سالار محەمەد دۆسكی:

1 – 4

پشتی ب سزایێ‌ 15 سالان زیانی هاتینە سزادان، و چەندین سالان ماینە ل زیندانا ئەبو غورێب هەر دو برا ب لێبورینەكێ‌ هاتنە دەركرن، بەلێ‌ هەتا نوكە ئەشكەنجە و نەخوشیێن زیندانێ‌ ل بیردانكا وان ماینە ساخ و ژ بیرنەكرینە.
هادی یوسف ئەحمەد و صدقی یوسف ئەحمەد خەلكێ‌ گوندێ‌ گویلكا یا سەر ب هوزا بەرواری نە هەردو زیندانیێن سیاسی بوون، و هەردو چوتێ‌ برا ب هەڤڕا وئێك دەم و ئێك جهـ هاتنە دەستەسەركرن، و ل ئێك جهـ هاتنە ئازادكرن، ل دور گرتنا خوە بۆ رۆژناما ئەڤرۆ گۆت: هێشتا ئەم زارۆك بووین بارەگایەكێ‌ پێشمەرگەی ل گوندێ‌ مەبوو و هاتن و چوونا پێشمەرگەی ل گوندییا بەردەوام بوو، و ئەڤە بۆ دەسپێكەك ئەم هزر ل كوردینیێ‌ و زولم و زورداری یا حوكمەتێن ئێك ل دوڤ ئێكێن ئیراقێ‌ بكەین و ئەم دناڤ كوردینیێ‌ دا مەزن بووین، و بڤی رەنگی ئەم هاتینە پەروەردەكرن، و بارەگایەكێ‌ پێشمەرگەی ل سەرێ‌ ئەرەدنا بوو.
هەمان زیندانیێ‌ سیاسی گۆت: بیرا من دهێت ژ ئەوان پێشمەرگەیێن گەلەك هاتن و چوون دناڤ گوندێ‌ مە دا دكر، ئێكێ‌ هروری بوو و ئێكی دگۆتنێ‌ محەمەد سەلیم یێ‌ مایی بوو.
هەمان زیندانیێ‌ سیاسی گۆت: دەمێ‌ ل سالا 1975 دەنگۆیێ‌ شكەستنا شۆڕەشا كوردی بەر بەلاڤ بووی ل دەڤەرێ‌ خەلكێ‌ مە بگشتی گەلەك عاجزبوو، و بیرا من دهێت مامێ‌ من پەزەك كرە خێر بتنێ‌ گۆتی ئەڤ ئاخفتنە درەوبیت، و دوڤدا خەلكی ب رێكا رادیۆ و هاتن و چوونا ناڤ باژێری زانین و بوو راست، و خەلكێ‌ مە گەلەك ژ خوە ترسیا و چەوا حوكمەتا و ب سەربەستی هاتن و چوونێ‌ بكەت، و خەلكی پێشتر زۆلم و تەعدا حوكمەتێ‌ دیت بوو، و لەوما گەلەك ترسیا و دگۆتن حوكمەت بوو مە ناهێلیت تایبەت ئەو كەسێن پێشمەرگاتی كرین، و ئەو مالێن هاریكاری و پشتەڤانیا شۆڕەشێ‌ كرین، وەك تازی و شینیەكێ‌ دناڤ هەمی مالان دا بەربەلاڤ بوو، و پتریا پێشمەرگەی چەكێ‌ خوە رادەستی حوكمەتێ‌ كرن، و بەرامبەر هندەك پاران و گەلەك ژ پێشمەرگەی ب خێزان ڤە بەرەڤ ئیرانێ‌ چوون، و بیرا من دهێت مامێ‌ من (بڕنوویەك) هەبوو و ڕادەستی حوكمەتێ‌ نەكر، بەلكو ل گوندی گەلەك ب نهێنی ڤەشارت، و دەمێ‌ دوڤدا كومێن چەكدار و لەشكرێ‌ ئیراقێ‌ هاتینە دەڤەرێ‌ و تایبەت گوندی