د داخویانیەكێ‌ دا سكرتێرێ‌ رۆژنامەڤانی یێ‌ پارێزگارێ‌ دهۆكێ‌ دیار كر بڕیارە د دەمەكێ‌ نێزك دا پارێزگارێ‌ دهۆكێ‌ د. عەلی تەتەر 80 یاریزانێن قارەمان و خودان ناسناڤ یێن پارێزگەهێ‌ د ئاهنگەكا تایبەت دا دێ‌ خەلات كەت.
زێدەتر مللەت عسمەت بۆ رۆژنامەیا ئەڤرۆ گۆت: ل سەر راسپاردا پارێزگارێ‌ دهۆكێ‌ د. عەلی تەتەر و بەردەوامی دان ب پشتەڤانییا وەرزشێ‌ و وەرزشڤانان بڕیارە د دەمەكێ‌ نێزك دا 80 یاریزانێن خودان ناسناڤ ل سەر ئاستێ‌ ئیراقێ‌ و دەرڤە د ئاهنگەكا تایبەت دا بهێنە خەلاتكرن، هەروەسان پرۆسەیا دابەشكرنا خەلاتان دێ‌ ب شێوەیێ‌ دو قۆناغ بیت ئانكو بۆ هەر قۆناغەكێ‌ چەند قارەمانان دێ‌ هێنە داخوازكرن بۆ خەلاتكرنی.
ناڤهاتی دیار كر ژی ئەو یاریزانێن پارێزگەها دهۆكێ‌ شیایین ل ڤێ‌ دووماهیێ‌ ناسناڤ و دەستكەفتێن ژ هەژی ب دەستڤە بینن دێ‌ هێنە خەلاتكرن و گۆت: چەندی یاریزانان ناسناڤێن مەزن دەستڤە ئیناینە بۆ نموونە ئەو قارەمانییا ل حەفتییا بۆری دو یاریزانێن مە كوڕێن پارێزگەهێ‌ شایبوون ل سەر ئاستێ‌ نێڤدەولەتی یا قارەمانییا تایكۆاندویێ‌ ل كوریا باشۆر رێزێن دویێ‌ و سێیێ‌ ب دستڤە بینن ئەڤە ژی ئێك ژ مەزنترین دەستكەفتێن هاتینە تۆمار كرن ب ناڤێ‌ یاریزانێن پارێزگەهێ‌، پێنەڤێت نە دەستكەفتەكێ‌ كێمە ل وەلاتەكێ‌ پێشكەفتی وەكو كوریا باشۆر و خودانا خوە و یارییا تایكۆاندویێ‌.
ژلایەكێ‌ دووڤە سكرتێرێ‌ رۆژنامەڤانی یێ‌ پارێزگارێ‌ دهۆكێ‌ ئەو چەندە ژی دا زانین بۆ رۆژێن بهێت دا دێ‌ ژڤان و جهێ‌ خەلاتكرنا ئەڤان یاریزانان هێتە دیاركرن و گۆت: ل دووڤ بەرنامەیێ‌ پشتەڤانیكرنێ‌ بۆ هەموو كەرتان ژ وەرزشی بەرێز د. عەلی تەتەر پارێزگارێ‌ دهۆكێ‌ ب پشتەڤانییا حوكمەتا هەرێما كوردستانێ‌ بەردەوامە ژبۆ پشتەڤانیێ‌ ل دووڤ شیانێن بەردەست و وەرزش هەردەم بوویە لایەنێ‌ بەرچاڤ پووتەیی پێ ددەت بۆ هەر یانە و یاریزانەكێ‌ ل سنۆرێ‌ پارێزگەها دهۆكێ‌.

عەلی حاجی:

