دهۆك، دلۆڤان ئاكرەیی:

ڕێكخەرێ فەستیڤالا سپیاتیان ل دەڤەرداریا سێمێلێ دیار كر، ل ژێر چاڤدێریا دكتۆر عەلی تەتەر، پارێزگارێ دهۆكێ، و ب سەرپەرشتیا دژوار شەوكەت، دەڤەردارێ سێمێلێ، لژنەیا بلندا فەستیڤالێ، ئامادەكاریێن باش بۆ ئەنجامدانا فەستیڤالا ئێكێ‌ یا سپیاتیان هاتینە كرن و بۆ دەمێ سێ ڕۆژان 20 و 21 و 22/5/2026 دێ‌ یا بەردەوام بیت.
د. ئەسعەد عەلی، ڕێكخەرێ فەستیڤالا سپیاتیان ل دەڤەرداریا سێمێلێ بۆ ڕۆژنامەیا ئەڤرۆ گۆت: فەستیڤال ژ سێ پشكێن سەرەكی پێك دهێت، پشكا ئێكێ: یا تایبەتە ب جۆتیاران ڤە و ئەو بەرهەمێن ب دەستان دهێنە چێكرن، وەك: (ژاژی، پەنیر، ماست و چەندین بەرهەمێن دی یێن خۆمالی).
گۆت ژی: «بۆ پشتەڤانیكرنا كەرتێ چاندنێ و جۆتیاران، نێزیكی 100 خیڤەت بێ‌ بەرامبەر بۆ پشكداران و جۆتیاران هاتینە دابینكرن»

دهۆك، لەزگین جۆقی:

رێڤەبەرێ گشتی یێ‌ ساخلەمیا پارێزگەها دهۆكێ دیار كر كو سێ زارۆكێن نەخۆش ب رێكا ساخلەمیا پارێزگەها دهۆكێ و ل دووڤ پرۆگرامێ هنارتنا زارۆكان، ب مەرەما وەرگرتنا چارەسەریا پێدڤی بۆ نەخۆشخانەیێن ئیتالیا و ب رێكا رێكخراوا هیڤی یا زارۆكان دێ هێنە هنارتن.
د. ئەڤراسیاب موسا، رێڤەبەرێ گشتی یێ‌ ساخلەمیا پارێزگەها دهۆكێ بۆ ئەڤرۆ گۆت: «ئەڤ زارۆكێن نەخۆش دێ بۆ دو نەخۆشخانەیێن ئیتالیا هێنە هنارتن بۆ چاندنا مەژیێ هەستی و بڕبڕا پشتێ، د چارچۆڤێ بەرنامێ حكومەتا هەرێما كوردستانێ دا ب هەڤكاری و پشتەڤانیا ئیتالیا، بەرێ نوكە چار زارۆكین دی ل ئیتالیا هاتینە چارەسەركرن و ل نێزیك دێ ڤەگەڕنە ناڤ كەسوكارێن خۆ ب ساخلەمیەكا باش».
هەژییە بێژین بەری نوكە نەخۆش بو دو نەخۆشخانەیێن ئیتالیا هاتینە هنارتن، لێ پشتی شاندەكێ رێڤەبەریا گشتی ساخلەمیا پارێزگەها دهۆكێ ب سەرۆكاتیا د. ئەڤراسیاب موسا، چووینە ئیتالیا هەژمارا نەخۆشخانەیان هاتیە زێدەكرن، رێكەقتن ل گەل شەش نەخۆشخانەیێن ئیتالیا هاتیە كرن بۆ چارەسەریا زارۆكین نەخۆش.

ئامێدیێ، مەحمود نهێلی:

ژ ئەگەرێ بارینا بارانێن زۆر و دروستبوونا لەهیان و هڕیانا ئەردی زیانێن زۆر گەهشتینە كەرتێ كارەبێ ل سنۆرێ دەڤەردارییا ئامێدیێ و هەژمارەكا زۆرا ستوونێن كارەبێ كەفتینە و مەترسییا كەفتنێ ل سەر هەژمارەكا زۆر یا ستوونان هەیە، رێڤەبەرییا كارەبا ئامێدیێ ژی دبێژیت: پتریا ئەوێن كەفتی هاتینە چارەسەركرن.
ئەندازییار ئارام جەلال، رێڤەبەرێ كارەبا ئامێدیێ بۆ رۆژنامەیا ئەڤرۆ دیار كر، ئەو بارانێن ئەڤ سالە بارین زیانێن زۆر گەهاندینە هەموو كەرتێن خزمەتگوزاری ل دەڤەرێ و گۆت: «هەژمارەكا زۆرا ستوونێن كارەبێ ژ ئەنجامێ بارانێ كەفتن و ئاخ ل بن چوویە و هەژمارەك ژی خوار بووینە و هەژمارەكا دی ژی مەترسییا كەفتنێ ل سەرە»
ناڤهاتی خویا ژی كر، وان ڤەدیتن بۆ وان هەموو جهان كرینە و پارێ پێدڤی ژی بۆ هاتیە خەملاندن و گۆت: «ئەو ستوونێن كەفتین و بووینە ئەگەرێ بڕینا هێلا كارەبێ هەموو هاتینە چارەسەركرن، ئەڤێن مایی ژی ل دووڤ وی پارەیێ بەردەستێ مە و ل دووڤ شیانێن مە ئەم كار تێدا دكەین و ئەڤێن خوار بووین و مەترسییا كەفتنێ ژی ل سەر دهینە ڤەگوهاستن و دهێنە راكرن».

