دهۆك، لەزگین جۆقی:

پەیڤدارێ رێڤەبەریا بەڕەڤانیا باژێڕی ل پارێزگەها دهۆكێ دیار كر، ژ بەر بارینا بارانێ‌ و دروستبوونا لەهیان ل دهۆكێ، ئاڤ چوویە د ناڤ هندەك مالان دا و دبێژیت: زیانڤێكەفتیێن لەهیان هەموو دێ هێنە قەرەبووكرن.
بێوار عەبدولعەزیز، پەیڤدارێ رێڤەبەریا بەڕەڤانیا باژێڕی ل پارێزگەها دهۆكێ گۆت: «تیمێن مە و هەمی لایەنێن پەیوەندیدار د ئامادەباشیێ‌ دا بوون و نەهێلان چو روودانێن دلتەزین پەیداببن، ب تنێ زیانێن ماددی هەبووینە، ئاڤ چوویە د ناڤ نەهـ مالان دا، لێ زیان كێمبووینە و هەمی دێ هێنە تۆماركرن و قەرەبووكرن».

دهۆك، دلۆڤان ئاكرەیی:

پەیڤدارێ دەستەیا وەبەرهێنانێ یا حكومەتا هەرێما كوردستانێ دیاركر، زۆرترین مۆلەتێن وەبەرهێنانێ ل هەرێما كوردستانێ ب كەرتێن چاندن، گەشتیاری و پیشەسازیێ هاتینەدان، ژ بەركو سەرۆكوەزیران، مەسرور بارزانی سەرنجا وی ل سەر زێدەكرنا داهاتی بوویە د بیاڤێن جودا دا و دبێژیت: سەرباری كارتێكرنا جەنگێ ئیرانێ، ب تنێ د ڤان سێ مەهێن ئەڤ سالە دا 25 مۆلەتێن پڕۆژەیان بۆ وەبەرهێنەرێن ناڤخۆ ل پارێزگەهـ و ئیدارەیێن سەربەخۆ هاتینەدان.
بەرگەشت ئاكرەیی، پەیڤدارێ دەستەیا وەبەرهێنانێ یا حكومەتا هەرێما كوردستانێ بۆ رۆژنامەیا ئەڤرۆ گۆت: «ئەو پڕۆژەیێن مۆلەت بۆ هاتیەدان، د بیاڤێن بازرگانی، پیشەسازی، گەشتیاری، خزمەتگوزاری و چاندنێ دانە، سەرمایێ‌ ڤان پڕۆژەیان نێزیكی 400 ملیۆن دۆلارانە، ب گشتی د كابینەیا نەهێ دا 740 پڕۆژەیان مۆلەتێن وەبەرهێنانێ وەرگرتینە و سەرمایێ وان پڕۆژەیان نێزیكی 25 ملیار دۆلارانە، حەفت مۆلەت ژ وان ب وەبەرهێنەرێن بیانی هاتینەدان، چار مۆلەت ژی ب هەڤپشكی د ناڤبەرا وەبەرهێنەرێن ناڤخۆیی و بیانی دانە، سەرمایێ وان 11 مۆلەت نێزیكی شەش ملیار دۆلارانە».

هەولێر، قائید میرۆ:

بەرپرسەكێ وەزارەتا باژێڕڤانی و گەشتوگوزارێ یا حوكمەتا هەرێما كوردستانێ‌ ئاشكرا كر، هەتا نوكە 500 هزار فەرمانبەران رازیبوونا وەرگرتنا پارچەیێن ئەردی هەیە و دبێژیت: وەزارەت بزاڤان دكەت ئاریشەیێن وان باژێڕڤانیان چارەسەر بكەت، یێن هەتا نوكە ئەرد بەلاڤ نەكری.
سەربەست مەولود، رێڤەبەرێ قانوونی ل وەزارەتا باژیڕڤانیێ بۆ رۆژناما ئەڤرۆ دیاركر، سەرۆكایەتیا جڤاتا وەزیران رازیبوون بۆ نێزیكی 500 هزار فەرمانبەران كریە ب مەرەما مفاداربوونێ ژ پارچەیێن ئەردی، هەموو فەرمانبەرێن رازیبوون هەی، هویربینی بۆ هاتیە كرن و ناڤێن وان بۆ باژێڕڤانیان هاتینە هنارتن، ب مەرەما وەرگرتنا پارچەیێن ئەردی و گۆت: «پرۆسەیا بەلاڤكرنا پارچەیێن ئەردی پێدڤی ب دەمەكێ زۆر هەیە، چونكی وەزارەتێن دارایی و چاندن و هەژمارەكا فەرمانگەهێن دی د پرۆسەیا بەلاڤكرنا پارچەیێن ئەردی دا پشكدارن، كۆمبوون ل گەل هەموو لایەنێن پەیوەندیدار هاتیە كرن، داكو لەزێ د بەلاڤكرنا پارچەیێن ئەردی دا بكەن».
سەربەست مەولود گۆت ژی: «وەزارەتا باژێڕڤانیان یا كار دكەت ل سنۆرێ هەر باژێڕڤانیەكێ ئاریشە و ئاستەنگ ل هەمبەر پرۆسەیا بەلاڤكرنا پارچەیێن ئەردی هەبن، بهێنە چارەسەركرن، هەموو بزاڤەك ژی دهێتە كرن د دەمەكێ زوو دا هەموو فەرمانبەرێن رازیبوونا وەرگرتنا پارچەیێن ئەردی هەی، ژ بڕیارا سەرۆكێ حوكمەتا هەرێما كوردستانێ مفاداربن، چونكی هەر فەرمانبەرەكێ رازیبوون هەبیت، دێ مفاداربیت».

