ب چاڤدێری و ئامادەبوونا د. عەلی تەتەر، پارێزگارێ دهۆكێ و ئەدریان شیلیشتان، قونسلێ گشتی یێ هۆلەندا ل هەولێرێ و سەباح بەیتوللا، جێگرێ بەرپرسێ مەكتەبا ڕێكخستنا پارتی ل دهۆكێ و د. نەوزاد عەبدوللا، بەرپرسێ لقێ ئێك یێ پارتی و د. داود سلێمان، سەرۆكێ زانكۆیا دهۆك و چەندین دەڤەردار و ڕێڤەبەر و جرتیارێن دەڤەرێ، زانكۆیا دهۆك ب هەڤكاری ل گەل ڕێڤەبەریا گشتی یا چاندنێ و ب پشتەڤانیا قونسلخانا گشتی یا هۆلەندا ل هەولێرێ، دوهی 15/12/2025 ئێكەم فەستیڤالا بەرهەمێن پتاتان ل پاركا تەنشت دهۆك مۆل هاتە ڤەكرن و بۆ دەمێ‌ سێ ڕۆژان دێ یا بەردەوام بیت.
پارێزگارێ دهۆكێ د پەیڤەكێ دا بناڤێ خەلكێ پارێزگەهێ سوپاسیا پشتەڤانیا سەرۆكێ حكومەتا هەرێما كۆردستانێ كر كو ل گەل حكومەتا هۆلەندا بەردەوام پشتەڤان و ڕێ خۆشكەربوویە بۆ ئەنجامدانا پڕۆژەیێ وان یێ پشتەڤانیا بەرهەمێ پتاتان ل هەرێما كوردستانێ، هەروەسا سوپاسیا حكومەتا هۆلەندا و وەبەرهێنەرێن دەڤەرێ و هەمی ڕێكخەرێن فەستیڤالێ كر و پشتەڤانیا حكومەتا هەرێمێ‌ بۆ وان كەسێن د بیاڤێ‌ چاندنێ‌ دا كار دكەن دوپاتكر و گۆت: «بەرهەمێ پتاتێ 75% ل سەر ئاستێ هەرێمێ و 65% ل سەر ئاستێ هەمی ئیراقێ ل پارێزگەها دهۆكێ یە، شارەزایێن د ڤی بیاڤی دا شیاینە ل پارێزگەها دهۆكێ دو جۆرێن تۆڤێ پتاتا دروست بكەن».

ئامێدیێ، مەحمود نهێلی:

ب بەرهەڤبوونا بەهرام عریف یاسین، بەرپرسێ لقێ 18 یێ پارتی ل ئامێدیێ‌، 111 سالیا سێدارەدان و شەهیدكرنا «شێخ عەبدولسەلام بارزانی» و هەڤالێن وی، د ڕێورەسمەكی دا ل ژێر چاڤدێریا پڕۆفیسۆر دكتورە «ئاری عادل» سەرۆكا زانكۆیا پۆلیتەكنیك یا دهۆكێ‌، و ب سەرپەرشتیا «پ. هـ. د. ئەحمەد فەتاح» ڕاگرێ پەیمانگەهێ، هاتە سخكرن.
بەهرام عریف یاسین، بەرپرسێ لقێ 18 د پەیڤەكێ دا، باس ل شۆڕەش و بەرخودانێن دەڤەرا بارزان و بلندییا هەستێ نەتەوایەتی و نشتیمانی ل وێ دەڤەرێ و قەبوول نەكرنا زۆرداری و بندەستیێ و كەسایەتی و ڕۆل و خەباتا شەهید «شێخ عەبدولسەلام بارزانی» كر.
ناڤهاتی بۆ رۆژناما ئەڤرۆ دیار كر، ئەڤ بیرەوەریە ڕۆژەكا گەلەك گرنگ و دیارە د دیرۆكا بزاڤا ڕزگاریخوازیا كوردستانێ دا و گۆت: «شێخێ مەزن، عەبدولسەلام بارزانی پرەنسیپێن وەكو: خوداناسی، ژینگەهپارێزی و مرۆڤدۆستی بەری 100 سالان دانان و ئەڤە دووربینی و ژیواربینیا شێخ عەبدولسەلامی دەردئێخن، دیسا پەیاما وی سنۆرێ هۆز و پارچەیێن دی یێن كوردستانێ دەربازكر و خەلكەكێ گەلەك زۆر ل دۆر ڕێبازا وی كۆمبوون».
بەرپرسێ لقێ گۆتژی: «نوكە جەنابێ سەرۆك بارزانی سەركێشیا ڤێ ڕێبازێ دكەت و بۆچوونێن وی ژبۆ چارەسەركرنا قەیرانێن وەلات و ئاریشەیێن ناڤمالا كوردی ل پارچەیێن دی یێن كوردستانێ، ژ لایێ ناڤەندێن نێڤدەولەتی ڤە دهێنە بەرچاڤ وەرگرتن».

