د بەردەوامیا كۆمبوون و دیداران دا ل گەل تەخ و توێژێن جودا یێن دەڤەرێ د. پشتیوان سادق، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهۆكێ، ل رۆژا 12/8/2023 ل بارەگەهێ مەكتەبا رێكخستنێ پێشوازی ل نڤیسەرێ پرتووكا ئەلبۆما دهۆكا كەڤن (شڤان تەوفیق) و تیپا مللی یا هونەری ل دهۆكێ كر.
نڤیسەرێ پرتووكا ئەلبۆما دهۆكا كەڤن (شڤان تەوفیق) د كۆمبوونا ل گەل د. پشتیوان سادق، بەرپرسێ مەكتەبا رێكخستنا پارتی ل دهۆكێ ب كورتی باس ل ناڤەرۆكا ئەلبۆمێ و گرنگیا پرتووكێ بۆ پاراستنا كلتۆر و شارستانیەتا دهۆكا رەنگین كر، بەرپرسێ مەكتەبا رێكخستنێ سەرباری دەستخۆشی و ئاراستەكرنا رێز و سوپاسان، پشتەڤانیا خوە بۆ نڤیسەرەێ ئەلبۆما دهۆكا كەڤن دیار كر و هیڤیا سەركەفتنێ‌ بۆ خواست.
دیسا هەر ل رۆژا 12/8/2023 د. پشتیوان سادق، ئەندامێ مەكەتەبا سیاسی و بەرپرسێ مەكتەبا رێكخستنا پارتی ل دهۆكێ، ل بارەگەهێ مەكتەبا رێكخستنێ پێشوازی ل ئەندامێن تیپا مللی یا هونەری ل دهۆكێ كر و د روەشتنەكێ دا باس ل رۆلێ هونەرێ مللی ل دەڤەرێ كر، كو د دەمێن بۆری و نها دا خزمەتەكا بەرچاڤا هونەرێ مللی و پاراستنا كلتۆرێ كوردی ل سەر دەست و ماندیبوونا ڤێ تیپێ هاتیە كرن و گۆت: «ئەم پشتەڤان و هاریكارین پێخەمەت زێدەتر خزمەتكرنا هونەرێ مللی ل دەڤەرێ».

هەولێر، قائیدمیرۆ:

پەیڤدارێ دەستەیا گەشتوگوزارێ ل هەرێما كوردستانێ‌ ئاشكرا كر، ئەڤ سالە هاتنا گەشتیاران ب شێوەیەكێ بەرچاڤ زێدەبوویە و دبێژیت: هەموو بزاڤەك دهێتە كرن سال بۆ سالێ رێژەیا هاتنا گەشتیاران بهێتە زێدەكرن ئەو ژی ب ئەنجامدانا چەندین پڕۆژەیێن گەشتیاری.
ئیبراهیم عەبدولمەجید، پەیڤدارێ دەستەیا گەشتوگوزارێ بۆ رۆژناما ئەڤرۆ دیار كر، ل دەستپێكا ئەڤ سالە هەتا دوماهیا مەها خزیرانێ زێدەتری چار ملیۆن 500 هزار گەشتیاران ل دەڤەرێن جودایێن ئیراقێ سەرەدانا جهێن گەشتیاریێن هەرێما كوردستانێ كریە و گۆت: «پتریا وان گەشتیاران ژی یێن پارێزگەهێن باشوور و ناڤەڕاستا ئیراقێ بووینە، هاتنا گەشتیاران د ئەڤ سالە دا گەهشتیە ئاستەكی، كو بەری نوكە چو سالەكێ وەكی ئەڤ سالە گەشتیاران سەرەدانا هەرێما كوردستانێ نەكریە، ئەڤە ژی پێنگاڤەكا باشە بۆ ڤەژاندنا كەرتێ گەشتیاری و گرنگیدان ب كەرتێ گەشتوگوزاری».
ئیبراهیم عەبدولمەجید گۆتژی: «ل گورەی پلانا ژ لایێ حوكمەتا هەرێما كوردستانێ ڤە هاتیە دانان، پێدڤیە سال بۆ سالێ رێژا گەشتیاران بهێتە زێدەكرن، ئەو ژی ل گورەی ئەڤێ پلانێ دێ چەندین خال هێنە بجهئینان، ژ وان ژی: ئەنجامدانا پڕۆژێن گەشتیاری و ئاسانكاریان بۆ گەشتیاران و هاندانا كۆمپانی و جهێن گەشتیاری بۆ راكێشان و ئینانا گەشتیاران، كو زێدەبوونا هەژمارا گەشتیاران دێ كارتێكرن ل سەر كەرتێ ئابووری و پەیداكرنا دەلیڤا كاری ژی هەبیت».

