عەلی حاجی:

د داخویانیەکێ دا ئەندامەکێ دەستەیا کارگێریا یانەیا زاخۆ یا وەرزشی بۆ رۆژنامەیا ئەڤرۆ دیار کر وان هەمی ئامادەکاری بۆ یاریا کوپا ئیراقێ کرینە و چاڤێ وان ل سەرکەڤتنێ یە.
زێدەتر دلژار عەدنان گۆت : یارییا وان د قوناغا هەشتێ ژ کوپا ئیراقێ یا فوتبۆلێ بەرامبەر تیما نەورۆز ژ یاریێن گەلەک گرنگە ژبەرکو سەرکەڤتنا مە د وێ یاریێ دا دێ مە گەلەک نێزیکی ئارمانجا سەرەکی یا ئەڤ سالە دا کەت ژبەر هندێ پشتی ب دووماهی هاتنا خولا ستێرێن ئیراقێ هەر ئێکسەر مە دەست ب بەرهەڤیان کر، دەلیڤەیەکا گرنگ بۆ تیما مە هاتیە پێش ژبەرکو یاریا قووناغێن هەشتێ و چارێ دێ د یاریگەها مە دا نابن و نابیت ب چو ڕەنگان ئەم ڤێ دەلیڤەیا گرنگ ژ دەست بدەین، وەکو کارگێری ژی مە گەلەک کار ل سەر ڤی بابەتی کریە و گرنگە ئەم بشێن ئارمانجا خوە بجهبینن.
ناڤبری گۆت ژی: ژ روویێ ئەمنی ڤە ژی مە بەرهەڤییەکا باش کریە و ئەم دگەل پۆلیسێن زاخۆ و لایەنێن ئەمنی ژی کوومبووینە و نابیت چو تشتەکێ نە وەرزشی بهێتە ئەنجامدان ژبەرکو ئەڤ سالە باشترین و مەزنترین دەلیڤە بۆ مە هاتیە پێش د کوپا ئیراقێ دا.
بۆ زانین تیما یانەیا زاخۆ د وەرزێ ٢٠٢٤-٢٠٢٥ێ دا شیابوو ڕێزا سێیێ ل سەر ئاستێ خولا پلا ستێرێن ئیراقێ بهێت ب کۆمکرنا ٧١ خالان ژ ٢٠ سەرکەڤتن، ١١ وەکهەڤی و حەفت خوسارەتییان ئەوا یانەیا شورتە ب کۆمکرنا ٨٧ خالان ناسناڤێ خولێ ب دەستڤەئینایی.

پشتی ئەوێ‌ ئاستێ‌ وی یێ‌ مەزن دگەل یانەیا نەفت یا بەغدایی د وەرزێ‌ 2024-2025ێ‌ دا بەری ب دووماهی هاتنا یاریێن خولێ‌ شەش یانە ل سەر هێلین ژبۆ ڕزایكرنا ئەحمەد سەبری ستێرێ‌ یانەیا نەفت و خەلكێ‌َ باژێرێ‌ سێمێلێ‌ و ئەو دێ‌ چاڤەڕێ‌ بیت ژبۆ ژێگرتنا ئێك ژ ئۆفەرێن بوو هاتی.
ل دۆر ڤێ‌ یەكێ‌ د داخویانیەكێ‌ دا یاریزانێ‌ ناڤهاتی بۆ رۆژنامەیا ئەڤرۆ گۆت: پێخوەشحالم بۆ وەرزێ‌ ئەڤ سالە دگەل هەڤالێن خوە شیایینە ئاستەكێ‌ باش نیشان بدەین و بگەهینە ڕێزێن باش كو دناڤبەرا شەشێ‌ و حەفتێ‌ دا بهێن و ژ 32 گۆلێن یانەیا خوە 10 گۆلان تۆماربكەم و شەش ئەسیست هەبن، ئەڤە ژی نیشانا وی چەندێ‌ ددەت كو ئەم هەموو پێكڤە ب مۆرالەكا بلند یاریێ‌ دكەین و ئەو زەحمەتا د ڕاهێنانان دا دكەم شیاییمە تا ڕادەیەكی باش بەرهەمێ‌ وێ‌ هەبیت، دیسان پێخوەشحالم وەكو یاریزانێ‌ كوڕێ باژێرێ‌ سێمێلێ‌ ل بەغدا ببمە جهێ‌ باوەرییا ڕاهێنەرێ‌ خوە.
ل دور پاشەرۆژا وی دگەل یانەیا نەفتێ‌ ئەحمەد سەبری گۆت: هەرچەندە گرێبەستا من دگەل یانەیا نەفت دێ‌ ب دووماهی هیت لێ‌ هێشتا من چ بڕیار نە داینە دێ‌ مینم یان دێ‌ بەر ب یانەیەكا دی چم، بۆ هەر ڕوودانەكێ‌ دێ‌ ئاخڤتنا خوە هەبیت، هەرچەندە هەتا نوكە شەش یانە دگەل نەفتێ‌ دناڤا پەیوەندییان دا نە و حەزا ئیمزاكرنا گرێبەستا دگەل من هەنە، لێ‌ هەتا ب دووماهی هاتنا وەرزێ‌ ئەڤ سالە دێ‌ خوە ئێكلاكەم.