زاخۆ، دلۆڤان هالۆ:

زانكۆیا زاخۆ ل ژێر درووشمێ «ژ پرتووكخانێن ستافێ‌ زانكۆیێ بۆ پرتووكخانا گشتی یا چەمچەمال» دوهی 15/12/2025 چالاكیەكا بەخشینا پرتووكان ئەنجام دا.
د. دیار عەبدولكەریم، سەرۆكێ زانكۆیا زاخۆ د كۆنگرەیەكێ ڕۆژنامەڤانی دا دیاركر كو وان وەكو سەرۆكاتیا زانكۆیا زاخۆ، وەكو هەموو خەلكێ كوردستانێ و وەكو ئەركەكێ نەتەوایەتی و زانستی ب فەر دیت پتر ژ دو هزار پرتووكان پێشكێشی پرتووكخانا گشتی یا چەمچەمال بكەن.
سەرۆكێ زانكۆیا زاخۆ گۆت: «وەكو هەڤسۆزی و هەڤخەمیەك، مە ئەڤ كارە ئەنجام دا، كو خەما خەلكێ چەمچەمال خەما مەیە، داخوازێ ژ هەموو خەلكێ كوردستانێ دكەم، هەر ئێك ل دووڤ شیانێن خوە هاریكاربیت، چونكی وەلاتێ مە ئێكە و ئەم هەموو ئێكین».

فارس عیسا، نوونەرێ‌ حكومەتا هەرێما كوردستانێ‌ ل بەغدا، دوهی 15/12 ل نڤیسینەگەها خۆ یا تایبەت، پێشوازی ل میرێ‌ ئیزدیان (حازم تەحسین بەگ) و شاندێ‌ د گەل دا، كو پێكهاتیوو ژ (د. خەلەف شنگالی) شیرەتكارێ‌ جڤاتا سەرۆكاتیا ئیراقێ‌ و بالیۆز (برین میر) ژ وەزارەتا دەرڤە یا ئیراقێ‌ كر و د روونشتنەكێ‌ دا بەحسێ‌ برایەتی و پێكڤەژیانا د ناڤبەرا هەموو ئۆل و نەتەوەیێن ل كوردستانێ‌ دژین هاتە كرن، هەروەسا بەحسێ‌ رۆلێ‌ حكومەتا هەرێما كوردستانێ‌ د بلند هەلسەنگاندنا پێكڤەژیانا هەموو ئۆل و نەتەوەیان هاتە كرن.
هەروەسا دلایەكێ‌ دی دا بەحسێ‌ ژین و ژیارا ئاوارەیێن ئێزدی ئەوێن ل كەمپێن كوردستانێ‌ دژین هاتە كرن و داكوكی ل سەر وێ‌ چەندێ‌ هاتە كرن، كو پێدڤیە هەموو بزاڤ بهێنە كرن بۆ باشكرنا ژین و ژیارا وان ئاوارەیێن هەتا نوكە د ناڤ كەمپان دا دژین، ل دووماهیێ‌ ژی بەحسێ‌ رێكەفتنا شنگالێ‌ هاتە كرن، ژ لایێ‌ خۆڤە میرێ‌ ئێزدیان سوپاسیا سەرۆك بارزانی و سەركردایەتیا هەرێمێ‌ كر ژ بۆ پشتەڤانیكرنا وان یا بەردەوام بۆ مافێن هەموو پێكهاتەیێن كوردستانێ‌.
دیسا هەر دوهی (فارس عیسا) نوونەرێ‌ حكومەتا هەرێما كوردستانێ‌ ل بەغدا، پێشوازی ل (محەمەد ئەلحەسان) سەرۆكێ‌ شاندێ‌ نەتەوەیێن ئێكگرتی كر و دروونشتنەكێ‌ دا بەحسێ‌ رەوشا سیاسی ل ئیراقێ‌، ب تایبەت پشتی پەسندكرنا ئەنجامێن هەلبژارتنێن جڤاتا نوونەرێن ئیراقێ‌ هاتە كرن، هەروەسا د لایەكێ‌ دی دا بەحسێ‌ پێكئینانا كابینەیا دەهێ‌ یا حكومەتا هەرێما كوردستانێ‌ هاتە كرن، سەرۆكێ‌ شاندێ‌ نەتەوەیێن ئێكگرتی داكوكی ل سەر وێ‌ چەندێ‌ كر كو پێدڤیە ل دووڤ دستۆری هەموو كێشەیێن د ناڤبەر حكومەتا هەرێما كوردستانێ‌ و حكومەتا ئیراقێ‌ دا بهێنە چارەكرن.

دهۆك، لەزگین جۆقی:

دەڤەرداریا دهۆكێ راگەهاند، 864 خانیێن زێدەگاڤی هاتینە تاپووكرن و هەژمارەكا مامەلەیێن تاپووكرنا خانیێن زێدەگاڤی ل باژێڕێ دهۆكێ هاتینە برێڤەبرن و هنارتن بۆ لیژنا پارێزگەها دهۆكێ.
بریندار حەیدەر، دەڤەردارێ‌ دهۆكێ بۆ رۆژنامەیا ئەڤرۆ گۆت: «لیژنا تاپووكرنا خانیێن زێدەگاڤی ب سەرۆكاتیا مە ل گەل سەرۆكێ باژێرڤانیا ڕۆژهەلات و باژێرڤانیا ڕۆژئاڤا ل دهۆكێ هەژمارەكا مامەلەیێن تاپووكرنا خانیێن زێدەگاڤی یێن خەلكێ باژێڕێ دهۆكێ هاتنە برێڤەبرن و هنارتن بۆ لیژنا بلند ل پارێزگەها دهۆكێ، ب مەرەما تاپووكرنا خانیێن زێدەگاڤی».
ناڤهاتی گۆتژی: «هەتا نوكە ل دهۆكێ (864) خانیێن زێدەگاڤی هاتینە تاپووكرن».