د داخویانیەکێ دا راهێنەرێ نوو یێ هەلبژارتیێ پارێزگەها دهۆكێ بۆ رۆژناما ئەڤرۆ دیار کر ئەو هەست ب بەرپرسیارەتیێ دکەت و بۆ دو یاریێن داهاتی دا دێ بزاڤێن سەرکەڤتنێ كه‌ن.
زێدەتر بەناڤ ئەحمەد ئه‌وێ ل جهێ عه‌لی وه‌حیددین هاتیه‌ دانان گۆت: بۆ من جهێ شانازیێ یە کو باوەری ب من هاتیە دان بۆ ئەرکێ راهێنەراتییا هەلبژارتیێ پارێزگەها دهوکێ وه‌ربگرم، د یاریا ئێکێ دا هەر چەندە ئاست و ئەنجام د باش نەبوون لێ بۆ دو یاریێن بهێت کو پشتی من ئەرکێ راهێنەرایەتیا تیمێ وەرگرتی دێ تیمێ بەر ب رەوشەکا باشتر ڤە بەین و چەند گهۆرینەکان ژی د تیمێ دا کەین دا کو تیم باشتر ببیت، دێ کار ل باشترکرنا دەرونێ یاریزانان کەین و ب دروستی ئەرکێ یاریزانان بۆ وان دەستنیشان کەم دا کو هەر یاریزانەک ئەرکێ خوە بزانیت و پێکهاتەیێ تیمێ ژی ب دروستی دێ دانین، هەر چەندە دو یاریێن بهێت د یاریگەهێن مە دا نینن لێ ئەڤە وێ چەندێ ناگەهینیت کو دێ تیمەکا ب ساناهی بن بەروڤاژی ئەو دێ هەیبەتێ بۆ پارێزگەها دهوکێ ڤەگەرینن و هەتا دووماهی خولەک ژی شەڕی بۆ دەربازبوونێ کەین، هەر چەندە ل هندەک جهان مە کێماسی هەنە لێ دڤێت ئەم ل ڕێیەکا چارەسەریێ بگەرین بۆ باشترکرنا ئاست و ئەنجامان.
ناڤبری گۆت ژی: یاریزانێن باش مە هەنە لێ پێدڤییە شیانێن زێدەتر مەزێخن د پێناڤی هەلبژارتیێ پارێزگەها دهوک دیسان ئه‌ڤ هەلبژارتییه‌ ژی پێدڤی ب پشتەڤانیەکا باشترە دا کو ئەڤ تیمە زێدەتر بهێتە رێکخستن و ژ روویێ دەروونی ڤە ژی باشتر ببیت.

قەیس وەیس:

دهێتە چاڤەڕێ‌ كرن ئەڤرۆ فیدارسیونا تەپا پێی یا ئیراقێ‌ كۆمبوونا خوە یا ئاسایی ل سەر بەرهەڤیێن وەرزێ‌ نوو یا خولا پیشەكاران و چەند بابەتێن دی یێن جودا گەنگەشە بكەت.
ئەحمەد ئەلموسەوی ئەندامێ‌ فیدراسیونا تەپا پێی یا ئیراقێ‌ و پەیڤدارێ‌ راگەهاندێ‌ دیار كر ئەڤرۆ دێ‌ كۆمبوونەكا بەرفرەهـ یا فیداسیونێ‌ هێتە ئەنجامدان ژبۆ گەنگەشە ل سەر چەند بابەتێن گرێدایی ب تەپا پێی یا ئیراقێ‌ و دووماهی بەرهەڤیێن یانەیێن پشكدار د خولا پیشەكاران دا تایبەت بابەتێ‌ رێپێدانا سیستەمێ‌ ئاسیایی، دیسان ئێك ژ گرنگترین بابەتێن كۆمبوونێ‌ ئاماژە دان ب ئەوێ‌ پشتەڤانییا حكومەتا ئیراقێ‌ بۆ فیدارسیونێ‌ و یانەیێن پشكدار وەكو پێنگاڤا ئێكێ‌ ژبۆ سەركەفتنا خولێ‌ و دیار كر دێ‌ بووجەیەكا تایبەت یا چار ملیار دیناران بۆ یانەیێن پشكدار هێتە راگەهاندن ئەوا حكومەتا ئیراقێ‌ بڕیارا خەرجكرنا وێ‌ دایی پێخەمەت باشتكرنا كاودانێن دارایی یێن یانەیان كو هەر یانەك دێ‌ كۆژمەیەكێ‌ پارەیی وەرگریت ژبۆ چارەسەركرنا هەمی ئاریشەیێن خوە یێن دارایی.
ل دووماهی هەمان ژێدەری دیار كر سەرۆكێ‌ فیدارسیونا تەپا پێی یا ئیراقێ‌ راپۆرتەكا تەسەل ل سەر خولا پیشەكاران دگەل خولا پلا نایاب پێشكێشی سەرۆك وەزیرێن ئیراقێ‌ محەمەد شیاع ئەلسودانی كرییە ئەوێ‌ بەرهەڤی و رازیبوون ل سەر دایی.

