سەرۆكێ ئێكەتیا مامۆستایێن كوردستانێ ئاشكراكر، پێدڤیە مامۆستایێن هەرێمێ ژی ژ زێدەكرنا مووچەیێ مامۆستایان مفاداربن و دبێژیت: سالا بهێت زێدەهیا مووچەیێ مامۆستایان ل ئیراقێ دێ كەڤیتە د بیاڤێ بجهئینانێ‌ دا.
ئەحمەد گەرمیانی، سەرۆكێ ئێكەتیا مامۆستایێن كوردستانێ بۆ رۆژناما ئەڤرۆ دیاركر، هێشتا بڕیارا زێدەكرنا دەرمالێ مامۆستایان ل ئیراقێ نەكەفتیە د بیاڤێ بجهئینانێ دا و گۆت: «بڕیارە ل گەل پەسەندكرنا پڕۆژەقانوونا بودجەیا گشتی یا ئیراقێ‌ بۆ سالا بهێت، بڕیارا زێدەكرنا مووچەیێ مامۆستایان بكەڤیتە د بیاڤێ بجهئینانێ‌ دا و 150 هزار دینار ل سەر مووچەیێ وان دێ هێنە زێدەكرن، پێدڤیە زێدەكرنا مووچەیێ مامۆستایان هەرێما كوردستانێ ژی ڤەگریت، چونكی د دەمێ نوكە دا هەموو لێبڕین و مەزاختیێن مووچەی ژ لایێ بەغداڤە دهێنە ئەنجامدان، لەوڕا هەر زێدەبوونەك هەبیت، دڤێت مامۆستایێن هەرێما كوردستانێ ژی ژێ‌ مفادارببن».
سەرۆكێ ئێكەتیا مامۆستایێن كوردستانێ گۆتژی: «ئەركێ پەرلەمانتارێن كورد و نوونەرێن هەرێما كوردستانێ یە بەڕەڤانیێ ژ مافێن مامۆستایێن هەرێما كوردستانێ بكەن، چونكی هەتا نوكە دیار نینە سەدێ سەد بەغدا دێ پارەی بۆ مامۆستایێن هەرێمێ زێدەكەت یان ژی نە، هەرچەندە ژ لایێ قانوونی ڤە مافێ‌ مامۆستایێن هەرێما كوردستانێ یە».

زاخۆ، دلۆڤان هالۆ:

عومەر ئۆرەی، بەرپرسێ لقێ هەشت یێ‌ پارتی ل ئیدارا سەربخوە یا زاخۆ دوهی 23/11/2025 پێشوازی ل لیوا دلێر فەرزندە زێباری، فەرماندێ ناوچا ئێك یا پاسەوانێن سنۆری و شاندێ د گەل دا كر.
د دیدارەكێ‌ دا بەحس ل دۆسیێن هەڤكاریا هەڤپشك د ناڤبەرا لقێ هەشت و پێكهاتێن پاسەوانێن سنۆری دا هاتە كرن، ب تایبەتی ئەوێن گرێدای ئەركێن فەوجا ئێكێ د پاراستنا ئەمنیەتا سنۆران و بهێزكرنا سەقامگیریێ ل دەڤەرێ، هەر دیسا گەنگەشە ل سەر هەولێن دهێنە دان بۆ پێشئێخستنا كارێ ئەمنی و بلندكرنا ئاستێ هەماهەنگیێ ب رەنگەكی كو پشكداریێ د پشتەڤانیكرنا ئەمنیەتێ و خزمەتكرنا وەلاتیان دا بكەت هاتە كرن.
عومەر ئۆرەی، رۆلێ گرنگێ هێزێن پاسەوانێن سنۆری د پاراستنا سنۆران و رێگریكرن ل دزەكرنێ و پاراستنا سەقامگیریا گشتی دا بلند هەلسەنگاند و دەستخوەشی ل وان كر، دیسا دوپاتی ل بەردەوامیا پشتەڤانیا لقێ هەشت بۆ كار و ئەركێن نشتیمانی یێن ڤان هێزان كر.

دهۆك، دلۆڤان ئاكرەیی:

ڕێڤەبەرێ گشتیێ بازرگانی ل حكومەتا هەرێما كوردستانێ دیار كر، ل ڤان نێزیكان گوژمەكێ دی یێ پارەیێ گەنمێ جۆتیاران دێ هێتە بەلاڤكرن.
نەوزاد شێخ كامیل، ڕێڤەبەرێ گشتی یێ بازرگانی ل وەزارەتا بازرگانی و پیشەسازی یا حوكمەتا هەرێما كوردستانێ بۆ رۆژنامەیا ئەڤرۆ گۆت: «حەفتیا بۆری حوكمەتا فیدرالی بڕیار دا، 500 ملیار دیناران وەكو شایستەیێن دارایی یێن گەنمێ جۆتیارێن ئیراقێ و هەرێما كوردستانێ ب مەزێخیت، هەتا نوكە حوكمەتا هەرێمێ، ژ مەزاختنا وی گوژمێ پارەی نەهاتیە ئاگەهداركرن، هەر دەمێ ئەم هاتینە ئاگەهداركرن، بێ گومان دێ ڕاگەهینین و ل سەر جۆتیاران بەلاڤ كەین».
گۆتژی: «شایستەیێن دارایی یێن ئەڤ سالە یێن جۆتیارێن هەرێما كوردستانێ ل نك حوكمەتا فیدرال، پتر ژ 300 ملیار دینارانە، لێ‌ هەتا نوكە بەغدا ب تنێ نێزیكی 72 ملیار دیناران هنارتینە و پتر ژ 240 ملیار دیناران ل نك حوكمەتا ئیراقێ ماینە».

