سەرۆك بارزانی پیرۆزباهییا رۆژا نیشتمانییا فرەنسا ل قۆنسلێ گشتیێ فرەنسا ل هەولێرێ كر.
بارەگەهێ بارزانی بەلاڤكر» سەرۆك بارزانی ل ئۆتێلا رۆتانا ل باژێرێ هەولێرێ پشكداری د رێوڕەسمێ هەلكەفتا رۆژا نیشتمانییا فرەنسا دا كر».
بارەگەهێ بارزانی ئاماژەكر ژی» د رێوڕەسمێدا كو ژ ئالیێ قۆنسلخانەیا گشتییا فرەنسا ل هەولێرێ هاتبوو رێكخستن، ب بەرهەڤبوونا هەژمارەكا بەرچاڤ ژ مێهڤانێن ناڤخوەیی و بیانی بڕێڤەچوو، سەرۆك بارزانی پیرۆزباهییا رۆژا نیشتمانییا فرەنسا ل قۆنسلێ گشتیێ فرەنسا ل هەولێرێ كر».

د 24 ساتێن بۆریدا سێ درۆن ل دەڤەرێن جودا جودا یێن هەرێما كوردستانێ كەفتینە خوار. سەرۆكاتییا هەرێما كوردستانێ داخوازا وەرگرتنا پێرابوونێن قانوونی یێن ب لەز ژ حوكمەتا فیدرالا ئیراقێ بۆ راگرتنا وان هێرشان دكەت.
دوهی سێشەمبی 15/7/2025، سەرۆكاتییا هەرێما كوردستانێ بەیاننامەیەك بەلاڤكر تێدا ئەو هێرشێن هاتینە كرن ل سەر ژێرخان و دەڤەرێن جودا جودا یێن هەرێما كوردستانێ، پرۆتەستۆكرن.
سەرۆكاتییا هەرێما كوردستانێ د بەیاننامەیا خوەدا دبێژیت» دوهی و ئەڤرۆ زەڤیێن پەترۆلی ل خوورمەلە و سەرسنكێ بوونە ئارمانج».
ب گۆڕەی بەیاننامەیا سەرۆكاتییا هەرێما كوردستانێ» پێدڤییە حوكمەتا فیدرالا ئیراقێ هەموو پێرابوونێن ب لەز و پێدڤی وەرگریت بۆ رێگرتنێ ل وان هێرشان و دیتنا هێرشبەران و سزادانا وان».
د بەیاننامەیێدا هۆشداری هاتیە دان» ئەو هێرشە ئارامی و سەروەرییا وەلاتی و وەبەرئێنانا ناڤخوەیی و بیانی د ئێخنە د مەترسیێدا».

دەقێ بەیاننامەیا سەرۆكاتییا هەرێما كوردستانێ:

ب توندی وان هێرشان پرۆتەستۆ دكەین كو ب درۆنان دهێنە كرن ل سەر ژێرخان و دەڤەرێن جودا جودا یێن هەرێما كوردستانێ و د وی چارچۆڤەیدا دوهی و ئەڤرۆ زەڤیێن پەترۆلی ل دەڤەرێن خوورمەلە و سەرسنكێ بوونە ئارمانج.
پێدڤییە حوكمەتا فیدرالا ئیراقێ هەموو پێرابوونێن ب لەز و پێدڤی وەربگریت بۆ رێگرتنێ ل وان هێرشان و دەستەسەركرنا هێرشبەران و سزادانا وان. ئەو هێرشە ئارامی و سەروەرییا وەلاتی و وەبەرئێنانا ناڤخوەیی و بیانی د ئێخنە د مەترسیێدا.
ژ ئالیێ خوەڤە وەزارەتا سامانێن سروشتی ل هەرێما كوردستانێ ج بەیاننامەیەكێدا بەلاڤكر» رۆژا سێشەمبی 15/7/2025، ب رێكا درۆنا مینڕێژكری هێرشەكا تیرۆرستی ل سەر زەڤییا پەترۆلییا سەرسنكێ ل ناحیا چەمانگی ل پارێزگەها دهۆكێ هاتە ئەنجامدان و هیچ زیانێن گیانێ ژ ئەنجامێ وێ هێرشێ نەبوون».
وەزارەتا سامانێن سروشتی بەلاڤكر ژی» ئەڤ هێرشە پشتی وێ هێرشا دوهی ئێڤاری دهێت كو ب رێكا دو درۆنێن مینڕێژكری هێرش ل سەر زەڤیا پەترۆلییا خوورمەلە ل پارێزگەها هەولێرێ هاتیە كرن».
وەزارەتا سامانێن سروشتی ڤان جۆرە هێرشان بۆ سەر ژێرخانەیا ئابۆرییا هەرێما كوردستانێ ب توندی پرۆتەستۆ و شەمزار دكەت.
ژ ئالییەكێ دیڤە، دژە تیرۆرا كوردستانێ بەلاڤكر، دو درۆنێن مینڕێژكری ل سنوورێ پارێزگەها هەولێرێ كەفتنە خوار.
دژە تیرۆرا كوردستانێ بەلاڤكر» ل ئێڤارییا دوشەمبی 14/7/2025 دو درۆنێن مینڕێژكری ل سات 20:20 و 20:25 ل زەڤییا پەترۆلییا خورمەلە ل پارێزگەها هەولێرێ كەفتنە خوار.
دژە تیرۆرا كوردستانێ دوپاتكر كو هیچ زیانێن گیانی ژ ئەنجامێ كەفتنا وان درۆنان نەبوون.

دیدار/ دلۆڤان ئاكرەیی

ئاری هەرسین، بەرپرسێ لقێ چار یێ پارتی دیموكراتی كوردستان ل سلێمانیێ ل دۆر رەوشا ئەڤرۆ ل ئیراقێ دروست بووی و چەوانییا سەرەدەرییا ئیراقێ ل گەل هەرێما كوردستانێ بۆ رۆژنامەیا (ئەڤرۆ) گوت: ئیراق ب هەمان ئایدۆلۆژییا سەردەمێ بەرێ یا رژێمێن بۆری یێن ئیراقێ رەفتارێ ل گەل هەرێما كوردستانێ دكەت ودڤێت سیاسەتمەدارێن كورد بكەتە خزمەتكار و فەرمانبەرێن عەرەبێن شوڤێنییان، بەلێ هەكە ئەو ب هیڤینە مە و گەلێ كوردستانێ بكەنە كرێگرتی و بەندە و ب گەهنە وێ حەزا خوە ئەو خەونە و سەردەمێ شوڤێنییان ب دووماهی هاتیە
ئاری هەرسین زێدەتر گوت» ب چو شێوەیەكی نە سەرۆكێ هەرێما كوردستانێ و نە سەرۆكێ حوكمەتا هەرێما كوردستانێ و جێگرێ سەرۆكێ حوكمەتێ و نە وەزیر و سەرۆك پەرلەمان و ئەندامێن پەرلەمانێ كوردستانێ رێكێ ب وێ چەندێ نادەن هەرێما كوردستانێ بكەڤیتە د بن باندورا بریارێن نە قانوونی و نە دەستوری یێن ئیراقێدا و فەرمانبەرێن هەرێما كوردستانێ ژی ببنە فەرمانبەرێن محەمەد شیاع سوودانی ویێن ل پاشەڕۆژێ بهێنە سەر دەستهەلاتی ل ئیراقێ».
بەرپرسێ لقێ چار یێ پارتی دیموكراتی كوردستان كارتێن فشارێ یێن هەرێما كوردستانێ بەرامبەر ب ئیراقێ دیاركرن كو خوەڤەكێشانە ژ حوكمەت و جڤاتا نوونەرێن ئیراقێ و بایكوتكرنا هەلبژارتنێن بهێن یێن ئیراقێیە كو ب بایكوتكرنا هەرێما كوردستانێ ، هەلبژارتنێن ئیراقێ ژ روویێ بابەتیبوون و قانوونیڤە چو گرنگییەك نامینیت».
سەبارەت ب رۆلێ ئۆپۆزسیۆنێ ل هەرێما كوردستانێ و چەوانییا رەفتاركرنا وان دگەل پرسێن د ناڤبەرا هەولێرێ و بەغدایێ دا، گوت» رەخنەگرتن و دانا پێشنیازێن ئاڤاكەر بۆ هەر پرسەكا د بەرژەوەندییا حوكمەتا هەرێما كوردستانێدا بیت ژ ئالیێ هەر تەخ وچین و ئالییەكیڤە ب كارەكێ باش دزانین و رەنگە مفا ژی لێ بهێتە وەرگرتن، بەلێ پشتەڤانیكرن و بوون ب پاڕێزەرێن بڕیار و رەفتارێن نە ڕەوا و نە قانوونی و نە دستووری یێن شوڤێنیێن ئیراقێ یێن وەك سەردەمێ بەعس ل هەمبەر هەرێما كوردستانێ رەفتاران دكەن، ئەڤ كەس و ئالییە د كەڤنە د چارچۆڤێ جاش و كرێگرتییان».