دهێتە چاڤەڕێ‌ كرن ئەڤرۆ هەڤڕكیێن قۆناغا سێیێ‌ و بەری دووماهیێ‌ یا قارەمانییا ئیراقێ‌ بۆگشت یانەیێن ل سەر ئاستێ‌ كوڕان و كچان ل پارێزگەها دهۆكێ‌ ل سەر ڕێیا سەرەكی زاویتە، كورا هەتا مانگشێشكێ‌ بهێتە ئەنجامدان و تیما یانەیا دهۆكێ‌ چاڤ ل مسۆگەركرنا ناسناڤێ‌ خوە یە بەری ب دووماهی هاتنا قارەمانیێ‌ ب ئێك قۆناغ، ئەوا دێ‌ بۆ سێ‌ رۆژان بڤی شێوەیێ‌ دیار كر بەردەوامی بیت.
ئەڤرۆ ل دەمژمێر هەشت سپێدێ‌ هەڤڕكی ل سەر ئاستێ‌ تازەپێگەهشتییان و پشكۆژان یێ‌ كت بۆ گشت یاریزانێن یانەیان یا بەریكانەیا 60كم ، دووڤدا بەریكانەیا كت دژی دەمژمێرێ‌ ل سەر ئاستێ‌ تیمێن لاوان بۆ 40كم دێ‌ هێتە كرن.
سوبەهی ل سەر ئاستێ‌ كچان بۆ بەریكانەیا كت بۆ یاریزانێن پێشكەفت و لاوان ب درێژاهییا 50كم، بەریكانەیا دویێ‌ ل سەر ئاستێ‌ لاوان كت دژی دەمژمێرێ‌ بۆ درێژاهییا20 كم.
رۆژا چارشەمبییا بهێت ل سەر ئاستێ‌ كت بۆ گشت یاریزانێن تیمێن پێشكەفتیان بۆ درێژاهییا 140كم كو دێ‌ ل دەمژمێر حەفتی سپێدێ‌ هێتە كرن.
بۆ زانین دڤێ‌ قارەمانیێ‌ دا زێدەتر 220 یاریزان ژ 28 یانەیێن ئیراقێ‌ و كوردستانێ‌ پشكداربن و دەستڤە ئینانا ڤێ‌ قۆناغێ‌ دێ‌ تیما یانەیا دهۆك ناسناڤێ‌ قارەمانییا ئەڤ سالە مسۆگەر كەت پشتی د هەردو قۆناغێن بۆری دا شیابوو رێزا ئێكێ‌ بهێت.
ل دۆر دووماهی بەرهەڤیێن تیما دهۆكێ‌ تارق سەعید راهێنەرێ‌ ئێكێ‌ یێ‌ یانەیێ‌ بۆ رۆژنامەیا ئەڤرۆ گۆت: ئەڤ قۆناغە بوومە هەستیارە و دێ‌ چارەنڤیسێ‌ ناسناڤی دیار كەت ژبەركو د هەردو قۆناغێن ئێكێ‌ و دویێ‌ شیاین رێزێن ئێكێ‌ ل سەر ئاستێ‌ گشتی یێ‌ خالێن یاریزانان ب دەستڤە بینت كو ب رێژەیا 525 خال كۆمكرین، لەورا ئەڤ قۆناغە دهێتە هژمارتن ڤەبڕ بۆ پاراستنا ناسناڤی، بۆ ڤێ‌ ئارمانجێ‌ مە بەرهەڤیێن باش كرینە، ل دووڤ پلان و بەرنامەیێ رۆژانە د راهێنانێن تیۆری و پراكتیكی دا هەمی یاریزانێن مە پێگیر بووینە.
هەروەسان ناڤهاتی گۆت: دێ‌ پێكهاتیێ‌ قۆناغێن بۆری یێن گەنج ژ كوڕێن پارێزگەهێ‌ بیت ئەو ژی ئاریوس سلێمان، محەمەد سادق نوری، یوسف جیهاد، یوسف عەرفان و ئیبراهیم سەمیر، گەشبینم كو هەمی یاریزان رژدن دێ‌ شێن دەستكەفتەكێ‌ دی بۆ پارێزگەها خوە ئینن، یا نوكە ئەم سەر كار دكەین مفایی ژ بەریكانێ‌ وەربگرین ژبەركو ئەم دێ‌ مێڤانداریێ‌ كەن و ئەو رێكا هاتییە دەستنیشانكرن پلانێن باش داناینە كو بهێتە ژبەركرن بۆ چاوانییا بەریكانێ‌، لێ‌ تنێ‌ ترسا مە ئەو ئامێرەیێن پایسكلانە ژبەركو 70 سەد هاریكارە بۆ یاریزانی و هەر شاشیەك یان ئالۆزیەك بكەڤیتە د پایسكلێ‌ دا یاریزان چەند چەستە و شارەزاهییا وی بەرهەڤبیت دی ژ رێزێن ئێكێ‌ بێ‌ بەهربیت.

