ئهڤرۆ:
كۆمبوونا نه فهرمی یا جڤاتا ئاسایشێ یا نهتهوهیێن ئێكگرتی سهبارهت ب خوهنیشادان و ئالۆزیێن ل ئیرانێ برێڤه چوو و تێدا داخواز ژ وهلاتێن جیهانێ هاته كرن كو ل ههمبهر كوشتنا وهلاتیێن سڤیل ل ئیرانێ بێدهنگ نهمینن و ههروهسا داخواز هاته كرن وهلاتێن جیهانێ بالیۆزێن خوه ژ ئیرانێ ڤهكێشن.
كۆمبوونا نه فهرمی یا جڤاتا ئاسایشێ یا نهتهوهیێن ئێكگرتی سهبارهت ب خوهنیشادان و ئالۆزیێن ل ئیرانێ برێڤه چوو و تێدا ئهمریكا و هژمارهك ژ وهلاتێن ئۆرۆپا ب توندی ههلوهستێ ئیرانێ ل ههمبهر خوهنیشادهران شهرمزار كرن و داخوازا سزادانا ئیرانێ كرن و ههلگرا خهلاتا نۆبل یا ئاشتیێ ژی داخواز كر كو وهلاتێن جیهانێ ههلوهستهكێ توند ل دژی ئیرانێ وهربگرن و بالیۆزێن خوه ژ ئیرانێ ڤهكێشین.
شیرین عهبادی راگههاند كو ههتا نها ژی هندهك ژ وهلاتێن ئێكهتیا ئۆرۆپا وهسا هزر دكهن كو دهستههلاتا نها یا ئیرانێ دشێت هندهك گوهۆرینان بكهت، لێ ئهو گهلهك شاش هزر دكهن چونكی د دهمێن ٤٣ سالێن بۆری دا بۆ ههر كهسهكێ هاتیه سهلماندن كو دهستههلاتا نها یا ئیرانێ ب چو رهنگهكێ ناهێته گوهۆرین و نها ژی دهستههلاتدارێن ئیرانێ ب ههموو رهنگهكێ خهلكی سهركوت دكهن، ئهو ژ بۆ مانا خوه ل سهر دهستههلاتێ ههر كارهكێ دكهن، د دهمێ ٤٥ رۆژێن بۆری دا پتر ژ چارسهد كهس ل ئیرانێ هاتینه كوشتن و ههتا نها ژی دهستههلاتا ئیرانێ بهرههڤ نینه كو گۆهداریا خهلكی بكهت و ب گوللهیان بهرسڤا داخوازیێن خهلكی یێن بۆ ئازادیێ دهێنه دان، ژ بهر هندێ ژی دڤێت ئێدی وهلاتێن جیهانێ ل ههمبهر كوشتنا خهلكێ ئیرانێ بێدهنگ نهمینن، ٤٣ سالن گهلێن ئیرانێ د رهوشهكا گهلهك خراب دا دژین و نها گهلێن ئیرانێ داخوازا مافێن خوه دكهن، داخوازیا ئازادیێ دكهن لێ ههر كهسێ دیت كا چاوا هێزێن ئێمناهیێ ب گوللهیان بهرسڤا خهلكی دا.
شیرین عهبادی ئهو یهك ژی دیار كر كو دڤێت د پێنگاڤا ئێكێ دا وهلاتێن جیهانێ ب تایبهتی ژی وهلاتێن كو ههر رۆژ بهحسێ ئازادیێ و مافێن مرۆڤی دكهن بالیۆزێن خوه ژ ئیرانێ ڤهكێشن، دڤێت ئێدی ب كریاری هندهك تشت ل دژی دهستههلاتا نها یا ئیرانێ بهێنه كرن و گۆت: (خهلكێ ئیرانێ چاڤهرێی پشتهڤانیا وهلاتێن رۆژئاڤایی نه، خهلكێ ئیرانێ داخوازا ژیانهك باشتر بۆ خوه دكهن، رهوشا ئیرانێ گهلهك خرابه، بارێ ئابووری یێ خهلكی نها گهلهك خرابه و رێژهیا ههژاریێ گهلهك زێده بوویه، براستی ژی ئێدی خهلك نهشێن ل ئیرانێ بژین، ژ بهر هندێ ژی دڤێت ئهمریكا و وهلاتێن ئێكهتیا ئۆرۆپا ب توندی دهست ب سزادانا ئیرانێ بكهن، چونكی ههلوهستێ ههتا نها یێ وهلاتێن ئێكهتیا ئۆرۆپا و ئهمریكا د ئاستێ پێدڤی دا نهبوویه).
نيشاندان