئێكێ‌ یا دەستپێكرنا فەستیڤالێ‌ دا، پانێلەك ب ناڤێ‌ (سەما و عیرفان ل كوردستانێ‌) ل دانێ‌ سپێدێ‌ دێ‌ هێتە پێشكێشكرن.
دیسا ل ئیڤاری ژی كۆنسێرتەك دێ‌ هێتە پێشكێشكرن و هەژمارەكا گروپێن هۆنەری و هۆنەرمەندان دێ‌ تێدا پشكدار بن.

ئامێدیێ‌، مەحمود نهێلی

پتر ژ سالەكێ‌ یە نڤیسینگەها چێكرنا پاسەپورتان ل دەڤەرداریا ئامێدیێ‌ هاتیە چێكرن و میلاك بۆ هاتینە دەستنیشانكرن و هژمارەكا فەرمانبەران ژی تێدا دەوامێ‌ دكەن، لێ‌ هێشتا ب فەرمی دەست بكار نەبوویە و دەست ب چێكرنا پاسپورتا نەهاتیە كرن و وەلاتی ژی دخوازن ئەگەرێن گیرۆبوونا وێ‌ بزانن.

ئێك ژ وەلاتیێن دەڤەرێ‌ ب ناڤی ئاڤان ئامێدی دیار كر، ب راستی ڤەكرنا ڤێ‌ نڤیسینگەهێ‌ گەلەك گرنگیا خوە هەیە و گۆت: ب ڤەكرنا نڤیسینگەها پاسەپورتان دێ‌ گەلەك ژ كاروبارێن هاولاتیان ب ساناهی تر لێ‌ هێت و هاتن و چوونا وەلاتیان ژی دێ‌ كێمتر بیت بۆ چێكرنا پاسەپورتان.
ناڤبری هیڤی ژی خواستن، ئەڤ نڤیسینگەهە ب زووترین دەم ب كەڤیتە د خزمەتا وەلاتیێن دەڤەرێ‌ دا.
وەلاتیەكی دی یێ‌ دەڤەرێ‌ خویاكر، پێدڤیە ئەڤ نڤیسینگەهە بەری چەندین سالان هاتبا ڤەكرن، ژ بەركو دەڤەرا ئامێدیێ‌ دەڤەرەكا بەرفرەهەی ژلایێ‌ جوگرافی ڤە و هەژمارەكا زۆرا وەلاتیان ژی لێ‌ ئاكنجی نە و گۆت: رێیا دناڤبەرا دهوكێ‌ بۆ دەڤەرا ئامێدیێ‌ دبیتە دورێن 100 كیلومەتران، ئەڤجا بۆ رێڤەبەرنا مامەلەیا پاسەپورتێ‌ بڕینا ڤێ‌ هەموو رێیێ‌ گەلەك زۆرە و زێدەباری ئەڤ رێ و رێبارێن نەخوەش و هەبوونا هەژمارەكا زۆرا روودانێن هاتن و چونێ‌.
ناڤهاتی داخواز ژی ژ كارگێریا دەڤەرێ‌ كر، لەز د ڤەكرنا ڤێ‌ نڤیسینگەهێ‌ دا بهێتە كرن بۆ وێ‌ یەكێ‌ بشێت خزمەتا خەلكێ‌ دەڤەرێ‌ بكەت.
هەروەسا وەلاتیەكی بناڤی موحەمەد ئاكنجیێ‌ دێرەلۆكێ‌ دیاركر، ل دەسپێكا دروستكرنا ڤێ‌ نڤیسینگەهێ‌ گەلەك كەیفا خەلكێ‌ دەڤەرێ‌ هات و گۆت: مخابن ئەڤە سالەك ژی دەرباز بوون ل سەر چێكرنا وێ‌ هێشتا دەست ب كارێ‌ رێڤەبەرنا مالەیان نەهاتیە كرن و دیار كر، هەر ل شێلادزێ‌ و دێرەلۆكێ‌ و تا ئامێدیێ‌ و سەرسنكێ‌ هەموو دچنە باژێرێ‌ دهوكێ‌ بۆ چێكرنا پاسەپورتا هەكە ل ئامێدیێ‌ هاتبایە ڤەكرن ئەڤە دێ‌ ئەڤ خەلكە هەر ل ئامێدیێ‌ مامەلەیێن خوە ب رێڤەبەن، و ئەو قەرەبالغا ل سەر فەرمانگەها دهوكێ‌ ژی دێ‌ كێم بیت و گۆت: ئەم حەز دكەین بریار ببنە كریار بو وێ‌ یەكێ‌ بشێن خزمەتا خەلكێ‌ دەڤەرێ‌ بهێتە كرن.
وارشین سەلەمان دەڤەردارێ‌ ئامێدیێ‌ بۆ رۆژناما ئەڤرۆ خویاكر، وەك یا دیار فەرمانا ڤەكرنا نڤیسینگەها پاسەپورتا ل ئامێدیێ‌ هاتیە دان وەك ئەرك و بەرنامەیێ‌ كابینەیا نەهێ‌ یا حكومەتا هەرێما كوردستانێ‌ كو هەموو خزمەتگوزاریان بگەهینتە هەموو دەڤەران بێ‌ جوداهی و گۆت: وەك ئاڤاهی یێ‌ تمام بووی، و وەك میلاكات ژی هەموو كارمەند بو هاتینە دەستنیشانكرن و ئاشكرا كر، كو ئەگەرێ‌ گیروبوونا دەست بكار بوونا وێ‌ ڤەدگەریت بۆ گرانیا ت‌ورا هێلا حكومەتا عیراقێ‌ یا فیدرالی.
دەڤەردارێ‌ ئامێدیێ‌ دیار ژی كر ئەو د وێ‌ باوەریێ‌ دا یە كو ئەڤ نڤیسینگەهە دێ‌ دەمەكێ‌ نێزیك دا كەڤیتە د خزمەتا خەلكێ‌ دەڤەرا ئامێدیێ‌ دا.