عەبدلقادر ئۆرمانی
تو هەمی دونیای ودونیاژی هەمی توی
و ئەز ژی هێشتا ئێخسیرێ داڤێن تەمە
تو ئەو دەریا عشقا دل تێدا نوقومبووی
بێ تە ئەز نینم و ب تە ئەز هەر هەمە
:
تو بوهاری ودێمێ تەیە باغچە و گولزار
و ئەز باغچەڤانم ب جانێ خو ئامادەمە
تو ئەو خەونی یا ژێبرین خەم و ئازار
بێ تەز رێ بەرزەكێ سادە و ساوێلكەمە
تو ئاوینەی وبدیتنا تە بجهدهێن ئاوات
و ئەز ژی ڕێڤنگەكێ ب چەك و خامەمە
تو ئەو وەلاتی یێ ئەز بۆ تان وكەلات
بێ تە ژیان پێنووسەكێ بێ بەرهەمە.
دیدار، سالار محەمەد دۆسكی:
پێشمەرگێ هەرد و شۆڕەشێن ئیلۆن و گولانێ محەمەد ئسماعیل زڤنگی دۆسكی یێ بەرنیاس ب محەمەد زڤنگی، ژ دایك بوویێ سالا 1953ێ یە و سالا 1968 چەكێ شەرەفێ هەلگرتیە ل ناف هێزا (هەلگورد) بوویە پێشمەرگە.
محەمەد ئسماعیل زڤنگی د دیدارەكێ دا ل گەل رۆژناما ئەڤرۆ گۆت: بنەمالا مە گەلەك كارتێكرن ل سەر من هەبوو ببمە پێشمەرگە چونكە پێشتر مامێ من پێشمەرگێمن 1961 بوون وسالا 1968 ئەم (16) گەنێن خەلكێ گوندێ (زڤنكێ) ل گەل چووین و بووینە پێشمەرگە چووینە ئیرانێ و چەك هاتە بەلاڤەكرن و چار هەیڤان مە راهێنانێن لەشكری ل دەڤەرا (قاس و ماقوسا) ل سنوری ئەنجامدان نوكە بوویە ناحیە و ئەو دەڤەر نێزیكی بارەگایێ بارزانی بوو، وی دەمی راهێنەرێن مە زێدەتر ئەكادیمی بوون، و پێشتر دناڤا لەشكرێ ئیراقێ دابوون و خودان باوەرنامێن لەشكری بوون وەك (مقدم عزیز، رەشید سندی و گەلەك ئەفسەر) ژی هەبوون و راهێنان ل سەر هەمی چەكی دهاتەكرن، و دووڤدا رەوانەی هێزا(قەرەداغ) هاتینەكرن و (11) هەیڤان مە ئەركێن خوە بجهئینان و (عەریف سلێمان) ئەمر بەتلیون بوو ل گەل (5) سریان پێك دهات و نێزیكی (800) پێشمەرگەیان ل گەل (عەریف سلێمان) بوون، سەركردەكێ گەلەك زیرەك بوو و دهاتە هژمارەتن سەركردێ (3)ی دناڤا شۆڕەشێ دا و گەلەكێ خوشتڤی بوو لنیك (بارزانیێ نەمر)، و دووماهی شەرێ ل گەل حكومەتا ئیراقێ بەری بیانا 11ی ئادارێ بهێتە ئەنجامدان بەتلیونا عەریف سلێمان و بەتلیونەكا دی بوو و فەرماندێ سەرانسەری شەڕی (فاخر مێرگەسوری) بوو، و كارگێری یا ڤی شەڕی (سامی شنگالی) دكر وی دەمی لەشكرێ ئیراقێ بزاڤكر مە ل سنورێ ئیرانێ دا سنورداربكەن، وی دەمی حكومەتا ئیراقێ شكەستن ئینان و نەچاربوو دانوستاندنا بكەت، و ئەڤ شەڕە ئەگەر بوو، مە و لەشكرێ ئیراقێ نەوروزا سالا 1970ێ ل قەلادزێ كر.
