چاڤەڕێ‌ دهێتە كرن ئەڤرۆ سێ‌ یاریێن مایی ژ هەڤڕكیێن گەڕا حەفتێ‌ یا خولا ستێرێن ئیراقێ‌ یا فوتبۆلێ‌ بهێنە كرن، هەردو یانەیێن كوردستانی هەولێر و نەورۆز دێ‌ بەرانبەر یانەیێن ئەلگەرمە و ئەلجولان بزاڤێن سێ‌ خالان كەت بۆ خوشكرنا جهێن خوە، یارییا سێیێ‌ یا ئەڤرۆ یانەیا نەفت دێ‌ ل یاریگەها خوە یانەیا كەربەلا مێڤان كەت.
هەولێر دڤێت ڤەگەڕیتە سەرێ‌ لیستێ‌
جەماوەر و پشتەڤانێن یانەیا هەولێر ئەڤرۆ ل دەمژمێر نەهی شەڤ ب ژڤانن بۆ دیتن و پشتەڤانییا تیما خوە دەمێ‌ یانەیا ئەلگەرمە مێڤان كەت ئەوا دێ‌ ل یاریگەها شەهید فرانسۆ حەریری هێتە ئەنجامدان كو دهێتە هژمارتن ئێك ژ یاریێن ئاگرین و بهێز بۆ هەردو تیمان و شەڕێ‌ دەستڤە ئینانا سەرێ‌ لیستێ‌ یە، یانەیا هەولێر ل ڕێزا سێیێ‌ دهێت ب كۆمكرنا 14 خالان ژ چار سەركەفتن، دو وەكهەڤییان، مێڤانا وێ‌ ئەلگەرمە ل ڕێزا دویێ دهێت و هەمان خال هەنە لێ ژلایێ تۆماركرنا گۆلان ئەو باشترە، ئانكو هەردو تیم ب خالان وەكوئێكن، لەوما ژی شەڕێ‌ ڤێ‌ یاریێ بۆ سەرێ‌ لیستێ‌ یە، ئەوا یانەیا زەورا پشتی یارییا خوە یا ڤێ‌ گەڕێ‌ كری هاتیە سەرێ‌ لیستێ‌ ب 15 خالان.
نەورۆزێ‌ ژی ڕێزا پێشیێ دڤێت
ژلایێ خوەڤە یانەیا نەورۆز ئەڤرۆ دێ‌ ل باژێرێ‌ فەلۆجە بیتە مێڤانا یانەیا ئەلجولان ل دەمژمێر 6:45 مەغرەب، هێز و هەڤڕكییا ڤێ‌ یاریێ ژی كێمتر نینە ژ یا هەولێرێ، یانەیا نەورۆز 11 خال كۆمكرینە، ل ڕێزا پێنجێ‌ دهێت ژ سێ‌ سەركەفتن، دو وەكهەڤییان، د بەرانبەر دا یانەیا جەولا نەهـ خال هەنە ل ڕێزا حەفتێ‌ دهێت.

