قەیس وەیس:

دووماهی هاتنا یاریێن گەڕا 29ێ‌ ژ خولا ستێرێن ئیراقێ‌ یا فوتبۆلێ‌ ئەنجامێن یانەیێن كوردستانی و ڕێزبەندییا وان د گوهۆڕینێن جودا دا بووینە ئەوێن سەركەڤتنەك، دو خوسارەتی هەبووینە ژبلی یانەیا زاخۆ ئەوا یارییا وێ‌ هاتییە پاشئێخستن.
دهۆك سەركەڤتن ژ بیركرینە
بۆ یارییا سێیێ‌ ل دووڤ ئێك تیما یانەیا دهۆك نەشیا دلێ‌ جەماوەرێ‌ خوە خۆشبكەت و سێ‌ خالێن دی ژی ژ دەستدان پشتی دگەل مێڤانا خوە یانەیا جەوییە ب 2-1 تووشی خوسارەتیێ‌ بووی، هەرچەندە یاری بەر ب وەكهەڤیێ‌ دچوو، لێ‌ ژ خەلەت هاڤێـنا پاسەكا یاریزانێ‌ دهۆكێ‌ یاریزانێ‌ جەوییە مفا ژێ‌ وەرگرت و شیان د خولەكا 90+6 دا گۆلا سەركەڤتنێ‌ بینن و جەماوەرێ‌ دهۆكێ‌ ب خەمباری ژ یاریگەهێ‌ دەركەڤن.
ڕێزكا دی پاشڤەچوو
بڤێ‌ خوسارەتیێ‌ تیما یانەیا دهۆكێ‌ ڕێزەكێ‌ پاشڤەچوو و خالێن وێ‌ مانە 37 خال ڕێزا 12ێ‌ دهێت ژ 10 سەركەڤتن، حەفت وەكهەڤی و 12 خوسارەتییان، یاریزانێن وێ‌ 30 گۆل هەنە د بەرانبەر دا 32 گۆل ل سەر هاتینە تۆماركرن.
ڕاهێنەرێ‌ دهۆكێ‌ لێبۆرین خواست
د كۆنگرەیێ‌ پشتی یاریێ‌ دا ئەحمەد خەلەف ڕاهێنەرێ‌ تیما دهۆكێ‌ لێبۆرین ژ جەماوەرێ‌ یانەیێ‌ خواست و گۆت: مە هەموو بزاڤكرن دڤێ‌ یاریێ‌ دا گرنژینێ‌ و كەیفێ‌ بۆ جەماوەری پەیدابكەین لێ‌ مخابن خوسارەتیەكا ب ئێشە، هەرچەندە تیما مە گەلەك باشتر بوو لێ‌ نەبوونا چەنسی ژی ئێك ژ ئەگەرێن خوسارەتیێ‌ بوو، هەروەسان ئەو شاشیێن كەسۆكی یێن هندەك یاریزانان كو د گەلەك یاریان دا بەردەوامن و نەبوونا گیانێ‌ سەركەڤتنێ‌ ژی ئەگەرەكێ‌ دی یێ خوسارەتیانە، دڤێت كار ل سەر فاكتەرێ‌ دەرۆنی بكەین ژبۆ ڤەگەڕاندنا سەركەڤتنان.
زاخۆ جهێ‌ خوە پاراست
سەرباری تیما یانەیا زاخۆ ل وەلاتێ‌ قەتەر بوویە و یارییا وێ‌ یا ڤێ‌ حەفتیێ‌ هاتبوو پاشئێخستن، ئەوا بڕیار بوو ل باژێرێ‌ بەسرا بەرانبەر یانەیا مینا هاتبا كرن، ژبەر پشكدارییا وێ‌ د كۆپا كەنداڤی دا نە هاتە كرن، تیما زاخۆ ڕێزبەندییا خوە پاراستیە ئەوا ل ڕێزا حەفتێ‌ دهێت ب كۆمكرنا 47 خالان ژ 13 سەركەڤتن، هەشت وەكهەڤی و حەفت خوسارەتی هەنە.
هەولێر چاڤ ل پلێتەكا دەرڤەیە
تیما یانەیا هەولێر بەردەوامە ل سەر ئەنجامێن خوە یێن باش پشتی دڤێ‌ گەڕێ‌ دا ب سەركەڤتی ل سەر ئەلقاسم ب دو گۆلێن پاقژ، ئەڤی ئەنجامی وەكر تیما پایتەختێ‌ كوردستانێ‌ جهێ‌ خوە ل ڕێزا سێیێ‌ ب پارێزیت ب كۆمكرنا 59 خالان ژ 17 سەركەڤتنان، هەشت وەكهەڤی و چار خوسارەتییان، ڕێژەیا گۆلكرنێ‌ ل دەڤ یاریزانێن وێ‌ گەهشتینە 41 گۆلان و 23 گۆل ل سەر هاتینە تۆماركرن.