رەمەزان زەكەریا:

ئاكرێ پێنگاڤەكا نوو بەر ب زێدەكرنا بەرهەمێ زێرێ كەسك دهاڤێژیت، ئەو ژی ب ڕێیا بجهئینانا پڕۆژەیەكێ بەرفرەهـ یێ چاندنا دارێن فستەقان، كو دهێتە چاڤەڕێكرن داهاتەكێ باش بۆ دەڤەرێ دابین بكەت.
غازی عەلی، سەرپەرشتێ پڕۆژەیێ چاندنا دارێن فستەقان ل ئاكرێ بۆ ئەڤرۆ گۆت: «ل سەر ڕووبەرێ 44 دۆنەمێن ئەردی ل دەڤەرا گرێ تۆپا، كارێ چاندنا شەش هزار بنەدارێن فستەقان بەردەوامە، هەتا نوكە زێدەتر ژ 50%ێ‌ كارێن پڕۆژەی ب دووماهی هاتینە».
ناڤبری گۆت ژی: «بەری نوكە دو هزار دار هاتبوونە چاندن، د ڤێ قووناغێ دا سێ هزارێن دی هاتینە زێدەكرن، هزار دارێن دی ژی دێ‌ هێنە چاندن، دا كو هەژمارە بگەهیتە شەش هزار داران».
زێدەتر گۆت: «ب رێیا ئەڤی پڕۆژەی دەلیڤەیێن كاری بۆ وەلاتیێن دەڤەرێ پەیدابووینە، ڕۆژانە زێدەتر ژ 20 كەسان د ناڤ ڤی پڕۆژەی دا كار دكەن، فستەق كو ب زێڕێ كەسك دهێتە ناسین، ئێكە ژ وان بەرهەمێن، داهاتەكێ ئابووری یێ بلند ددەتە دەڤەرێ و كەرتێ چاندنێ ل دەڤەرێ‌ بەر ب پێشڤە دبەت».

مەسعود مستەفا، سەرۆكێ باژێڕڤانیا باتیفا بۆ ڕۆژناما ئەڤرۆ دیاركر كو ژ پێخەمەت پاراستنا گیانێ وەلاتی و شۆفێران، باژێڕڤانیا باتیفا ب هەماهەنگی ل گەل ڕێڤەبەریا سەخبێریا ڕێك و پران ل ئیدارەیا سەربخوە یا زاخۆ دەست ب چێكرن و سەخبێریكرنا لایێن جاددەیا سەرەكی یا باتیفا بۆ زاخۆ كریە.
سەرۆكێ باژێڕڤانیا باتیفا گۆت: «ئەڤ جادەیە ژ ئەگەرێ بارانێن بهێز یێن ڤێ دووماهیێ تووشی خرابكرن و تێكدانێ ببوو، مەترسی ل سەر هاتنوچوونێ دروستكربوو».
گۆت ژی: «جاددەیا سەرەكی یا باتیفا ب تەمامی هاتە سەخبێریكرن و ژ مەترسیا هاتنوچوونێ ڕزگار بوو».

ئامێدیێ، مەحمود نهێلی:

دەزگەهێ روانگە یێ خێرخوازی كۆمەكا هاریكارییان گەهاندنە باخچێ دێرەلۆكێ‌ یێ زارۆكان، ب مەرەما پشتەڤانییا كەرتێ پەروەردێ ل دەڤەرا ئامێدیێ.
حكمەت محەمەد، بەپرسێ نڤیسینگەها پارێزگەها دهۆكێ یێ دەزگەهێ روانگە، بۆ رۆژناما ئەڤرۆ دیار كر، ئەڤرۆ ئەو ل باخچێ زارۆكان یێ دێرەلۆكێ ئامادەبووینە ژ بۆ گەهاندنا كۆمەكا هاریكارییان و گۆت: «پشتی ژ لایێ رێڤەبەرییا پەروەردا ئامێدیێ ڤە، داخوازی هاتیە كرن ل سەر وێ یەكی كو پشتەڤانی و هاریكارییا كەرتێ پەروەردێ بهێتە كرن، ب تایبەتی ژی باخچێن زارۆكان، ئەڤرۆ مە ئەڤ پێدڤیە ل سەر راسپاردا جەنابێ ئیدریس نێچیرڤان بارزانی، سەرۆك و دامەزرێنەرێ دەزگەهێ روانگە گەهاندنە باخچێ دێرەلۆكێ‌ یێ زارۆكان، داكو بشێن خزمەتا ڤان زارۆیان بكەن».
گۆت ژی: «ئەڤ هاریكاریە ژ پێدڤیێن باخچەی ژ لایێ یاری و پەروەردێ ڤە پێك دهێن، هیڤی دكەین ئەم شیابین ڤان پێدڤیان پڕ بكەین، دیسا دەزگەهێ روانگە بەردەوام ل دەڤەرا ئامێدیێ یە ژ بۆ گەهاندنا هاریكارییان، لێ وەكو باخچە؛ ئەڤە ئێكەم باخچەیە ل دەڤەرا ئامێدیێ ئەم هاریكارییان دگەهینینێ».