پێشمەرگێ ئیلۆنێ و گولانێ محەمەد زڤنكی زێدەتر گۆت: ل شەڕێ 1974ێ ژی دووماهی شەڕ بوو مە ئەنجام دا و مە (24) شەهید دان و (21) پێشمەرگە برینداربوون، وی دەمی ئامر بەتلیونا مە (عەریف سلێمان) بوو ل گەل بەتلیونا (سەیدێ عەبوش) وی شەری دا ئەز برینداربووم وێ سالێ رێككەفتنا جەزائیر چێبوو، شەر ل بلنداهی یا زووزكی بەرامبەر حەسەن بەگی بوو و حكومەتێ گەلەك ڤیا وی سەری ژ مە بستینت دگۆتنێ(سەركیس) هنداڤی دەشتا (دیانا) ئەگەر ژ مەستاند با هاتن و چوونا دەڤەرا بەهدینان هەمی داهێتە بڕین، چونكە ئەڤ جهە گەلەكێ زالە ل سەر هەمی دەڤەرێ و رێككەفتنا جەزائیر شەر راوستیا وی دەمی بەتلیونا (حمە شامیران) خەلكێ (دەربەندیخان) بوو ژی بەرهەڤ بوو و جەنازێن لەشكرێ ئیراقێ مابوونە بن بەفرێ ڤە و ب میتران بەفر كەفت بوو هەتا هەیڤا ئادارێ رێككەفتنا خیانەتكاری یا جزائیر چێبووی، و رێك هتانەگرتن و مەزانی ئەڤە ژ هێزا شۆڕەشێ مەزنتربوو.
هەمان پێشمەرگە گۆت: سالا 1978 پێشمەرگەیێ قیادا موئەقەت پەیدابوو و پێشمەرگە ژ سوریێ بۆ دەڤەرێ بۆ توركیا هات و هاتە ناڤا ئیراقێ، مالا مە ل گوندی بوو ل خانیێ مامێ خوە دا بووم جارەكێ دو زەلام هاتنە بەردەرگەهی نە خەلكێ دەڤەرێ بوون، ئێك(سورانی و ئێك میرانی) بوو و داخازا مامێ من كر، و من گۆتێ مالا خوە بریە دهۆكێ و پشتی روینشتنێ بەحسێ خەباتا مامێ من كر، و خودا نیاسین كو پێشمەرگەیێ قیادا موئەقتن (2) كاسێتن (شڤان پەروەر) دیاری رادەستی من كرن، و دبنە ئێكەم كاسێتێن ڤی هونەرمەندی بهێنە دەڤەرێ ل ئەلمانیا هاتبوونە تۆماركرن، و خواستن بەلاڤە بكەین و چەندین جاران هاتن و چوون كر و چەقێن خوە بەرفرەهكرن ل گوندێن دەڤەرێ و من هاریكاری گەلەك كر، و هێشتا چەكێ من مابوو، وی دەمی حكومەتا ئیراقێ ل دەڤەرێ نەبوو پشتی هاتنا ئەڤان مەفرازن حكومەتا ئیراقێ ل دەڤەرێ دیار بوو.
محەمەد ئسماعیل زڤنگی گۆت: كاسێتێن (شڤان پەروەر) ل دهۆك من بەلاڤەكرن و پێشتر نەبوون و بتنێ من لنیك (رەشید ئاغای) دیت بوون، گۆتە من بوو من ژ ئەلمانیا هاتینە تە ژ كیڤە ئیناینە من گۆتێ (هەڤالان) ئیناینە گۆت پەیدا بووینە هەڤال من گۆتێ بەلێ وی دەمی ئەڤ دەنگە هێزا شۆڕەشێ بوو، و ژ ئەڤان سالان و هەتا سالا 1982ێ رێكخستنێ جارەكا دی خوە نووكرنە ڤە، و سالا 1982ێ دەسپێكا شەڕێ ئیراقێ و ئیرانێ پێشمەرگە ل دەڤەرێ ئاشكرا بوون، و گەلەك ژ لەشكریێ رەڤین هاتنە دەڤەرێ و گوندێ مە چەند گوندی هەبوون هند ژ لەشكریێ و پێشمەرگە تێدا هەبوون.
