ڕاپۆرت: قەیس وەیس

د ڕێورەسمەكێ‌ فەرمی دا ب بەرهەڤبوونا نوونەرێن هەر 20 یانەیێن پشكدار د خولا ستێرێن ئیراقێ‌ یا فوتبۆلێ‌ و كۆمەكا وەرزشڤان و بەرپرسێن وەرزشی ل بەغدا ڕێورەسمێن پشككێشانا خولێ‌ و دانانا ژڤانێ‌ كۆپا ئیراقێ‌ هاتە كرن، ئەوا بڕیارە هەڤڕكیێن وێ‌ ل 14ێ‌ ڤێ‌ مەهێ‌ دەستپێبكەن هەتا 28ێ‌ ئەیلوونا سالا 2027ێ‌ بەردەوامبیت.
پێنج یاریێن دەستپێكی یێن هەر چار یانەیێن كوردستانی بڤی شێوەیی.
گەڕا ئێكێ‌ 14-8- 2026
دهۆك – ئەلغراف.
زاخۆ- گازا باكۆر.
هەولێر كارەبا.
نەورۆز- جەوییە.
گەڕا دویێ 21-8- 2026
دهۆك- تەلەبە.
مینا- زاخۆ.
هەولێر- جەوییە.
ئەلغراف- نەورۆز.
گەڕا سێیێ‌ 24-8-2026
نەفت- دهۆك.
زاخۆ- دیالا.
كەرخ- هەولێر.
تەلەبە- نەورۆز.
گەڕا چارێ‌ 28-8-2026
نەورۆز- دهۆك.
زەورا- زاخۆ.
هەولێر- مینا.
گەڕا پێنجێ‌ 4-9-2026
دهۆك- جەوییە.
زاخۆ- تەلەبە.
شورتە- هەولێر.
نەورۆز- نەفت میسان.
كۆپا ئیراقێ‌ كەنگی یە؟
ژلایەكێ‌ دووڤە فدراسیۆنا فوتبۆلا ئیراقێ‌ ژڤانێ‌ یاریێن كۆپا ئیراقێ‌ دیاركرن و بڤی شێوەیی، گەڕا ئێكێ‌ دێ‌ ل 13ێ‌ كانوونا ئێكێ‌ یا ئەڤ سالە بیت، یاریێن گەڕا 32ێ‌ دێ‌ ل 29ێ‌ كانوونا دویێ یا سالا 2027ێ‌ بیت، یاریێن گەڕا 16ێ‌ دێ‌ ل 22ێ‌ شۆباتا سالا بهێت دەستپێكەن، یاریێن گەڕا هەشتێ‌ دێ‌ ل هەشتێ‌ ئادارا سالا بهێت بن، یاریێن چارێك دووماهیێ دێ‌ ل سێ‌ سێیێ ئەیلۆنا بهێت بیت، یارییا فینالێ‌ بڕیارە ل 14ێ‌ هەمان مەهـ ل یاریگەها كەربەلا یا نێڤدەولەتی بیت.
كۆپا سۆپەر ژی دێ هێتە كرن
ژلایەكێ‌ دووڤە هەر دناڤا ڕێورەسمێن ئاهنگا خولا ستێرێن ئیراقێ‌ بۆ وەرزێ‌ نوو، بڕیار هاتە دا بۆ جارا ئێكێ‌ د دیرۆكا وەرزشا ئیراقێ‌ دا كۆپا سۆپەرا ئیراقێ‌ ب پشكدارییا چار یانەیان بیت وەكو سیستەمێ‌ سۆپەرا ئسپانیا و ئیتالیا، بڕیارە قارەمانی دناڤبەرا چار یانەیان ب سیستەمێ‌ چارگۆشەیا زێرین كۆمڤەبوون بهێتە كرن، جەوییە قارەمانا وەرزێ‌ بۆری بەرانبەر زەورا خودانا ڕێزا چارێ‌، هەولێر خودانا ڕێزا سێیێ‌ بەرانبەر شورتە خودانا ڕێزا دویێ، سەركەڤتیێ هەر یارییەكێ‌ دێ‌ دەربازبیتە یارییا فینالا سۆپەرێ‌، ئەوا بڕیارە هەڤڕمیێن وێ‌ ل دەستپێكا كانوونا ئێكێ‌ یا ئەڤ سالە بهێنە كرن.