فیدراسیونا تەپا پێی یا ئیتالیا راگەهاند دۆبارە گۆلپارێزێ‌ ئەفسانە جیانلویجی بۆفۆن ڤەگەڕیا د ناڤ رێزێن هەلبژارتیێ‌ ئتیالیا پشتی كاروانێ‌ خوە یێ‌ تەپا پێی ب دووماهی ئینایی.
رۆژنامەیا سپۆرت یا ئیتالی دیار كر فیدارسیونا تەپاپێی ب فەرمی داخواز ژ گۆلپارێزێ‌ ئەفسانە جیانلویجی بۆفۆن كرییە ڤەگەڕێتە دناڤ رێزێن هەلبژارتیێ‌ ئیتالیا دا لێ‌ نە وەكو یاریزان بەلكو وەك رێڤەبەرێ‌ تیمێ‌ ئەڤچەندە ژی رێزگرتن بۆ كار و خزمەتا وی و مفا وەرگرتن ژ شارەزاهییا وی، ژلایێ‌ خوەڤە بۆفۆنی ئەڤ داخوازییە ب كەیفخوەشی وەرگرتیە و دیار كر ڤەگەڕیانا من بۆ هەلبژارتیێ‌ ئیتالیا هەر ئەو ڤیانا بەری 30 زڤراندیەڤە و خەونا وی بجهـ هاتی وەكو كارگێری ژی خزمەتا وەلاتێ‌ خوە بكەت.
بۆ زانین بۆفۆن د ژیێ‌ 45 سالی دا و بەری دو حەفتییان كاروانێ‌ خوە یێ‌ تەپا پێی ب كۆمەكا مەزن یا ناسناڤان ب دووماهی ئینا، هەر ژ1997 چوویە دناڤ رێزێن هەلبژارتیێ‌ ئیتالیا و 176 یاری ئەنجامداینە.

ستێرا ئەمریكایێ‌ و یاریزانا یارییا تێنسا ئەردی جێسیكا بیگۆلا سەركەفتنێن هەڤڕكا خوە و پلەدارا جیهانێ‌ یا پۆلەندی ئیگا شڤیۆنتینگێ‌ راوەستاندن و شیا دەربازبیتە یارییا دووماهییا قارەمانییا مۆنتریال یا ئەكەندی بۆ دەستڤە ئینانا هزار خالان.
بیگۆلا ئەوا رێزبەندییا سێیێ‌ ل سەر ئاستێ‌ جیهانێ‌ دهێت شیا مفایی ژ خەلەتیێن هەڤڕكا خوە یا پۆلەندی ئیگایێ‌ وەربگریت و ئەوا بۆ ماوەیێ‌ دو دەمژمێر و30 خولەكان ڤەكێشایی و ب ئەنجامێ‌ سێ‌ كۆما بەرانبەر دو كۆمان سەركەڤیت و دەربازبیە یارییا دووماهیێ‌، بڤێ‌ ئەنجامی بیگۆلا شیا سنۆرەكی بۆ پێشكەڤتێن ئیگایێ‌ ب دانیت و دەلیڤە بۆ خوە و هەڤالێن خوە پەیدابكەت ژبۆ سەركێشییا پلەدارییا جیهانێ‌.
یاریزانا ئەمریكایی بۆ ئاژانسا فرنسا پرێس A.F.P گۆت: ئەڤ سەركەفتنە بەرانبەر پلەدارا جیهانێ‌ ب رێزا ناسناڤەكی دهێت، ئێك ژ خوەشترین و ب هێزترین یارییا من بوو د كاروانێ‌ من یێ‌ وەرزشی دا، گرنگییا وێ‌ نە بتنێ‌ سەركەفتن بوو، بەلكو زاخەكا مەزن و هێزەكا دی دا من چنكو من مفا ژ شیان و تەكتیكێن باشترین یاریزانا جیهانێ‌ وەرگرتن دێ‌ كاركەم ناسناڤی ژ ب دەستڤە بینم.