زڤنگی ئەو ژی گۆت: ل شۆڕەشا 26ی گولانێ ل سالا 1979ێ بەری نەوروزێ ب چەند رۆژان ئێكەم عەملیاتا پێشمەرگە ل دەڤەرا دۆسكییا ئەنجامدای عەملیاتا گوندێ (بەربانكێ) بوو، مە چەند بازووك دسەر رەبیێ را هاڤێن وەك ڕاگەهاندنەك بۆ دوژمنی و رەبیێ بەرسڤ نەبوو، وی دەمی جندیەكێ كورد ل دەستیردانێ بوو و رۆژا دی ڤەدگەریت و دبینت یێ چەپەرێن خوە باشتر لێ دكەن، وی ژی ئاگەه ژ بابەتی نەبوو چونكە دەستیردان هەبوو، و گۆت ئەڤە خێرە جندیەكێ عەرەب دبێژیتێ هوون موخربن و دێ تە كەەمە دڤی زیارەتی دا، و ئەڤە دچیتە سەرێ جندیێ كورد دا وێ شەڤێ دبیتە زێرەڤانیا جندیێ كورد و (12) جندیێن عەرەب ل گەل بوون، ئەو ژی وێ شەڤێ هەر (12) جندیێن عەرەب دكوژیت و چیتە بن پرا (بەربانكێ) هەتا سپێدێ ترۆمبێلا ئەرزاقی دهێت و سەر بابەتی هەل دبیت و جندیێ كورد دهێـتە دەستەسەركرن و دووڤدا رەوانەی چەندین زیندانا كر و راپورتێن پزیشكی دیار كر كو صەرع هەیە، لێ نە وی ئاستی و دادگەهێ بڕیارا سێدارێ بۆ دەرچوو و نوكە ل كوردستانێ مووچێ شەهیدی بۆ هاتیە چێكرن وەردگریت.
سەرۆك مەسعود بارزانی ب هەلكەفتا وەغەركرنا روناك عەبدولواحد، هەڤژینا د. فوئاد مەعسووم سەرۆك كۆمارێ پێشتر یێ ئیراقێ، پەیامەكا بەهیداریێ ئاراستەی د. فوئاد مەعسووم دكەت و تێدا هاتیە» ب مخابنیەكا مەزن ڤە دەنگوباسێ وەغەركرنا هەڤژینا هەوەیێن بەرێز (روناك عەبدولواحد) گەهشتە مە. سەرەخوەشیێ ل هەوەیێن بەریز و كەسوكارێن هەوە دكەم و خوە ب هەڤپشكێ خەما هەوە دزانم».
سەرۆك بارزانی گوت ژی» ژ خودێ مەزن دخوازم گیانێ رەحمەتی روناك عەبدولواحد ب بەهەشتا بەرین شاد بكەت و هەدار و ئارامیێ ب هەموو ئالیەكی ببەخشیت».
سەرۆكێ هەرێما كوردستانێ، نێچیرڤان بارزانی پێشوازی ل دەیڤد بێركەر، كاربڕێكەرێ كاروبارێن بالیۆزخانەیا ئەمریكا ل ئیراقێ كر .
د كۆمبوونەكێ دا پەیوەندیێن بەغدا و هەولێرێ و دانوستاندنێن چارەسەركرنا كێشەیێن د ناڤبەرا وان دا، ڕەوشا ناڤخوەیا هەرێما كوردستانێ و گرنگیا چارەسەركرنا كێشەیان، هەلبژارتنێن پەرلەمانێ كوردستانێ، ڕەوشا شنگالێ و پێكهاتەیێن ئایینی، هاتنە باسكرن وبێركەر خوەشحالیا خوە ب دیاركرنا ڕۆژا هەلبژارتنێن پەرلەمانێ كوردستانێ دیاركر و نێچیرڤان بارزانی ژی سەرەرای پێگیریبوونا هەرێما كوردستانێ ب ئەنجامدانا هەلبژارتنان، سوپاسیا پشتگیریا ئەمریكا ل ئەنجامدانا هەلبژارتنان كر.