دهۆك و زاخۆ د بەرهەڤن
هەردو یانەیێن پارێزگەهێ‌ دهۆك و زاخۆ ئەوێن بۆ وەرزێ‌ ئەڤ سالە بەرهەڤیێن باش كرن و پێكهاتیێ تیمێن خوە ل گەل كادرێ‌ ڕاهێنانێ‌ نووكری، یانەیا دهۆك ئەوا دێ‌ ب سەرپەرشتییا ڕاهێنەرێ‌ ئیرانی یەحیا گۆل محەمەد د نوكە دا د كەمپێ ڕاهێنانێ‌ دانە ل هەولێرا پایتەخت پشتی كەمپێ ڕاهێنانێ‌ یێ‌ توركیا ب دووماهی ئینایی، د رۆژێن بۆری دا كارگێرییا یانەیێ داخواز ژ حوكمەتا هەرێما كوردستانێ‌ كربوو پشتەڤانییا وان یا دارایی بكەن، ل دووڤ ژێدەرێن رۆژنامەڤانی ئەڤرۆ د. عەلی تەتەر پارێزگارێ‌ دهۆكێ‌ دێ‌ ل گەل كارگێریێ كۆم بیت و پشتەڤانییا حكومەتێ‌ بۆ یانەیێ دوپات كەت، تیما دهۆكێ‌ ب چەند یاریزانێن نوو هاتینە زێدەكرن ژ وانان، گۆلپارێز كومەیل سەعدی، مەناف یونس، ڕێوان ئەمین، یونس حەموود، مەحموود مەواس، هادی سالح، رەزا ماجی، موهەنەد جەعاز، كارسان دۆسكی، ڕایكار سانتۆس، ئیكۆر هێنریك، سان مستەفا، سینا ئەسەدبەگ، محەمەد ڕەزا و ئاواد ئازاد كو دهێتە پێشبینیكرن پێهاتییەكێ‌ بهێز بیت.
زاخۆ جودایە ژ سالێن بۆری
ل دووڤ بەرهەڤیێن تیما زاخۆ یا بۆ وەرزێ‌ ئەڤ سالە پشتی كارگێرییا نوو دەست ب كار بووی هەرزوو ڕاهێنەرەكێ‌ فەرەنس ئینا و چەندی یاریزانێن خودان شیان ئینانە دناڤ ڕێزێن تیما خوە دا ژ وانا گۆلكەرێ‌ وەرزێ‌ بۆری یا خولا ستێرێن ئیراقێ‌ یێ‌ ئۆزپاكستانی شیرۆزد تیمیرۆڤ، هارۆن ئەحمەد، ئاكام هاشم، سفۆ مبۆلی، ئەسیر سالح، ئیبراهیما كۆنتی، ئیڤان ئاهیمبۆسیبوا، مستەفا سەعدۆن، موسێس ئاپیی، موقتەدا حەسەن، محەمەد غالب، موستەفا محەمەد، موسا عەلا، حەسەن عەباس، ناڤەند مەشود.
شرۆڤەكارەكێ‌ وەرزشی بۆچوونا خوە دیاركر
قوسەی مونیر شرۆڤەكارێ‌ وەرزشی و یاریزانێ‌ دێرین یێ یانەیا دهۆكێ‌ دیاركر وەرزێ‌ ئەڤ سالە دێ‌ هەڤڕكی ب هێزتر بیت ژ سالێن بۆری و گۆت: ل دووڤ ئەوان پێشهاتیێن بۆری و ئینانا یاریزانێن پیشەكار و كەمپا ڕاهێنانێ‌ یێن پرانییا یانەیان دێ‌ هەڤڕكی ب هێزتربیت لێ‌ د واقع دا دبیت بەرۆڤاژی بیت، پێشبینییا سوپرایزان دهێتە كرن تایبەت ژ لایێ یانەیێن وەرزێ‌ پار ناڤەڕاستا ڕێزبەندیێ بوون، هەرچەندە هێشتا خول دەستپێنەكرییە لێ‌ دبیت هەڤڕكی هەبیت.
ژلایەكێ‌ دووڤە ناڤهاتی گۆت: سەبارەت هەرچار یانەیێن كوردستانی زاخۆ و دهۆكێ‌ باشتر خوە ژ هەولێر و نەورۆز بەرهەڤكرینە، یانەیا زاخۆ گرێبەستێن گرانبوها ژی ئیمزاكرینە و پێنگاڤێن باش هاڤێتینە، د بەرانبەر دا یانەیێن وەكو هەولێر و نەورۆز ژی بەرهەڤیێن باش هەنە لێ‌ ب گشتی یا ب زەحمەتە یانەیێن كوردستانی هەڤڕكێن ناسناڤی بن،ژبەركو یانەیێن وەكو شورتە، زەورا، جەوییە و ڕێزێن خوە ب هێزتر لێكرینە، ژبیر نەكەین یانەیێن دی ژی هەنە دبیت سوپرایزان تۆماربكەن.