چاڤەڕێ‌ دهێتە كرن ئەڤرۆ دەست ب هەڤڕكیێن قووناغا كۆمان یا خولا پلا دویێ یا فوتبۆلا كوردستانێ‌ ب ئەنجامدانا سێ‌ یاریێن كۆما چارێ‌ یا پارێزگەهێ‌ ب دووماهی بهێن و یانەیەك پلێتەكا ئێكسەر یا دەربازبوونێ‌ بۆ خولا پلا ئێك ئێكلا بكەت، ئەوا ژ چارچووڤەیێ یاریێن گەڕا پێنجێ‌ و دووماهیێ ل دەمژمیچر چارێ‌ ئێڤاری ژ كۆمێ‌ دێ‌ هێنە كرن.
بجێل- شێلادزێ‌
بڕیارە یاریگەها ئاكرێ‌ یارییەكا ئاگرین دناڤبەر یانەیا بجێل خودانا ئەردی و یانەیا شێلادزێ‌ بهێتە كرن، د ڕێزبەندییا كۆمێ‌ دا هەردو یانە هەڤڕكن بۆ پلێتەكا دەربازبوونێ‌، بجێل خودانا نەهـ خالانە ل ڕێزا سێیێ‌ دهێـ، ژلایێ خوەڤە یانەیا شێلادزێ‌ 10 خال كۆمكرینە ل ڕێزا ئێكێ‌ دهێت، دهێتە پێشبینیكرن یارییەكا بهێز بیت بۆ دەربازبوونا مسۆگەر.
هەریر- باتیفا
ژلایێ خوەڤە یانەیا باتیفا دێ‌ بیتە مێڤانا یانەیا هەریر د یارییەكا دی دا كو یانەیەك لایەنێ‌ هەڤڕكییا دەربازبوونێ‌ یە، تیما باتیفا خودانا 10 خالانە كێمترییا دو گۆلان ژ سەرێ‌ لیستێ‌ ل رێزا دویێ دهێت، یانەیا هەریر چو هیڤی بۆ هەڤڕكیێ نەماینە ئەوا سێ‌ خال كۆمكرین ڕێزا پێنجێ‌ دهێت.
پیرس- بجێل
د یارییا سێیێ‌ دا یانەیا پیرس دێ‌ ل یاریگەها خوە یانەیا دینارتە مێڤان كەت، هەردو یانەیان ژی چو هیڤیێن دەربازبوونێ‌ نەماینە، پیرس ئەوا د هەرچار یاریێن بۆری دا نەشیایی سەركەفتنێ‌ بینیت ل ڕێزا شەشێ‌ و دووماهیێ دهێت، دینارتە سێ‌ خال هەنە ل ڕێزا چارێ‌ دهێت.
بۆ زانین 24 یانەیێن كوردستانی پشكدارن و هاتینە بەلاڤكرن ل سەر چار كۆمان، سەركێشێن هەر كۆمەكێ‌ دێ‌ ئێكسەر دەربازبنە خولا پلا ئێك یا وەرزێ‌ بهێت، دیسان هەرچار یانە دێ‌ ل چارگۆشەیا زێرین بەرانبەر ئێك بن هەتا دو یانە دگەهنە فینالێ‌ ژبۆ دیاركرنا قارەمانا وەرزێ‌ ئەڤ سالە یا خولا پلا دویێ یا كوردستانێ‌.