هەردوئالی د هەڤڕا بوون ل سەر گرنگیا بجهئینانا ڕێككەفتنا شنگالێ بۆ ئاساییكرنا ڕەوشا وێ دەڤەرێ وپێدڤیا پاراستنا پێكهاتەیێن ئایینی ل ئیراقێ و هەرێما كوردستانێ.
سەرۆكێ حوكمەتا هەرێما كوردستانێ، مەسرور بارزانی پێشوازی ل ئێرڤن هیكس قونسۆلێ گشتیێ ئەمریكا ل هەرێما كوردستانێ كر كو ب هەلكەفتا ب دووماهی هاتنا ئەركێ وی سەرەدانا سەرۆكێ حوكمەتێ كربوو.
د كۆمبوونەكێ دا مەسرور بارزانی سەرەرای ئاماژەدانێ ب گرنگیا پەیوەندیێن دۆستانە و دیرۆكی د ناڤبەرا هەرێما كوردستانێ و ئەمریكا دا، سوپاسیا قونسۆلێ گشتیێ ئەمریكا كر بۆ كاركرن و بزاڤێن وی ژ پێخەمەت پێشڤەبرنا پەیوەندیێن دو ئالی و هیڤیا سەركەفتنێ بۆ ئەركێ وی یێ داهاتی خواست.
قونسۆلێ گشتیێ ئەمریكا سوپاسیا خوە بۆ سەرۆكێ حوكمەتا هەرێمێ و ئالیێن پەیوەندیدارێن حوكمەتێ دەربری كو د دەمێ ئەركێ وی دا پشتەڤانێن وی بوون و هەماهەنگیەكا باش و ب هێز ل گەل قونسۆلخانەیا ئەمریكا هەبوو.
بەرپرسێ مەكتەبا پەیوەندیێن گشتی یا پارتی دیموكراتی كوردستان دبێژیت، ل گەل شاندێ مەكتەبا سیاسی یا پارتی، ب سەرۆكایەتیا فازل میرانی بەرپرسێ دەستەیا كارگێریا مەكتەبا سیاسی، مە سەرەدانا بەغدا كر و چەندین كۆمبوون و دیدار و چاڤپێكەفتنێن گرنگ و چارەنڤیسساز ل گەل حزب و ئالیێن سیاسی یێن ئیراقی هاتنە ئەنجامدان.
جەعفەر ئێمینكی، بەرپرسێ مەكتەبا پەیوەندیێن گشتی یێن پارتی و ئەندامێ شاندێ پارتی ل بەغدا د پێگەهێ خوە یێ تایبەت ل سەر تۆرا جڤاكی یێ فەیسبووكی بەلاڤكر» كۆمبوون د تایبەت دا بوون ب بەرژەوەندیا خەلكێ كوردستانێ ڤە و مە دوپاتی ل سەر بجهئینانا هەموو ڕێككەفتنێن د ناڤبەرا حوكمەتا هەرێما كوردستانێ و حوكمەتا ئیراقێ دا كر».
شاندێ مەكتەبا سیاسی یا پارتی ب سەرۆكایەتیا فازل میرانی، بەرپرسێ دەستەیا كارگێریا مەكتەبا سیاسی و ئەندامەتیا هەر ئێك ژ فوئاد حسێن، هشیار زێباری، پشتیوان سادق، نەوزاد هادی، جەعفەر ئێمینكی، شاخەوان عەبدوللا، بەنگین ڕێكانی، ئومێد سەباح و فارس عیسا دەمێ چەندین ڕۆژان ل گەل ئالیێن سیاسی یێن ئیراقی هەژمارەكا كۆمبوون و دیداران ئەنجامدان.
پشتیوان سادق، ئەندامێ مەكتەبا سیاسی یا پارتی و ئەندامێ شاندێ پارتی ل بەغدا بەری نوكە ڕاگەهاندبوو» پێدڤیە قانوونێن ستراتیژی ب ڕێككەفتن بهێنە دەركرن و پێدڤیە ئەو كێشەیێن د ناڤبەرا بەغدا و هەولێرێ دا هەین ب دانوستاندنێ بهێنە چارەسەركرن» هەروەسا دیاركربوو» مە سۆز وەگرتینە كو هنارتنا شایستەیێن دارایی هەموو مەهان بۆ هەرێما كوردستانێ بهێتە بجهئینان» .