سەرۆكێ‌ فدراسیۆنێ‌: پشتەڤانییا جەماوەری و یاریزانێن گەنج دكەین
د گۆتارا خوە دا یونس مەحموود سەرۆكێ‌ فدراسیۆنا فوتبۆلا ئیراقێ‌ گۆت: هەموو بەرهەڤی هاتینە كرن كو وەرزێ‌ ئەڤ سالە باشتر بیت و پێشكەڤتنەكا دی ب كەڤیتە ل سەر فوتبۆلا ئیراقێ‌ تایبەت لایێ كارگێری، ئاستێ‌ یاریزانی، بازاركرنێ‌ و بەلاڤكرنا تێگەهشتنا وەرزشی، ژبەركو پشتەڤان گیانێ‌ یاریگەهانە دگەل لایەنێن بەرپرس و حكومی مە چەندین خال داناینە بۆ هندێ‌ زێدەتر پشتەڤان ل یاریگەهان بەرهەڤبن.
هەروەسان ناڤهاتی گۆت: ژ كارێن گرنگ بۆ وەرزێ‌ نوو زێدەتر پووتەدان ب یاریزانێ‌ گەنج، ژبلی ڕێكخستنا خولان بۆ ژیێن جودا دێ‌ باشترین یاریزانێ‌ گەنج ژی هەبیت د بەرانبەر دا باشترین گۆلپارێز، باشترین یاریزان، گۆلكەرێ‌ خولێ‌ و باشترین ڕاهێنەر، ئەڤە هەموو بۆ هندێ‌ یە ڕێكێن پێشكەڤتنا خولێ‌ بیت.
هەلگرێن ناسناڤێ‌ خولێ‌ كینە؟
هەر ژ دەستپێكا خولا فوتبۆلا ئیراقێ‌ ئەوا ل سالا 1974ێ‌ بووی و هەتا وەرزێ‌ بۆری 11 یانەیان شیاینە ناسناڤێ‌ خولا ئیراقێ‌ چو ب ناڤێ‌ نایاب یان ژی ستێرێن ئیراقێ‌ ب دەستڤە ئیناینە و بڤی شێوەیی، زەورا 14 ناسناڤ كو پترترین جاران بوویە قارەمان، جەوییە(9) جاران، شورتە(8) جاران، تەلەبە(5) جاران، هەولێر(4) جاران، ئەلرەشید(3) جاران، دیسان هەر ئێك ژ یانەیێن دهۆك، مینا، سەلاحەدین، جەیش و نەفت ئەلوەست جارەكێ‌ یا ب دەستڤە ئینایی.
ل سەر ئاستێ‌ كۆپا ئیراقێ‌ ژی یانەیا زەورا پێشەنگە بۆ دەستڤە ئینانا ناسناڤان ئەوا هەر ژ سالا 1975ێ‌ دەستپێكری و بڤی شێوەیی، یانەیا زەورا (16) ناسناڤ، جەوییە(6) ناسناڤ، ئەو یانەیێن دو ناسناڤ برین ئەوژی تەلەبە، جەیش و ئەلرەشید، هەروەسان ئەو یانەیێن جارەكێ‌ ناسناڤ دەستڤە ئیناین، یانەیا دهۆك، شورتە، ئەلكەرخ و سیناعە.

ب فەرمی فدراسیۆنا باسكێت بۆلا ئیراقێ‌ ژڤانێ یاریێن فینالا خولا پیشەكاران یا شێوازێ‌ پلەی ئۆف دەستنیشان كرن پشتی بۆ ماوەیێ دو حەفتیان ژ ناكۆكیێن دناڤبەرا ئەندامێن فدراسیۆنێ‌ و نە ڕازیبوونا یانەیا زاخۆ ژ بڕیارا دەستپێكی، ئەوا بڕیارە هەڤڕكیێن وێ‌ سوبەهێ‌ دێ‌ دەستپێكەن ژ سەرجەمێ‌ پێنچ یارییان و بڤی شێوەیی.
یارییا ئێكێ‌: دیفاع ئەلجەوی- زاخۆ، سوبەهی ئێكشەمبی، هۆلا گرتییا یانەیا ئەرمەن ل بەغدا ، دەمژمێر حەفتی شەڤ.
یارییا دویێ: زاخۆ – دیفاع ئەلجەوی، 12-8- 2026، هۆلا یانەیا زاخۆ، دەمژمێر حەفتی شەڤ.
یارییا سێیێ‌: دیفاع ئەلجەوی- زاخۆ، 16-8- 2026، هۆلا یانەیا ئەرمەن ل بەغدا دەمژمێر حەفتی شەڤ.
یارییا چارێ‌: زاخۆ- دیفاع ئەلجەوی، 20-8- 2026، هۆلا یانەیا زاخۆ، دەمژمێر حەفتی شەڤ.