دهۆك ،لەزگین جوقی

میرێ ئێزدیان د سەرەدانەكێدا بۆ بریتانیا ب مەرەما ئەنجامدانا كۆمەكا دێداران دگەل بەرپرسێن بلند یێن وەلاتی بریتانیا ل سەر رەوشا ئێزدیان و مانا وان د كەمپاندا و دیارنەبوونا چارەنڤیسێ هزاران رەڤاندیێن ئێزدی.
میر حازم تەحسین بەگ، میرێ ئێزدیان راگەهاند» ژ بەر مانا ئێزدیان ل كەمپان و نەبوونا ئارامیێ ل دەڤەرێن ئێزدیان ب تایبەت شنگالێ كو مەترسییەكا راستەقینە ل سەر ئێزدیان هەیە وجڤاكێ ئێزدی ژ كارەساتەكا مرۆڤی د نالیت».
میرێ ئێزدیان كوت ژی» ئێزدیان پێدڤی ب پشتەڤانییا بریتانیا هەیە ب تایبەت بۆ ئاشكراكرنا چارەنڤیسێ ڕەڤاندیێن ئێزدی «.
میرێ ئێزدیان دگەل دەیڤد سمیس هنارتیێ حوكمەتا بریتانیا بۆ ئازادییا ئایینان و باوەڕان و جڤاتا گشتی یا بریتانیا باسێ چارەنڤیسێ رەڤاندیێن ئێزدیان كر و گوت»پتر ژ دو هزار و 500 رەڤاندیێن ئێزدی د بێ سەروشوونن، ئێزدیان پێدڤی ب پشتەڤانییا نێڤدەولەتی هەیە بۆ لێگەریان و رزگاركرنا رەڤاندییان».
میر حازم تەحسین بەگ، میرێ ئێزدیان ئەوژی دیاركر» جینۆسایدا ئێزدیان یا بەردەوامە و دەڤەرێن ئێزدیان پێدڤی ب پشتەڤانی و ئارامیێ و پەیداكرنا دەرفەتێن كاری هەیە بۆ گەنجان كو ئەڤە چەندین سال ب سەر جینۆسایدا ئێزدیان دەربازبوون وهەتا نوكە پترییا خەلكێ شنگالێ ل كەمپان دژین و نەشیاینە ڤەگەڕن».
رۆهنكر ژی» ژ بەر هێرشا تێرۆرستێن داعشێ هزارەها خەلكێ مە ل شنگالێ هاتنە كوشتن و رەڤاندن وهەتا نوكە چارەنڤیسێ پتر ژ دو هزار و 500 ڕەڤاندیێن ئێزدی دیار نینە وخەلكێ مە پێدڤی ب پشتەڤانییا نێڤدەولەتی هەیە بۆ لێگەریان و رزگاركرنا رەڤاندیێن ئێزدی».
خەلكێ شنگالێ ل رۆژا 3/8/2014ێ ژ بەر هێرشا تێرۆرستێن داعشێ ئاوارە بوون وقەستا هەرێما كوردستانێ كرن هەتا نوكە پتر ژ 300 هزار كەسێن ئێزدی ماینە ل كەمپان و ژ دەرڤەی كەمپان ل ونەشیاینە ڤەگەرنە شنگالێ.