د دووماهی كۆمبوونا جڤاتا وەزیرێن هەرێما كوردستانێ دا ب سەرپەرشتیا مەسرور بارزانی، سەرۆكێ حوكمەتا هەرێمێ و ب بەرهەڤبوونا قوباد تالەبانی، جێگرێ سەرۆكێ حوكمەتا هەرێمێ، ئەنجامێن سەرەدانا شاندێ حوكمەتا هەرێما كوردستانێ بۆ بەغدا هاتنە بەرچاڤكرن كو یا تایبەت بوو ب ڕەشنڤیسا پڕۆژەیێ قانوونا پەترۆلێ و غازێ یا فیدرالی ب هەڤپشكی و پێكڤە د ناڤبەرا حوكمەتا فیدرالی و هەرێما كوردستانێ و پارێزگەهێن ئیراقێ كو بەرهەمهێنەرێن پەترۆل و غازێ نە، ئەوژی پشتبەستن ب مادەیێن دستوروی یێن پەیوەندیدار ب كەرتێ پەترۆل و غازێ ڤە.
سەرۆكێ حوكمەتا هەرێما كوردستانێ سەرەرای دوپاتكرنێ ل وێ چەندێ كو پێدڤیە مادەیێن دستوورێ ئیراقێ یێن تایبەت ب كەرتێ پەترۆل و غازێ ببنە بنەما بۆ ڕەشنڤیسا پڕۆژەیێ قانوونا ناڤبری و هەروەكو د دستووری ژی دا ب ڕۆهنی هاتی، پێدڤیە ئەڤ پڕۆژەیێ قانوونێ ب ڕازیبوونا حوكمەتا فیدرالی و هەرێما كوردستانێ و پارێزگەهێن بەرهەمهێنەرێن پەترۆلا ئیراقێ بیت و ڕەنگڤەدانا بنەمایێن سیستەمێ فیدرالی یا ئیراقی بیت وەكو د دستووری دا هاتیە جهگیركرن.
مەسرور بارزانی، دوپاتی ل وێ چەندێ ژی كر كو پێدڤیە ڕێز ل وان ڕێككەفتنان بهێتە گرتن كو د ناڤبەرا هەرێما كوردستانێ و حوكمەتا فیدرالی یێن تایبەت ب مافێن دستووری یێن هەرێما كوردستانێ هاتینە ئیمزاكرن. هەروەسا جڤاتا وەزیرێن هەرێما كوردستانێ ژی دوپاتی ل گرنگیا هەبوونا قانوونا پەترۆل و غازێ ل سەر ئاستێ ئیراقێ كر ب مەرجەكی ب گۆرەی بنەمایێن ڕێكخستنا ڤی كەرتی وسیستەمێ فیدرالی یێ ئیراقی بیت وەكو د دستووری دا هاتی.
شیرەتكارێ سەرۆكێ هەرێما كوردستانێ بۆ كاروبارێن لەشكری ڕاگەهاند: پشتەڤانی و هاریكاریا هەڤپەیمانان بۆ هێزا پێشمەرگەی دێ بەردەوام بیت، بۆ وێ مەبەستێ ژی ڕێككەفتنەكا ستراتیژی و هەماهەنگیا باش د ناڤبەرا هێزا پێشمەرگەی و هەڤپەیمانان دا هەیە، ژبلی وێ چەندێ ژی پڕۆسەیا چاكسازیێ گەلەك ب باشی و ب گۆرەی خشتەیەكێ دیاركری یا بەردەوامە و هیچ گرفت و ئاستەنگ ل بەردەم نینە و سەرۆكێ هەرێما كوردستانێ ژی وەكو فەرماندەیێ گشتیێ هێزێن چەكدار ب خوە ل سەر هێلە و چاڤدێریا پڕۆسەیا چاكسازیێ دكەت.
