رەمەزان زەكەریا:

ل سنۆرێ دەڤەرداریا ئاكرێ پلان هەیە هەژمارەكا پڕۆژەیان بهێنە بجهئینان و پشتی ئاكرێ بوویە باژێڕەكێ گەشتیاری و پایتەختێ نەورۆزێ پێدڤی ب هەژمارەكا پڕۆژەیان هەیە.
دكتۆر دلاوەر بۆزۆ، دەڤەردارێ ئاكرێ بۆ ئەڤرۆ گۆت: «پشتی ئاكرێ بوویە باژێڕەكێ گەشتیاری و پایتەختێ نەورۆزێ، مە پلانێن دۆمدرێژ داناینە بۆ پتر خزمەتكرنا خەلكێ دەڤەرا ئاكرێ».
ناڤبری گۆتژی: «هەژمارەكا جادەیان ل سەنتەرێ‌ ئاكرێ‌ دێ‌ هێنە چێكرن، وەكو جادەیا 20 مەتری و جادەیا باشقال و پڕۆژەیێن ئۆڤەرپاس و ئەندەرپاس د پلانێدانە چێكەین بۆ پتر خزمەتكرنا خەلكێ خۆ و چێكرنا جادەیا گەلیێ زنتا دێ هێتە چێكرن، ئەڤ جادە دێ بیتە جۆتساید ب درێژاهیا هەشت كیلۆمەتران، دیسا مە پلان هەیە، پتر خزمەتا خەلكێ خۆ ل گوندان بكەین، ئەو گوندین كو رێكێن وان خراب بووین، ئەم دێ رێكێن وان چێكەین و قوتابخانەیان لێ‌ ئاڤاكەین».

ئامێدیێ، مەحمود نهێلی:

دكتۆر عەلی تەتەر، پارێزگارێ دهۆكێ دوهی 30/11/2025 ب هەڤالینیا شاندەكی سەرەدانا دەڤەرا ئامێدیێ كر و ل كۆمەلگەها قەدشێ‌ یا سەر ب ناوچەدارییا سەرسنكێ ڤە ب گوژمێ پتر ژ 12 ملیار دیناران پڕۆژەیێن خزمەتگوزاری ڤەكرن.
د. عەلی تەتەر، پارێزگارێ دهۆكێ د كۆنگرەیەكێ‌ رۆژنامەڤانی دا دیار كر، ب خوشحالی ڤە ئەڤرۆ هەژمارەكا پڕۆژیان ل سنۆرێ دەڤەردارییا ئامێدیێ هاتنە ڤەكرن و گۆت: «دەڤەرا ئامێدیێ دەڤەرەكا بەرفرەهە، ئەڤ پڕۆژە ل سنۆرێ هەموو ناوچەدارییان كەفتینە د خزمەتا وەلاتیان دا، مە كۆمەلەگەها قەدشێ دیار كریە وەكو هێمایەك ب راگەهاندنا ڤەكرنا ڤان پڕۆژەیان، كو ب گوژمێ 12 ملیار و 138 ملیۆن دیناران هاتینە ڤەكرن».
ئاشكرا ژی كر، نوكە هەژمارەكا دی یا پڕۆژەیان ل ژێر بجهئینانێ نە و نوكە هەموو پڕۆژەیان كار تێدا دهێتە كرن و نەهاتینە راگرتن و گۆت: «پڕۆژەیێ رێیا دەڤەرا رێكان ژی ل گەلیێ بالندا ب داوی هاتیە و دێ هێتە ڤەكرن و كەڤیتە د خزمەتا خەلكێ دەڤەرێ دا ل گەل راكێشانا هێلا كارەبێ بۆ وێ دەڤەرێ، د داهاتی دا، هەكە رەوشا ئەمنی دەلیڤەیێ بدەت ئەو جادەیە هەر ل سیدان هەتا دگەهیتە چەمجی دێ‌ هێتە قێركرن و كارەب ژی بۆ هێتە كێشان، داكو پڕۆژە بگەهنە هەموو دەڤەرا نێروە و رێكان و دۆسكی ژۆریان بۆ وێ یەكێ خەلكێ مە یێ وێ دەڤەرێ وەكو هەموو دەڤەرێن دیترێن كوردستانێ ب زڤڕنەڤە سەر گوندێن خوە».
گۆتژی: «ئەم ژ لایێ سەرۆك بارزانی ڤە هاتینە راسپاردن، كو پڕۆژە بۆ بهێنە بەرهەڤكرن و بگەهنە هەموو وان دەڤەران».