قەیس وەیس:

چاڤەڕێ‌ دهێتە كرن ئەڤرۆ ل دەمژمێر 5:15 ئێڤاری دوازدە یاری ژ هەڤڕكیێن گەڕا دویێ‌ یا قۆناغا كۆما ل یاریگەهێن جودا یێن هەرێمێ‌ ل سەر ئاستێ‌ خولا لاوێن كوردستانێ‌ یا فوتبۆلێ‌ بهێنە كرن، ئەوا 28 یانە پشكدارن و هاتینە بەلاڤكرن ل سەر شەش كۆمان.
سەركەڤتی دێ‌ بەرانبەر تیمێن خوسارەت كەن
ژ كۆما ئێكێ‌ بڕیارە ئەڤرۆ تیما یانەیا زاخۆ ل یاریگەها دەلال مێڤاندارییا یانەیا تەناهی بكەن، د یارییا بۆری دا لاوێن زاخۆ ب گۆلەكێ‌ بێ‌ بەرانبەر سەركەڤتن ل سەر سێمێلێ‌ ئینابوو، ژلایێ‌ خوەڤە تەناهی دگەل ئاكرێ‌ ب دو گۆلێن پاقژ تووشی خوسارەتیێ‌ بوو.
هەر ژ هەمان كۆم یارییا دویێ‌ یانەیا ئاكرێ‌ دێ‌ مێڤاندارییا یانەیا سێمێلێ‌ كەت، هەردو تیمان سەركەڤتن دڤێت ژبۆ بەردەوامییا هەڤڕكیێ بۆ پلێتەكا دەربازبوونێ‌.
ژ یاریێن دی یێن ئەڤرۆ
كۆما دویێ‌: خاك- سیرۆانی نوو، چەمچەمال- بابان، یانەیا بازیان چاڤەڕیێە.
كۆما سێیێ‌: شیروانە- شۆرجە، ڕزگاری- كفری، یانەیا دەربەندیخان چاڤەڕیێە.
كۆما چارێ‌: كۆیە- چوارقۆرنە، ڕانیە- قەلادزێ‌.
كۆما پێنجێ‌: ڕواندز- پ.هەولێر، زاكۆی جیهان- ئاڕاڕات، یانەیا پێشەسازی چاڤەڕێیە.
كۆما شەشێ‌: هندرین- هەولێر، برایەتی- سۆران، یانەیا شەقلاوە چاڤەڕێیە.
بۆ زانین نە پشكدارییا یانەیێن دهۆك، هەولێر و نەورۆز ژبەر پشكدارییا تیمێن وان د خولا لبن 18 سالی دا بوو، بتنێ‌ یانەیا زاخۆ ب تیما خوە پشكداربیت، ئەڤ خولە ل دووڤ ڕێنمایێن هاتینە بەلاڤكرن، فدراسیۆنا فوتبۆلا كوردستانێ‌ دیاركرییە كو یاریێن وان دێ‌ ب شێوەیێ‌ هاتن و چوون هێنە كرن، دو یانە ژ هەر كۆمەكێ‌ دێ‌ دەربازبنە قووناغا دووڤدا، پشتی ب دووماهی هاتنا هەڤڕكیێن كۆما دێ‌ د كۆمبوونەكا تایبەت دگەل یانەیێن سەركەڤتی دێ‌ شێواز و ژڤانێ‌ یاریێن قۆناغا دویێ‌ هێنە دیاركرن.