تاهر رێكانی

د داخۆیانیه‌كێ دا میقداد حسێن سه‌رۆكێ فدراسیۆنا یارییا بۆكسانێ ل پارێزگه‌ها دهۆكێ بۆ رۆژنامه‌یا ئه‌ڤرۆ دیارکر پشتی ڤەقەتیانەکا درێژ بریارە دەست ب چالاکیێن خوە بکەین و ئێکەم پێنگاڤ خوله‌ك بۆ کۆمەکا وەرزشڤانان بهێتە ڤەکرن، ئەڤ چەندە ژی وەکو دەستپیک بۆ ڤەکرنا قارەمانیێن داهاتی.
زێده‌تر ناڤبری گۆت: ئه‌ڤ خوله‌ دێ ژلایێ مە ڤە و هه‌ڤكاری دگه‌ل رێڤه‌به‌ریا وه‌رزش و لاوان هێتە ڤەکرن و درێژەپێدان بیت هه‌تا بشێین شه‌نگسته‌كێ بهێز و باش بۆ یاریزانێن ڤێ یاریێ به‌رهه‌ڤبكه‌ین و تیمه‌كێ بۆ هه‌لبژارتیێ پارێزگه‌هێ دروست بكه‌ین، مخابن ئه‌ڤه‌ چه‌ندین ساله‌ مه‌ چالاكی نه‌بووینه‌ ژبه‌ر هاریكاریێن دارایێ و ژلایه‌كێ دووڤه‌ یاریێن دی یێن هونه‌رێ جه‌نگی كارتێكرن ل ڤی جورێ یاریێ كریه‌، بۆ زانین یاریزانێن مه‌ یێن بوكسانێ ده‌سكه‌فتێن باش لسه‌ر ئاستێ ئیراقێ و هه‌رێمێ بده‌سخۆڤه‌ برینه‌ و چه‌ندین یاریزان گه‌هشتبوونه‌ ناڤ رێزێن هه‌لبژارتیێ ئیراقێ.
لدووماهیێ سه‌رۆكێ فدراسیۆنا ڤێ یاریێ گۆت: ژبه‌ر نه‌بوونا ڕاهێنه‌ران ل دهۆكێ ئه‌ز دێ ب ئه‌ركێ راهێنانیێ رابم هه‌تا كو بشێم چه‌ند یاریزان و راهێنه‌را به‌رهه‌ڤ بكه‌ین بۆ هه‌لكه‌فت و قاره‌مانییێن پاشه‌رۆژێ، د خوازم ب رێیا رۆژنامه‌یا ئه‌ڤرۆ وه‌رزشڤان و حه‌زژێكه‌رێن بۆكسانێ ناڤێن خۆ بۆ پشكداریكرنێ د خولێ دا بنڤیسن.

شاهۆ فەرید:

د دیدارەکا تایبەت دا دیار مەهدی سەروکێ نوو یێ یانەیا تەناهی بۆ رۆژنامەیا ئەڤرۆ گۆت: پشتی دەستکاربوونا مە دەستەکا نوو یا یانەیێ دێ مە چەند پلانیێن باش هەبن، تیمەکا گەلەکا بهێز بۆ خولا پلا ئێکا کوردستانێ بەرهەڤبکەین و پێکهاتەکێ باش، خوە ئامدەبکەین سەرکەفتنێ بۆ خولا نایابا کوردستانێ.
هەروەسان ناڤهاتی گۆت: ژلایێ دارایی ڤە دێ بزاڤێ کەین بناغەیێ یانەیێ باش بکەین، چۆنکو مە داهاتەکێ باش نینە ئەو پشتەڤانییا لمە دهێنەکرن ژی تێرا وێ چەندێ ناکەت ئەم کرێبەست و کارێن ژ هێزا مە پتر ئەنجامبدەین، د ئەڤی ژیێ بچوویک دا ئەم شیاینە کێمترین هاریکاریێن داهاتێ بوومە هاتین خوە بگەهینە ئاستیێن باش.
دیار مەهدی گۆت ژی: وەرزێ بوری هاریکاریەکا گەلەکا کێم بۆ مە هاتە پێشکێشکرن، بەرامبەردا هەمان یانەیێن پارێزگەهێ د خولێ دا بوون پالپشتیەکا باش بۆ وانا هاتەکرن، هەتا نوکە گەلەک قەرێن سەر یانەیێ یێن یاریزانا و راهێنەرا و چەندین جهیێن دی، کومبوون هاتینە ئەنجامدان بۆ چاوانییا دەستڤەئینانا بوودجەیەکی، هەتا هاریکاریا خوە نەزانین چ پێنگاڤا نا هاڤێژین بۆ بەرهەڤیا، راستە ئارمانجامەیا سەرەکی دەربازبوونە بۆ خولا نایاب بەلێ پێدڤیا مە دێ پالپشتیا دارایا بەش هەبیت.
لدووماهیێ سەرۆکێ یانەیا تەناهی گۆت: وەکۆ دەستەیا نوو دێ گرنگیێ ب یاریێن تاکە و جەنگی ژی دەین چونکۆ مە یاریزانێن خودان شیان تایبەت ل سەر ئاستێ ئاسیایی و ئیراقی یاریێ دی دا، گرنگیێ تنێ فۆتبولێ نادەین بەلکۆ یاریێن دی ژی دوویڤ شیانێن خوە، بلا یاریێن دی ژی تەناهی یا پێشکەفتی بیت.