دهۆك، لەزگین جۆقی:

وەكیلێ میرێ ئێزدیان راگەهاند، د ناڤ حكومەتا نوو یا ئیراقێ دا پێدڤیە ئێزدیان وەزارتەك هەبیت و دبێژیت: ئەم داخوازا مافێن خەلكێ خۆ د ناڤ كابینەیا نوو یا حكومەتا ئیراقێ دا دكەین.
جەهوەر عەلی بەگ، وەكیلێ میرێ ئێزدیان بۆ رۆژناما ئەڤرۆ گۆت: «ئێزدی پێكهاتەكێ ڕەسەنن د ناڤ ئیراقێ دا، ئەم داخواز دكەین د كابینەیا نوو یا حكومەتا ئیراقێ دا وەزارەتەك ب ئێزدیان بهێتە دان، داكو پتر خزمەتا خەلكێ ئێزدی بهێتە كرن و مافێن خەلكێ مە بهێنەدان، نابیت غەدر ل خەلكێ مە بهێتە كرن و پێدڤیە حكومەتا نوو یا ئیراقێ مافێن خەلكێ مە بدەتێ‌«.
گۆتژی: «پێدڤیە حكومەتا بهێت یا ئیراقێ دەست بجهئینانا رێككەفتنا شنگالێ و ئاڤەدانی وقەرەبوویا خەلكێ شنگالێ بكەت».

رەمەزان زەكەریا:

ل سنۆرێ ناوچەداریا قەسرۆكێ یا سەر ب دەڤەرداریا شێخان ڤە ل سەر ئەركێ حكومەتا هەرێما كوردستانێ ب گوژمێ شەش ملیار دیناران پڕۆژەیێن خزمەتگوزاری هاتینە بجهئینان.
مەهران لوقمان نێروەیی، رێڤەبەرێ ناوچەداریا قەسرۆكێ بۆ ئەڤرۆ گۆت: «ل سالا 2025 ب گوژمێ شەش ملیار دیناران پڕۆژەیێن خزمەتگوزاری ل سنۆرێ ناوچەداریا قەسرۆكێ ل سەر ئەركێ حكومەتا هەرێما كوردستانێ هاتینە بجهئینان و هندەك پرۆژان كارێ وان ب دووماهی هاتیە و هندەك ژی د قووناغا بجهئینانێ دانە».
گۆتژی: «ئەو پڕۆژەیێن هاتینە بجهئینان پێكهاتینە ژ قێركرنا رێكێن ناڤخۆیی ل قەسرۆكێ و كۆمەلگەها چڕەی و راكێشانا تۆڕێن ئاڤێ و كۆلانا بیرێن ئاڤێ بۆ 16 گوندێن سنۆرێ ناوچەداریا قەسرۆكێ و گەلەك پڕۆژەیێن دی یێن خزمەتگوزاری».

ئامێدیێ، مەحمود نهێلی:

ژ بۆ پتر گرنگیدان ب كەرتێ گەشتوگوزاری و راكێشانا گەشتیاران بۆ دەڤەرا ئامێدیێ، كاركرن د چێكرنا پرا شیشەیی یا سوولاڤێ بەردەوامە و نوكە گەهشتیە قووناغێن كۆنكریتكرنێ.
بنیامێن حامد، ئەندازیارێ سەرپەرشتێ‌ پڕۆژەی بۆ رۆژناما ئەڤرۆ دیاركر، چێكرنا ڤێ پرێ ل دەڤەرداریا ئامێدیێ، پڕۆژەیەكێ گەشتیاری یە، كو دكەڤیتە سوولاڤێ و گۆت: «نوكە ئەڤ پڕۆژەیە د قووناغێن بجهئینانێ دایە و گەهشتیە قووناغێن كۆنكریتكرنێ و دەمێ جەنابێ پارێزگارێ دهۆكێ سەرەدانا دەڤەرێ كری، بەرێ بنیاتی بۆ هاتبوو دانانان و گوژمێ ئێك ملیار و 740 ملیۆن دیناران بۆ هاتینە تەرخانكرن».
ناڤهاتی گۆت: «بلنداهیا ڤێ پرێ 54 مەترن و درێژاهیا وێ ژی دگەهیتە 93 مەتران و فرەهی ژی دبیتە چار مەتر و دكەڤیتە سیلاڤێ ل هنداڤی رووبارێ ئامێدیێ، پڕ دێ یا پیادە بیت ژ لایێ رۆژئاڤا دێ دەربازی رۆژهەلاتی بیت، مەرەم ژ چێكرنا ڤێ پرێ هەم دێ جوانیەكا تایبەت دەتە وی جهی، هەم ژی دێ بیتە ئەگەرەك ژ بۆ پتر راكێشانا گەشتیاران بۆ دەڤەرێ».