هێشتا كارڤەدانا هنگاڤتنا مەترسیدار یا جەمال مۆسیالا ستێرێ‌ ئەلمانی و یانەیا بایرن میۆنخ بەردەوامە، ئەوا د یارییا تیما وان بەرانبەر یانەیا پاریس سانجێرمان یا فرەنسی تووش هنگاڤتنێ‌ بووی دەمێ‌ لێگكەڤتنا وی و گۆلپارێزێ‌ پارێسێ‌ دۆنارۆما د ئەنجامدایی پێ وی یێ‌ چەپێ‌ ل جهێ‌ گۆزەكێ‌ ژ جهـ چوویە.
ل دووڤ ڕاپۆرتێن رۆژنامەڤانی هنگاڤتنا جەمال مۆسیالا دێ‌ ڤەكێشیت د ماوەیێ‌ چار هەتا پێنچ مەهان دا و ئەڤچەندە ژی دێ‌ كارتیكرنێ‌ ل سەر كاروانێ‌ وی كەت تایبەت د كۆپا سۆپرا ئەلمانییا ئەوا دێ‌ ل 16ێ‌ ئەیلۆنا بهێت و دەستپێكا وەرزێ‌ نوو یا خولا ئەلمانییا.
مۆسیالا یێ‌ 22 سالی ل وەرزێ‌ 2023-2024 تووشی شەش هنگاڤتنان بوویە ل وەرزێ‌ 2024-2025 تووشی سێ‌ هنگاڤتنان بوویە كو دهێتە هژمارتن ئێك ژ بێ‌ چەنسترین یاریزانێن فوتبۆلێ‌.

بەزۆكا كینی و قارەمانا ئۆلمپیادا بیاتریس چیبێت ڕیكۆردەكا نوو د بەریكانەیا 5000م دا تۆماركر پشتی شیایی بۆ ماوەیێ‌ 13 خولە، 58 چركە و شەش پشك ژ چركەكێ‌ بینت و ببیتە قارەمانا یاریێن گۆرەپانێ‌ د قارەمانییا خولا ئەلماس ئەوا دنوكە دا هەڤڕكیێن وێ‌ ل باژێرێ‌ ئۆریگۆن یا وەلاتێ‌ ئەمریكا دهێتە كرن.
بیاتریسا 25 سالی خودانا میدالییا زێری شیابوو ل ئۆلمپیادا پاریس بۆ بەریكانەیا 10 هزار میتران میدالییا زێری ب دەستڤە بینت و دهێتە هژمارتن ئێكەم بەزۆكا جیهانی ژ ئاستەنگا 14 خولەكا دەربازبكەت و ڕیكۆردا پێشتر یا ئەسیوبی گۆداف سیگای بشكێنیت ئەوا 14 خولەك و 21 پشك ژ چركەكێ‌ ل 2023ێ‌ بینت و شیا ڕیكۆردەكا نوو تۆماربكەت.

ستێرێ‌ سربی نۆڤاك دیۆكۆڤێچ شیا ب گەهیتە سەركەڤتنا 100ێ‌ یا پشكداریێن خوە د قارەمانیێن ویمبلدۆن یا یارییا تێنسا ئەردی دا ئێك ژ چار قارەمانیێن مەزن یێن گراند سلام و چاڤ ل ناسناڤێ‌ 100ێ‌ یە، پشتی ب سەركەڤتی ل سەر هەڤولاتیێ‌ خوە میومیر كیكمانۆڤێچ ب سێ‌ كۆمان بێ‌ بەرانبەر، د هەڤركیێن قۆناغا سێیێ‌ یا قارەمانیێ‌ دا.
ژلایەكێ‌ دووڤە دیۆكۆڤێچ بەرهەڤییان دكەت دڤێ‌ قارەمانیێ‌ دا ناسناڤێن خوە ب گەهینە یا 100ێ‌ كو بشێت دیرۆكەكا نوو تۆماربكەت هەرچەندە هەڤڕكێ‌ وی جێمی مۆنرێز خودانێ‌ 109 ناسناڤایە و رۆجێر فێدرێر 103ێ‌ ناسناڤانە، هەرچەندە دیۆكۆڤێچ خودانێن پترترین ناسناڤێن گراند ل سەر ئاستێ‌ جیهانێ‌ هەیە ب 24 ناسناڤان