دهۆك، دلۆڤان ئاكرەیی:

وەزیرێ ساخلەمیا حكومەتا هەرێما كوردستانێ دیاركر، بڕیارەكا ب لەز بۆ كۆمكرن و دەست ب سەرداگرتنا جۆرەكێ شیرێ زارۆیان ب ناڤێ (OPTILAC) هاتیە دەرئێخستن، چونكی ڤی شیری چو مۆلەت نینن و ئینانا وی یا قەدەغەیە.
د. سامان بەرزنجی، وەزیرێ ساخلەمیێ‌ بۆ رۆژنامەیا ئەڤرۆ گۆت: «نڤیسارەكا فەرمی ئاڕاستەی هەمی ڕێڤەبەریێن گشتی یێن ساخلەمیێ‌ ل پارێزگەهـ و ئیدارەیێن سەربخۆ هاتیە كرن، كو پێدڤییە كارەكێ ب لەز بهێتە كرن بۆ كۆمكرن و دەست ب سەرداگرتنا شیرێ زارۆیان ژ جۆرێ (OPTILAC) كو بەرهەمەكێ چینییە».
گۆت ژی: «ڤی جۆرێ‌ شیری چو تایبەتمەندی و مۆلەتا فەرمی ژی نینە، هەروەسا ئینانا وان بەرهەمێن خوارنێ یێن چینی یێن شیر تێدا هەی (وەكو خوارن، شریناهی و شیرێ زارۆیان) یا قەدەغەیە».

دلۆڤان ئاكرەیی

بریكارێ وەزارەتا ئاڤەدانكرن و ئاكنجیكرنێ ل حوكمەتا هەرێما كوردستانێ دیاركر، كاركرن د ڕێكا ستراتیژی یا دناڤبەرا هەولێر و دهۆكێ دا پشكا باعەدرێ بۆ ئێتێتێ ب لەزاتیەكا زۆر برێڤە دچیت و٧٥٪ێ كارێن وێ ب دووماهی هاتینە و بڕیارە ژی ئەڤ پرۆژە زووتر ژ ژڤانێ دیاریكری بكەڤیتە د خزمەتا وەلاتیان دا.

د. ئاگرین عەبدوڵڵا، بریكارێ وەزارەتا ئاڤەدانكرن و ئاكنجیكرنێ ل حوكمەتا هەرێما كوردستانێ بۆ رۆژنامەیا (ئەڤرۆ) گۆت: كاركرن ل ڕێكا باعەدرێ بۆ ئێتێتێ بەرەڤ دهۆكێ، گەلەك ژ وی بەرنامەیێ بۆ هاتیە دانان پێشتر كەفتیە و دڤیا تا نوكە ٥٦٪ێ كاران ب دووماهی هاتبا، بەلێ ژبەر لەزاتیا كاركرنێ گەهشتیە ٧٥٪ و ب كوالێتییەكا گەلەك بلند ژی كار دهێتە جێبەجێكرن و بودجەیا ڤی پرۆژێ ستراتیژی نێزیكی ١٣٥ ملیار دینارانە و درێژاهیا وێ ٢٦ كیلۆمەترن و ب دووماهیك هاتنا ڤی پروەژەی دێ مەودایێ دناڤبەرا هەولێر و دهۆكێ كورت بیت و بڕیار بوو ل مەها تیرەمەها سالا بهێت ب دووماهی بهێت بەلێ كار ل سەر پرۆژەی پێشكەفتی یە و ئەگەر كار ب ڤێ لەزاتیا نوكە بەردەوام بیت، دێ گەلەك زووتر تمام بیت.
د. ئاگرین روونكر ژی كو نوكە كارێن بڕین و چێكرنا پردان و پڕكرنێ ب باشی برێڤە دچن، تنێ بارانبارینا زۆر كێمەكێ كار خاڤ كریە، بەلێ دگەل خۆشبوونا سەقای دێ كار لەزاتیەكا پتر ب خۆ ڤە بینیت.