بابەكر زێباری، شیرەتكارێ سەرۆكێ هەرێما كوردستانێ بۆ كاروبارێن لەشكری بۆ مالپەرێ فەرمیێ پارتی دیموكراتی كوردستان گوت» هەڤپەیمان د بەردەوامن ل پشتەڤانی و هاریكاریا هێزا پێشمەرگەی و دێ بەردەوام بن ژی، هندەك دخوازن گرژیێ دروست بكەن و دەنگوباسێن بێ بنەما بەلاڤ دكەن، ئەگەر نە هیچ كێشەیەك نینە و هەڤپەیمان دێ بەردەوام بن ل سەر هاریكاری و پشتەڤانیكرنا هێزا پێشمەرگێ كوردستانێ، ل ڤێ دوماهیێ ژی كۆمبوونەكا هەڤپشك هاتیە ئەنجامدان و ڕێككەفتنەكا ستراتیژی و هەماهەنگی د ناڤبەرا پێشمەرگەی و هەڤپەیمانان دا هەیە».
شیرەتكارێ سەرۆكێ هەرێما كوردستانێ بۆ كاروبارێن لەشكری خۆیاكر ژی» ژبلی وێ چەندێ كو پڕۆسەیا چاكسازیێ ل وەزارەتا پێشمەرگەی یا بەردەوامە و ب گۆرەی خشتەیێ دیاركری ژی بڕێڤە دچیت و هیچ ئاستەنگەك ل بەردەم نینە، بەلێ هندەك كەس بۆ مەرەمێن خوە باس ل وێ چەندێ دكەن كو گرفت ل وەزارەتا پێشمەگە هەیە، بەلێ ئەوا هەی وەزیر دەوامێ ناكەت، كار دهێتە كرن وەزیر بهێتە دەوامێ یان ژی كەسەك ب وەكالەت وی پۆستی بڕێڤەببەت، بۆ وێ چەندێ هەماهەنگی زێدەتر هەبیت و كارێ باشتر ژی بهێتە كرن».
بابەكر زێباری ئاماژە كر» سەرۆكێ هەرێما كوردستانێ ب خوە ژی ل سەر هێلێ یە وەكو فەرماندەیێ گشتیێ هێزێن چەكدار، چاڤدێریا پڕۆسەیا چاكسازیێ ژی دكەت و كار گەلەك ب باشێ بڕێڤە دچن و هیچ كێشەیەك نینە».
سەركردەیەكێ هەڤپەیمانیا فەتح ڕادگەهینیت: كۆمبوونا شاندێ پارتی دیموكراتی كوردستان و هەڤپەیمانیا ئیدارەیا دەولەتێ یا ئەرێنی بوو و هەڤپەیمانیا ئیدارەیا دەولەتێ پێشوازیێ ل داخوازیێن پارتی دیموكراتی كوردستان دكەت، هەروەسا گوت: پشكا هەرێما كوردستانێ د بودجەی دا یا هاتیە جهگیركرن.
مەحموود حەیانی، ئێك ژ سەركردەیێن هەڤپەیمانیا فەتح كو ئێك ژ ئالیێن هەڤپەیمانیا ئیدارەیا دەولەتێ یە گوت» كۆمبوونێن شاندێ بلند یێ پارتی دیموكراتی كوردستان ل گەل سەركردەیێن سیاسی و ئالیێن سیاسی یێن ئیراقی گەلەك د ئەرێنی بوون و گەلەك ب گرنگی باس ل وێ سەرەدانێ ل ئیراقێ هاتیە كرن».
گوت ژی» كورد برایێن مەنە و پێدڤیە داخوازیێن وان بهێنە بجهئینان و ب گرنگی ل بەرچاڤ بهێنە وەرگرتن، سەرۆكێ جڤاتا وەزیرێن ئیراقێ و نوری مالكی ژی پێشوازی ل داخوازیێن وان كریە».
هەروەسا ئاماژەكر» كۆمبوونێن شاندێ پارتی و هەڤپەیمانیا ئیدارەیا دەولەتێ د ئەرێنی بوون و هەڤپەیمانیا ئیدارەیا دەولەتێ ژی پێشوازیێ ل داخوازیێن پارتی دكەت» .