ئەنجامێن نەورۆز نە جیگیرن
تیما یانەیا نەورۆز نەشیا دڤێ‌ حەفتیێ‌ دا ب سەركەڤیت ئەوا بەرانبەر نەجەف 2-1 تووشی خوسارەتیێ‌ بووی، ئەڤی ئەنجامی نەهێلا ڕێزبەندییەكێ‌ پێشڤەببەت ئەوا ب42 خالان ڕێزا نەهێ‌ دهێت ژ 13 سەركەڤتن، سێ‌ وەكهەڤی و 13 خوسارەتییان.
ژ ئەنجامێن یاریێن دی یێن ڤێ‌ حەفتیێ‌
زەورا 3-چنە كەرخ، كارەبا 1-3 نەفت میسان، مووسل 1-1 ئەمانەت بەغدا، دیالا 1-چنە نەفت، ئەلگەرمە 1-1 شورتە، ئەلغراف1-3 تەلەبە.
گۆلكەرێن پێشیێ پشتی بۆرینا 29 گەڕان
1- شیرزۆد تیمرۆڤ- هەولێر- 22 گۆل.
2- فیدیلیس كۆك- ئەلغراف- 16 گۆل.
3- لیۆنێل ئیتیبا-شورتە- 16 گۆل.
4- عەلا ئەلدالی-مووسل- 14 گۆل.
5- پیتەر گۆرگیس- دهۆك- 12 گۆل.
6- یونس حەمۆد- كەرخ- 11 گۆل.
7- مەحمۆد ئەلمۆاس- شورتە- 10 گۆل.
8- حەسەن عەبدولكەریم-زەورا- 10 گۆل.
هەلوەستێ‌ گشتی یێ‌ ڕێزبەندیێ‌
1- جەوییە 69 خال.
2- شورتە 60 خال.
3- هەولێر 59 خال.
4- تەلەبە 57 خال.
5- زەورا 54 خال.
6- ئەلگەرمە 51 خال.
7- زاخۆ 47 خال كێمترییا یارییەكێ‌.
8- كەرخ 45 خال.
9- نەورۆز 42 خال.
10- دیالا 41 خال
11- نەفت 37 خال.
12- دهۆك 37 خال.
13- ئەلغراف 36 خال.
14- مووسل 36 خال.
15- نەفت میسان29 خال.
16- مینا 28 خال یارییەك كێمتر.
17- ئەمانەت بەغدا 28 خال.
18- كارەبا 27 خال.
19- نەجەف 17 خال.
20- ئەلقاسم ئێك خال.
یاریێن گەڕا 30ێ‌ دێ‌ بڤی شێویی بن
سوبەهی سێشەمبی، نەفت میسان- نەجەف، مینا- ئەمانەت بەغدا،
چارشەمبییا بهێت، تەلەبە- نەورۆز، زەورا- دیالا، مووسل- نەفت، شورتە- ئەلقاسم، كەرخ- ئەلگەرمە.
پێنجشەمبییا بهێت، دهۆك- ئەلغەراف، یاریگەها دهۆكێ‌ دەمژمێر پێنجێ‌ ئێڤاری، زاخۆ- كارەبا یاریگەها زاخۆ ل دەمژمێر 7:30 شەڤ، جەوییە- هەولێر، یاریگەها ئەلمەدینە ل بەغدا دەمژمێر 7:30 شەڤ.

د داخویانیەکێ دا ئەلند خالد گولپارێزێ یانەیا دهۆک بۆ ئەڤرۆ گوت: ب ڕاستی یانەیا دهۆکێ ب هەموو شێوازان پشتەڤانە بۆ یاریزانان، داکو ئاست و ئەنجامێن یاریزانێن وێ باشتر لێ بهێن، یا گرنگ ئەوە د هەموو کاودانان دا یاریزان باوەری ب خۆ هەبیت بۆ نموونە، د یاریا دناڤبەرا دهۆک و بابان دا، من ئاستەکێ نایاب پێشکێش کر، چونکی د دەمێن هەستیار دا یانە پالپشتا مەبوو و د دەمێن کەفتنێ دا هاریکار بوون دا کو ئەم دووبارە ڤەگەڕینە سەر پێیێن خۆ.