یارییا پێنجێ‌، دیفاع ئەلجەوی- زاحۆ، 26-8-2026، هۆلا یانەیا جەیش ل بەغدا، دەمژمێر حەفتی شەڤ.
لدۆر بەرهەڤیێن تیما زاخۆ فەرید ڕەعدی ستێرێ‌ تیمێ‌ بۆ ئەڤرۆ گۆت: پشتی كاروانەكێ‌ درێژ یێ هەڤڕكییان ب سەرفەرازی ئەم گەهشتینە فینالێ‌، ئەڤە ماوەیەك بوو ئەم چاڤەڕێ‌ ژڤانێ‌ یاریێ ژبەر ناكۆكیێن چەند ئەندامێن فدراسیۆنێ‌ بۆ دەستنیشانكرنا باژێرێ‌ بەغدا بۆ هەر پێنچ یاریێن فینالێ‌، لێ‌ پشتی مە خوە ڕازینەكری و گەف كرین بڕیار هاتە دان شێوازێ‌ خولێ‌ ب ئێكسانی بیت، ئانكو دویاری ل یاریگەها مە و دو یاری ل یاریگەها وان و هەكە گەهشتینە یارییا پێنجێ‌ دێ‌ ل یاریگەهەكا دی بیت، ژبەركو سیستەمێ‌ فینالا باسكێت بۆلێ‌ جودایە نەوەكو وەرزشێن دییە، هەر تیمەكا ژ سەرجەمێ‌ چار یاریێن دەستپێكی سێ سەركەڤتنان بنیت پێدڤی ب یارییا پێنجێ‌ ناكەت و دێ‌ بیتە قارەمان، لێ‌ هەكە دچاریێن دەستپێكێ‌ وەكهەڤبوون دو سەركەڤتنان دێ‌ یارییا پێنجێ‌ یا ئێكلاكەربیت.
ژلایەكێ‌ دووڤە فەرید ڕەعدی گۆت: وەرزێ‌ ئەڤ سالە دەلیڤەیەكا زێرین بەردەستێ‌ مەیە و ئەم یێن گەهشتینە فینالێ‌ پشتی زەحمەتەكا بەرچاڤ، بۆ یارییا ئەڤرۆ و یێن مایی بەرهەڤیێن باش هاتینە كرن و هەموو یاریزان دگەل پشتەڤانییا كارگێرییا یانەیێ و كادرێ‌ ڕاهێنانێ‌ ڕژدن ل سەر ئێك ئارمانج ئەو ژی سەركەڤتنن پێدڤی ب سێ‌ سەركەفتناینە د فینالێ‌ دا ژبۆ مسۆگەر كرنا ناسناڤێ دیرۆكی، دبیت ئەركێ‌ مە بەرانبەر تیما دیفاع ئەلجەوی ب سانەهی نەبیت ئەوا ل وەرزێ‌ بۆری ژی ناسناڤ دەستڤە ئینایی، لێ‌ هەتا دووماهی چركە دێ‌ شەڕی بۆ دەستڤە ئینانا خالان و سەركەڤتنان كەین.
تیما باسكێت بۆلا یانەیا زاخۆ پلێتا دەربازبوون بۆ فینالا خولا ئیراقێ‌ یا پیشەكاران ب دەستڤە ئینا پشتی شیایی د دیارییا دویێ ژ چارچووڤەیێ قووناغا چارگۆشەیا زێرین سەركەڤتنێ‌ ل سەر هەڤڕكا خوە نەفت میسان بینیت ب ئەنجامێ‌ 81 خالان بەرانبەر 51 خالان، د یارییا واندا ئەوا ل هۆلا گرتییا بنگەهێ‌ وەرزش و لاوێن زاخۆ هاتیە كرن.
هەژی گۆتنێ‌ یە بۆ جارا ئێكێ‌ یە د دیرۆكا خوە یانەیا زاخۆ ب گەهیتە فیالێ‌ پشتی شیایی د یاریێن خوە یێن چارگۆشەیا زێرین سەركەڤتنێ‌ ل سەر هەڤڕكا خوە نەفت میسان بینیت
بۆ زانین د دیرۆكا خولا باسكێت بۆلا ئیراقێ‌ یانەیا دهۆك پێنج جاران ناسناڤ ب دەستڤە ئینایە، پترترین یانە ناسناڤ دەستڤە ئینایی یانەیا كەرخ بوویە، هەروەسان هەر ئێك ژ یانەیێن نەفت حەفت جاران، ئەلرەشید پێنج جاران، دیفاع ئەلجەوی جار جاران، حللە و شورتە هەر ئێك سێ‌ جاران، جەیش و كارەبا هەر ئێك دو جاران و یانەیا جەوییە جارەكێ‌.