وی سەركردەیێ هەڤپەیمانیا فەتح باس ل وێ چەندێ ژی كر» نابیت هیچ داخۆیانیەكا سیاسی ب گرنگ بهێتە وەرگرتن كو ل دژی شایستەیێن دارایی یێن هەرێما كوردستانێ بیت، پێدڤیە تنێ پشتبەستن ب داخۆیانیێن فەرمی بهێتە كرن، وەكو داخۆیانیێن سەرۆك وەزیران، بەلێ پتریا وان داخۆیانیێن ئالیێن سیاسی دبنە ئەگەرێ پەیداكرنا قەیرانان چونكە هەر ئێك بۆ بەرژەوەندیا خوە داخۆیانیان ددەت».
دیاركر ژی» برایێن مە یێن كورد باس ل ڕەشنڤیسێ پڕۆژەیێ قانوونا پەترۆل و غازێ كر، كو ئەڤە ژی پرسەكا گەلەك گرنگە و پێدڤیە د زووترین دەم دا بهێتە دەركرن».
هەروەسا ڕۆهنكر» پارتی و هەڤپەیمانیا ئیدارەیا دەولەتێ ل سەر چەند خالان ڕێككەفتینە، وەكو لەزكرن د دەركرنا قانوونا پەترۆل و غازێ دا، شایستەیێن دارایی یێن هەرێما كوردستانێ، هەروەسا پشكا هەرێما كوردستانێ د بودجەی دا هاتیە جهگیركرن» .
ڤەکۆلەرەکێ ناڤدار دیار دکەت، تورکیا نەشیا ل سووریێ یا سەرکەفتی بیت، نها تورکیا دڤێت هێزێن چەکدارێن سووریێ بکەتە د خزمەتا ئەمریکا دا ئەمریکا وان ل دژی هێزێن سەر ب ئیرانێ ڤە بکار بینیت، ئەو چەندێ دێ ئەنجامێن گەلەک خراب بۆ کوردێن سووریێ ژی هەبیت.
فەهیم تاشتەکین ڤەکۆلەرێ ناڤدار یێ تورکیا راگەهاند، دەمەکە تورکیا کار ل سەر هندێ دکەت دا بشێت ب رەنگەکێ ژ رەنگان خوە ژ قەیرانا نها یا ل سووریێ دوور بکەت، چونکی کاریگەریا قەیرانا نها یا ل سووریێ ل سەر تورکیا ژی زێدە بوویە، یا ئێکێ بابەتێ پەنابەرێن سووریێ یە، چونکی پەنابەر بووینە بارگرانی ل سەر تورکیا و خالا دی ژی تورکیا د قەیرانەکا گەلەک مەزن دایە، ئێدی نەشێت وەکو جاران هاریکاریا گرۆپێن چەکدار ل سووریێ بکەت، بەری نها تورکیا گەلەک بزاڤ کرن کو ب رێیا رۆسیا چارەسەریەکا گونجای بۆ رەوشا سووریێ پەیدا بکەت، لێ رۆسیا خوە ب خودانا سووریێ دزانیت و بەرهەڤ نینە هەبوونا هێزێن تورکیا ل سووریێ قەبوول بکەت، پۆتین بەری نها هۆشداری ژی دایە تورکیا دڤێت د دەمەکێ گونجای دا هەموو هێزێن خوە ژ ئاخا سووریێ ڤەکێشت و د هەمان دەمی دا تورکیا ژی دزانیت هەر گوهۆڕینەک ل سووریێ روو بدەت د رەوشا نها دا بۆ وێ یا باش نابیت، ژ بەر هندێ ژی تورکیا کار ل سەر گوهۆڕینا ستراتیژیا خوە ل سووریێ دکەت.