هەروەسان ناڤهاتی گوت ژی: بەرهەڤیێن بەروەخت بۆ هەر یارییەکێ کو ب نڤستنەکا باش و هزرکرنەکا باشتر بۆ یاریێ کو ئەز ب ڤێ رەوشێ دچمە د یاریگەهێ دا و هەمی ئارێشەیێن خۆ د هێلمە ل پشت خۆ و بتنێ هزرا من ل ناڤ یاریگەهێ دەستپێدکەت و شیرەتا من بۆ گەنجان ئەوە کو د ژیەکێ بچووک دا دەست ب راهێنانان بکەن و دگەل راهێنەرێن باش بن و گوهداریەکا باش بۆ وان بکەن.
ژلایەکێ دووڤە ئەلند خالد گۆت: ئارمانجا مە یا سەرەکی سەرکەفتن بوو بۆ خولا نایاب و سوپاس بوو خودێ و ب هێز و شیانێن مە یاریزانان، ئەم گەهشتینە ئارمانجێن خۆ و وەرزێ بهێت دێ باشتر بین، سەبارەت ئاستێ من ئەز ب خۆ باشترین گۆلپارێز ل کوردستانێ و عیراقێ دبینم و نموونەیا من یا جیهانی «تێرشتێگن»ە.
لدووماهیێ گۆت: نوکە خول ب دوماهی هات و دێ بێهنڤەدانەکا کورت وەرگرین، پاشان دێ ڤەگەڕینە سەر راهێنانێن ب هێز، چونکی ئەم چووینە د قووناغەکا ب هێزتر دا، ئەو ژی خولا نایابا کوردستانێ یە و پێدڤی ب بەرهەڤیێن مەزنتر هەیە.

تیما فوتبۆلا یانەیا تەناهی د دووماهی گەر دا ژ خولا پلە ئێکا کوردستانێ شیا مانا خوە پارێزن پشتی سەرکەفتی لسەر یانەیا شۆرجە گولەکا کوژەک خولەکا ٩٣ بۆ وەرزیێ بهێت ژی هەمان خول یاریێ بکەت، ئەوا شیایی ژ رێزا ١٦ێ و بەری دووماهیێ پێشڤە بهێتە ڕێزا ١٤ێ ب کۆمکرنا ١٧ خالان و مانا خوە د خولێ دا پارێزیت.
ل دۆر ڤێ یەکێ جاسم شعبان سەرۆکێ یانەیا تەناهی بۆ رۆژنامەیا ئەڤرۆ گۆت: رۆندک و هەست تێگەل بوون د دەمێ گولا سەرکەفتنێ دا، هەر ژ کارگێریێ و دەستەکا راهێنەران و یاریزان دەروونەکێ نەیێ ئارام دا بوورین وان خولەکێن مایی، مە گەلەک لاڤ کرن سوپاس بۆ خودێ تەوفیقا مە دا شیاین سەرکەفتنێ و مانا خوە پارێزین، بارگرانیەکا مەزن لسەر ملێن مەبوو ژ هەموو لایان ڤە، بڕیارین فدراسیۆنا کوردستانێ گەلەک کارتێکرن لمە دکرن، هەروەسا کێشەیێن دارایی ژی کارتێکرن تیمێ هەبوو.
زێدەتر جاسم شعبانی گۆت ژی: ئەڤە چەندە مە مووچێ یاریزانان نەدایێ، کوژمەکێ مەزن پارەیی یانەیا قەردارە، داخازیێ جهێن پەیوەندیدار دکەین هاریکاربن ل گەل مە دا قەرێن خوە سڤک بکەین، چونکۆ مە یاریزانێن پێشەکار هەنە پێدڤیە فرێکەینە وەلاتێ وانا، دێ هەمی بزاڤان بکەین هێدی هێدی هەر رێکەکا هەبیت کێشەین خوە چارەسەربکەین، بشێن بۆ وەرزێ نوو پێشوەخت بەرهەڤیا بکەین.
ژلایەکێ دووڤە ناڤهاتی گۆت: پێنەڤێت ژبۆ باشترین بەرهەڤی بۆ وەرزێ بهێت دێ گوهۆڕین هەبن پێخەمەت بشێن باشتربین، د پلان دایە نە بتنێ پشکداربین بەلکۆ هەڤرکیێ بۆ دەستڤەئینانا ئێک ژ پلێت دەربازبوونێ بکەین و ئەڤە ژی ب سانەهی نابیت هەکە پشتەڤانییا دارایی بۆ مە نە هێتە کرن، گەشبینن دێ جهێن پەیوەندیدار خوە ل تیما مە کەنە خودان.