رەمەزان زەكەریا

د داخۆیانیەكێ دا سكرتێرێ یانەیا شێلادزێ دیاركر ئەڤرۆ یارییەكا دیرۆكی و چارەنڤیس تیما مەیە كو ئەڤ یارییە دێ‌ خەونا مە یا پێنج سالان كەتە ڕاست، لەوما ژی ب هەموو شیانێن خوە و هیڤیێن مەزن دێ‌ كاركەین بۆ دەستڤەئینانا پلێتا دەربازبوونێ‌ بەر ب پلا ئێكا كوردستانێ‌.
زێدەتر كاروان باقی بۆ رۆژناما ئەڤرۆ گۆت: سەرەڕای ئەنجامێن سەركەفتی یێن چار یاریێن بۆری كو تێدا سێ سەركەفتن و ئێك وەكهەڤی ب دەستڤە ئیناینە لێ ئاریشا دارایی ئاستەنگا سەرەكییە د رێكا یانەیێ دا دخازین كو جهێن شولەژی پشتەڤان و هاریكاربن گەل تیما مە، بۆ وێ‌ چەندێ‌ ئەنجامێن باش بەردەوام ب دەستڤەبینین، یانە یا بێ داهاتە هیڤیدارین دەزگەهێن حزبی و حكومی مە بتنێ نەهێلن دا بشێین بەردەوامیێ بدەینە خزمەتكرنا وەرزشڤان و خەڵكێ دەڤەرێ، ژبەركو وەرزشێ‌ پێدڤی ب پشتەڤانیا بەردەوام هەیە بۆ سەركەفتن و ب دەستڤەئینانا ئەنجامێن باش و ناسناڤان.
لدووماهیێ ناڤبری گۆت: بتنێ ٩٠ خولەك ل پێشیێ ماینە دا كو بگەهنە خەونا خۆ یا پێنج سالێن بووری، بۆ ڤێ مەرەمێ ڕاهێنەر و یاریزان بەرهەڤی تەمامكرینە بەرامبەر یانەیا بجیل و ئارمانجا ئێكێ ئینانا پلیتا دەربازبوونێیە بكەینە دیاری بۆ هەموو خەلكی دەڤەرا شێلادزێ.

فدراسیۆنا فوتبۆلا جیهانێ‌ FIFA ب فەرمی ئەنجامێن قارەمانییا كۆپا كەنداڤی ئێخستنە دناڤ ڕێزبەندییا جیهانی دا و هژمارت وەكو قارەمانیەكا باوەرپێكری ل سەر ئاستێ‌ هەلبژارتیان.
ل دووڤ بڕیارا فیفایێ یا فەرمی ژ قارەمانییا كەنداڤی یا 27ێ‌ ئەنجامێن هەر یارییەكا هەلبژارتییێن پشكدار د كۆپایێ دا ئێكسەر دێ‌ بۆ ڕێزبەندییا وان یا جیهانی هێتە زێدەكرن و هەر ئەنجامەكێ‌ نە باش دێ‌ كارتیكرنێ‌ ل سەر ڕێزبەندیی وێ‌ هەلبژارتییێ كەت، ئەڤ پێنگاڤە هات ژبۆ پشتەڤانییا ڤێ‌ قارەمانیێ و زێدەتر گرنگی دان ب یارییا فوتبۆلێ‌ ل كەنداڤی.
بۆ زانین كۆپا كەنداڤی یا 27ێ‌ بڕیارە ل 23ێ‌ ڤێ‌ مەهێ‌ هەتا شەشی چریا ئێكێ‌ یا بهێت وەلاتێ‌ سعوودیێ مێهاندارییا وێ‌ بكەت.