دهۆك، لەزگین جۆقی:

ل ناوچەداریا زاویتە یا سەر ب دەڤەرداریا دهۆكێ ڤە دەست ب پڕۆژەیێ تۆڤێ ژیانێ بۆ چاندنا پتر ژ ملیۆن دارێن هەمەجۆر، وەكو: كاژ و سماق و چەندین جۆرین دی یێن داران هاتە كرن، تۆڤێ وان ب رێكا فڕۆكەیان ل چیایێ دهۆكێ هەتا زاویتە دێ هێتە بەلاڤكرن.
نیوار سالح، سەرپەرشتێ پڕۆژەیێ تۆڤێ ژیانێ بۆ چاندنا داران ل دهۆكێ بۆ رۆژناما ئەڤرۆ گۆت: «نوكە هەژمارەكا گەنجان ل ناوچەداریا زاویتە دەست ب بەرهەڤكرنا تۆڤێ‌ چاندنا داران دكەن، ئەڤ پڕۆژە ل نێزیك دێ دەست پێكەت، ل چیایێ دهۆكێ هەتا زاویتە تۆڤێ داران دێ هێتە بەلاڤكرن ب مەرەما زێدەكرنا رێژەیا كەسكاتیێ ل پارێزگەها دهۆكێ، ئەڤ پرۆژە ب هەڤكاری ل گەل ناوچەداریا زاویتە و رێكخراوا زیلا بۆ كارێن مرۆڤایەتیێ دێ هێتە ئەنجامدان».

دهۆك، دلۆڤان ئاكرەیی:

رێڤەبەرێ ناوچەداریا تەناهیێ‌ دیاركر، دەست ب قێركرنا جادەیێن ناڤخۆیی ل كەرتێ 10 دلبێ‌، قووناغا دووێ ل تەناهیێ هاتە كرن، ئەڤ پڕۆژە ب گوژمێ 392 ملیۆن دیناران ل سەر بودجا فرۆتنا پارچە زەڤیان و ب سەرپەرشتیا رێڤەبەریا گشتی یا باژێرڤانیان ل پارێزگەها دهۆكی و سەروكاتیا باژێرڤانیا تەناهی دهێتە بجهئینان.
شەعبان خەلیل، رێڤەبەرێ ناوچەداریا تەناهیێ‌ بۆ ئەڤرۆ گۆت: «دەست ب قێركرنا جادەیێن ناڤخۆیی ل كێڤلا ل پشت پەیمانگەها ڤیا ل تەناهیێ ب گوژمێ 774 ملیۆن دیناران هاتە كرن، پڕۆژە ل سەر بودجا گەشەپێدانا هەرێمێ و ب سەرپەرشتیا رێڤەبەریا گشتی یا باژێرڤانیان ل پارێزگەها دهۆكێ و سەرۆكاتیا باژێرڤانیا تەناهی دهێتە بجهئینان».

هەولێر، قائید میرۆ:

بریكارێ وەزارەتا ئاڤاكرن و ئاكنجیكرنێ ل حوكمەتا هەرێما كوردستانێ راگەهاند، رێیا د ناڤبەرا ئاكرێ بۆ شێخان دێ هێتە چێكرن و سەخبێركرن و دبێژیت: سالا بهێت دەست ب پڕۆژەی دێ‌ هێتە كرن.
دكتۆر ئاگرین عەبدوللا، بریكارێ وەزارەتا ئاڤاكرنێ بۆ رۆژناما ئەڤرۆ دیاركر، پڕۆژەیێ رێیا ئاكرێ هەتا دەڤەرداریا شێخان دێ هێتە ئەنجامدان و قووناغەك ل ئاكرێ هەتا چڕەی و قووناغا دویێ ل چڕەی هەتا دەڤەرداریا شێخان رێك دێ هێتە سەخبێركرن و چێكرن، چونكی بەری نوكە ل هندەك جهان سایدەك هاتیە چێكرن و سایدەك مایە، لەوڕا رێكا د ناڤبەرا ئاكرێ بۆ شێخان ب شێوەیەكێ سەردەمیانە دێ هێتە چێكرن و سەخبێركرن.
بریكارێ وەزارەتا ئاڤاكرنێ گۆت: «دەمێ دەستپێكرنا پڕۆژەیێ رێیا د ناڤبەرا ئاكرێ بۆ شێخان دیارنینە، بەلێ رازیبوون ل سەر هاتیە كرن و دهێتە چاڤەڕێكرن ل سالا داهاتی دەست ب ئەنجامدانا پڕۆژەی بهێتە كرن، پشتی تەمام بوونێ ژی دێ كاریگەری ل سەر هاتنوچوونێ هەبیت، ژ بەركو رێیەكا سەرەكیا نێڤدەولەتیە و هاتنوچوونەكا زۆر ل سەرە».