ئەگەر چەكێ‌ وی دیتبا باوەربكە ئەو ب ساخی ژ دەستان قورتال نەدبوو، خانیێ‌ مە دو قات بوو و قاتێ‌ خارێ‌ جهێ‌ تەرشوكەوالی بوو، و قاتێ‌ سەری مالا مە بوو و مامێ‌ مە (بڕنویا) خوە كربوو دناڤ دیواری دا، ڕەنگە گەلەك پێشمەرگەیێن دی یان خەلكەكێ‌ دی ژی هەبیت چەكێ‌ خوە ڕادەست نەكربیت و ڤەشارت بیت، لێ‌ چونكە زۆلم و زورداری یا حوكمەتا بەعس گەلەك بوو و ترس بۆ خەلكی دروست كربوو، كەسەكێ‌ باوەری ب كەسەكێ‌ نە دهات ، ل سالا 1976 (ستار شێلازی) خارزایێ‌ مەبوو ل گەل (حەمدی بەگێ‌ شێلازی) و ( سەلیم شێلازی) ئەڤە هەرسێ‌ هاتنە گوندێ‌ مە و ئەڤە دگەریان و دووبارە دەست ب رێكخستنێن پارتی دیموكراتی كوردستان ب شێوەكێ‌ گەلەك نهێنی و رێك و پێك كرنە ڤە، ژنەكا بێبادی هەبوو و یا رێكخستی بوو ناڤ رێكخستێن پارتی دیموكراتی كوردستان دا و ئەوێ‌ بەلاڤۆك ل دهوكێ‌ دبرنە بەغدا، و ڕاستە ئەڤان رێكخستنا مرنا خوە دانا لێ‌ بیروباوەرێن وان بۆ دوزا مللەتێ‌ كورد گەلەك بهێز بوون، و هەر گوندەكی هندەك رێكخستی هەبوون و كارێ‌ وان گەهاندنا دەنگۆباسێن رژێمێ‌ و زۆلم و زورداری یا وان بوو بۆ پێشمەرگەی و هەمان دەم گەهاندنا دەنگۆباس و چالاكیێن پێشمەرگەی ژی بۆ ناڤ خەلكی دا، هیڤییەك بۆ خەلكی دروست بیتە ڤە، و بیرا من دهێتە هەر گوندەكی كەسەك دو هەبوون و ل گوندێ‌ مە مە ئەڤ كارە دكر، و ستار شێلازی وەك پێشتر مە ئاماژە پێكری خارزایێ‌ مە بوو، و گەلەك جاران دهاتە گوندی و دهاتە دەف مە و ئەوی رێنما و هەر تشتەكێ‌ هەبا دگەهاندە مە و گەلەك جاران ژی سەر پێ‌ پەیام و رێنما و هەر تشتەكێ‌ پێ‌ هاتبا دگەهاندە مە .
هەر دو برایێن ئێك ل رێكەفتی 23/12/1980 ژلایێ‌ رژێما بەعس ڤە هاتنە دەستەسەركرن، وی دەمی برایەك یێ‌ ب خێزان بوو و برایەك یێ‌ زگورد بوو، هەر دو برا بەحسێ‌ چیرۆكا گرتنا خوە دكەن و هەر دو ل ئێك دەم و ئێك رۆژ و ئێك جه هاتینە دەستەسەركرن و بێژن درەنگی شەڤ بوو و سێ‌ پێشمەرگە هاتبوونە مالا مە و دەنگویێ‌ هاتنا وان گەهشت بوو رژێمێ‌ لەوما ب پلان و بەرنامەكێ‌ رێكخستی رێژێمێ‌ ژ هەمی ئالیەكی ڤە وەك لەشەر بەرەف گوندێ‌ مە هات و دەمێ‌ نێزیك بووین و سە رەوین و گەلەك دەنكرن و دەنگویێ‌ هاتنا لەشكری مە بیهستی.