سەرۆكێ باژێرڤانیا فەیدیێ ڕاگەهاند، ب گوژمێ 11 ملیار دیناران ل سەر بودجەیا پارێزگەهێن دهۆكێ‌ و نەینەوا جاددەیێن ناڤخوە و ئاڤەرۆیان ل فەیدیێ د قووناغا بجهئینانێ دانە و هەتا نوكە نێزیكی 15% كار تێدا هاتیە كرن.
باوەر سەگڤان، سەرۆكێ باژێرڤانیا فەیدیێ دیار كر، هەتا نوكە چەندین جاددە ل كۆمەلگەها دومیز و ناوچەداریا فەیدیێ هاتینە دروستكرن و بەردەوام كار ل سەر دروستكرنا پڕۆژەیێن خزمەتگوزاری دهێتە كرن.
ناڤهاتی گۆت: «قوتابخانەكا 12 پۆلی، باخچەكێ زارۆكان ل دومیز، بنگەهەكێ ساخلەمیێ و عمبارەكا ئاڤێ دێ هێنە دروستكرن».

ئامێدیێ، مەحمود نهێلی:

ژ ئەنجامێ‌ كەفتنا دو گوللە تۆپان ل نێزیك گوندێ‌ گوهەرزێ‌ ل سنوورێ‌ ناوچەداریا دێرەلۆكێ‌ ئاگرەكێ‌ مەزن دروست بوویە، د ئەنجام دا ژی رێژەكا زۆرا دارستان و رەزێن گوندیان هاتینە سۆتن.
ئەحمەد سەعدوللا، هەلبژێرێ‌ گوندێ‌ گوهەرزێ‌ بۆ رۆژناما ئەڤرۆ دیاركر، دوهی دو گوللە تۆپ ل نێزیكی رەزێن وان ل نێزیك كۆگەها ئاڤا دێرەلۆكێ‌ كەفتینە و گۆت: «د ئەنجامێ‌ ڤێ‌ تۆپبارانێ‌ دا ئاگرەكێ‌ مەزن دروست بوویە و رێژەیەكا زۆرا دارستانێ‌ و رەزێن وەلاتیان هاتینە سۆتن».
ناڤبری دیار كر ژی، خەلكێ‌ دەڤەرێ‌ چوون ئاگری ب ڤەمرینن و هەتا رادەیەكی كونترۆل ل سەر كریە و نەهێلایە ئاگر مەزنتر لێ‌ بهێت و زیانێن زێدەتر بگەهنە خەلكی و رەزێن وەلاتیان و گۆت: «ئەم هیڤیدارین دەمێ‌ ئاگرەك ل دەڤەرێ‌ دروست ببیت، ب تایبەتی ژی ل دارستانێ تیمێن ئاگرڤەمراندنێ‌ زوو بگەهنە جهێ‌ روودانێ‌ بۆ وێ‌ یەكێ‌ بهێتە كونترۆلكرن، چونكی د چەند خۆلەكان دا ئاگر گەشێ‌ دكەت و ل بن كونترۆلێ‌ دەردكەڤیت».

دهۆك، لەزگین جوقی:

سەرۆكێ‌ باژێرڤانیا بجێلێ‌ بۆ رۆژناما ئەڤرۆ دیار كر، پلانا چێكرنا جۆتسایدێ‌ بجێلێ‌ هەر ژ دەڤەرداریا ئاكرێ‌ هەتا دگەهیتە سەنتەرێ‌ ناوچەداریێ‌ هاتیە دانان، ئەڤ پڕۆژە ب گوژمێ‌ ملیار دیناران دێ‌ هێتە بجهئینان.
هێمن سەلیم خان، سەرۆكێ‌ باژێرڤانیا بجێلێ‌ خویا كر، دەست ب چێكرنا پڕۆژەیێ‌ جادەیان ل بجێلێ‌ هاتیە كرن، نوكە ژی پلان هاتیە دانان بۆ چێكرنا پڕۆژەیێ‌ جۆتسایدی هەر ژ دەڤەرداریا ئاكرێ‌ هەتا دگەهیتە بجێلێ‌ هەموو دێ‌ بیتە جۆتساید ب باشترین شێوە و ستاندەرد دێ‌ هێتە چێكرن و گۆت: «ئەڤ پڕۆژە كەفتیە د پلانا سالا بهێت دا و ب گوژمێ‌ ملیار دیناران دێ‌ هێتە دروستكرن».
ئاشكرا ژی كر، ئەڤ پڕۆژە ب فرەهیا 30 مەتران دێ‌ هێتە چێكرن، د ناڤ پڕۆژەی دا داروبار و كەسكاتی و روناهی و قەنتەر و هەموو خزمەت دێ‌ هەبن.