ناڤهاتی ئەو یەک ژی دیار کریە، نها هەبوونا هێزێن سەر ب ئیرانێ ڤە ل رۆژهەلاتێ سووریێ بۆ ئەمریکا ژی بوویە ئاریشەکا گەلەک مەزن، ب تایبەتی ژی دەمەکە ئیران چەکێ گران و درۆنان ژی ددەتە هێزێن چەکدار و دڤێت هێزێن چەکدار ئێرشی سەربازێن ئەمریکا ل باکور و رۆژهەلاتێ سووریێ بکەن، بەری نها رۆسیا و ئیرانێ بریار داینە ب هەر رەنگێ هەی هێزێن ئەمریکا ل سووریێ دەرئێخنن و ئەو یەک ژی بێگومان بۆ ئەمریکا دێ ئەنجامێن خراب هەبن، د ڤێ خالێ دا تورکیا دڤێت هاریکاریا ئەمریکا بکەت، لەشکرێ ئازاد یێ سووریێ کو هەتا نها تورکیا هاریکاریا وان دکر، هێزەک ئامادەنە، تورکیا دڤێت ئەمریکا وێ هێزێ ل دژی ئیرانێ بکار بینیت و ل هەمبەر دا رێ بدەتە تورکیا دا ئەو ئێرشی هندەک دەڤەرێن رۆژئاڤایێ کوردستانێ بکەت، چونکی تورکیا نەڤێت پەیەدە و هێزێن سووریا دیموکرات بهێز کەڤن.
فەهیم تاشتەکین د دووماهیا ئاخڤتنا خوە دا ئەو یەک ژی دیار کریە، ئێرشێن تورکیا ل سەر رۆژئاڤایێ کوردستانێ د ڤان دەمێن دووماهیێ دا گەلەک زێدە بووینە و ئەمریکا ژی هەتا نها بێدەنگە و چو هەلوەستەکێ توند نینە، ئەو یەک ژی نیشا ددەت ئەمریکا دڤێت ژ بۆ بهێزکرنا پێگەهێ خوە ل سووریێ مفای ژ هەبوونا تورکیا وەربگریت، هەکە تشتەک وەسا روو بدەت ئەو یەک دێ ئەنجامێن گەلەک خراب بۆ کوردان ل سووریێ هەبیتن، وی دەمی دبیت رێڤەبەریا خوەسەر یا باکورێ سووریێ ژی ل هەمبەر ستراتیژیا نوو یا ئەمریکا بەرێ خوە بدەنە رۆسیا، چونکی رۆسیا ل دژی مافێن کوردان ل سووریێ نینە. بەری نها گەلەک جاران وەزیرێ دەرڤە یێ رۆسیا و بەرپرسێن دی یێن وی وەلاتی دیار کرینە، ئەو ل دژی مافێن رەوا یێن کوردان ل سووریێ نینن، لێ دڤێت کورد ژی ئێکگرتی بن و بزانن کا وان چ دڤێت، ئەو یەک دشێت بۆ کوردان ببیتە دەلیڤە ژی، چونکی کورد ل سووریێ د قۆناغەکا گەلەک هەستیار دانە، دەلیڤێن گەلەک باش ل بەر دەستێ کوردان هەنە، لێ د هەمان دەمی دا مەترسیەکا مەزن ژی ل سەر کوردان هەیە، هەکە ئەمریکا ژ بەر بەرژەوەندیێن خوە ل هەمبەر ئێرشێن نها یێن تورکیا بێدەنگ بیت و هەروەسا رێ بۆ تورکیا ژی خوەش بکەت دەست ب ئۆپەراسیۆنەکا نوو ل رۆژئاڤایێ کوردستانێ بکەت، وی دەمی دڤێت کورد ژی هەموو کارتێن د دەستێ خوە دا بکار بینن، چونکی تورکیا ژ بۆ نەهێلانا رێڤەبەریا خوەسەر بەرهەڤە ل گەل شامێ ژی رێککەفتنەکێ ئیمزا بکەت، دڤێت کورد ژی بۆ مانا خوە و بهێزبوونا پێگەهێ خوە یا پێدڤی بکەن، چونکی چو رێیێن دی ل پێشبەری کوردان ل سووریێ نەماینە، هەر کەس بۆ بەرژەوەندیێن خوە دڤێت پێگەهێ خوە ل سووریا نوو بهێز بکەت، کوردان ژی گەلەک قوربانی داینە و ناخوازن جارەکا دی ل سووریێ بێ ماف بژین.
نيشاندان