محسن سالح ئامێدیێ پێشمەرگە و نڤیسەر و شاعر مالئاڤاهی كر، پشتی 94 سالێن خەبات و بەرخودان و قوربانیێ و دەردەسەریێ پێناڤی مافێن كورد و كوردستانێ ل 2ی تیرمەها 2025 خاترا خۆ یا دوماهیێ ژ مە خواست و چوو بەر دلوڤانیا خودێ.
بناڤێ بنەمالا خودێ ژێ رازی محسن سالح ئامێدی پڕ ژ دل سوپاسیا هەمی وان كەسان و لایەنان دكەین یێن پشكداری د رێورەسمێن ڤەشارتن و بەهیا خودی ژێ رازی دا كری، ب تایبەتی سوپاسیا جەنابێ سەرۆك بارزانی دكەین ل سەر وێ پەیوەندیا تێلەفونی یا ب مە كری و سەرخوشی ل مەكری، نوونەرێ خۆ بەرێز سیداد بارزانی و د گەل دا شێخ عبدولموهیمەن بارزانی هنارتین و پشكداری د رێورەسمێن ڤەشارتن و بەهیا مە داكرین.
سوپاسیا بەرێز نێچیرڤان بارزانی دكەین كو برۆسكەكا بەهیداریێ هنارتی و ل بەهیێ ئامادەبووی، سوپاسیا بەرێز مەسرور بارزانی دكەین كو ژ بلی برۆسكا بەهیداریێ پشكداری د بەهیێ دا كری.
هەروەسا سوپاسیا هێژا شێخ بابوی دكەین كو ل بەهیا مە ئاما دەبووی، سوپاسیا هەڤالێن بەرپرس و كارگێر و ئەندامێن مەكتەبا سیاسیا پارتی، مەكتەبێن رێكخستنێن دهۆكێ‌ و مووسلێ‌ و هەولێرێ‌ و سلێمانیێ و كەركووكێ، پارێزگارێ دهۆكێ، فەرماندەیێن لەشكری، لقێن پارتی و هەمی دام و دەزگەهێن پارتی و حكومی و لەشكری و جڤاكی دكەین، كو پشكداری د بەهیا مە دا كرین.
هەروەسا پڕ ژ دل سوپاسیا هەمی پشكداران دكەین، چ ئەوێن ل نەخۆشخانێ سەرەدانا خودێ ژێ رازی كرین، یان د رێورەسمێن ڤەشارتن و بەهیێ دا ئامادەبووین، چ ئەو بخۆ هات بن، یان پەیوەندیێن تێلەفونی كر بن یان نامە و برۆسكە هنارت بن، ڤێ پشكداریا وەیێن بەرێز و خوشتڤی خەمێن مە سڤككرن و هیڤیێن مە گەشتركرن، بەرپرسیاریا مە مەزنتر لێ كر، خویاكر كو رێبازا بابێ مە ل سەر چووی، رێبازەكا راست و دروستە، ئەم ژی سۆزێ ددەین بەردەوام بین ل سەر وێ رێبازێ، كو رێبازا بارزانیێ نەمرە.
ب ڤێ هەلكەفتنا غەمگین دەمێ ئەم سوپاسیا وەیێن بەرێز و بهاگران دكەین، ئەم داخوازا لێبۆرینێ ژ وە یێن بەرێز دخوازین ژ بەر ماندیبوونا وە ب ڤان رێورەسما ڤە، زەحمەتا رێیێن هاتنوچوونێ، ب مخابنی ڤە مە زانی ژ بەر قەرەبالغێ و ئاسێ بوونا رێكێ گەلەك نەچاربوون ب پیا سەركەڤنە جهێ بەهیێ ل كانیا سنجێ و هندەك ژی زڤرینە ڤە.
هیڤیا مە ئەوە، ماندی نە ببن و ساخلەمیا وە یا باش بیت و دوماهیا نەخوشیا هەمیان بیت، دوبارە داخوازا لێبورینێ ژ وەیێن بەرێز دخوازین.
سوپاسیەكا تایبەت بۆ مالا شێخ سلێمان بارزانی ل گەل هەمی گەنجێن دیێن مالا شێخی، كو پشكداربووین و ب هەمی رەنگا هاریكاری كرین.
سوپاسیا دامودەزگەهێن ئاسایشێ و پۆلیسان و پۆلیسێن هاتنوچوونێ دكەین، كو شیاین ب ماندی بوون ڤە ئارامیێ دابین بكەن و رێكخستنا هاتنوچوونێ بكەن.
سوپاسیا هەمی وان گەنج و لاوان دكەین یێن خزمەتا ڤان هەمی رێورەسما و بەهیدارا كرین.
گیانێ وی شاد بیت و جهێ وی بەحەشت
ئەم یێن خودێ ینە و دێ بۆ وی ڤەگەڕین
برایێ وە
بوتان محسن صالح ئامێدی
پێش بنەمالا خودێ ژێ رازی
محسن صالح ئامێدی ڤە
5ی تیرمەها 2025

رەمەزان زەكەریا:

پشتی 90 رۆژان ژ لێگەڕیانێ‌، تەرمێ‌ مامۆستا ئاڤێستا یوسف بەرزنجی د زێیێ‌ مەزن دا ل دەڤەرا بارزان نەهاتە دیتن و لێگەڕیان ب دوماهی هات.
مامۆستا ئاڤێستا یوسف بەرزنجی، ئاكنجیا پارێزگەها هەولێرێ بوو، ل رۆژا 5/4/2025 ل گەل خێزانا خوە ب گەشتەكێ‌ سەرەدانا دەڤەرا بارزان كربوو، ل تەنگا تۆر دكەڤیتە د رووبارێ زێیێ‌ مەزن دا و هەتا نوكە تەرمێ وێ نەهاتیە دیتن.
دەمێ سێ مەهانە ب بەردەوامی تیمێن نقوومڤانێن سۆران و بارزان و كوردستانێ ب گشتی ل تەرمێ ئاڤێستایێ دگەڕیان، بەلێ چو سەرەداڤ نەهاتینە دیتن، دوماهی رۆژ ب پشكداریا 100 كارمەندێن بەرگری شارستانی لێگەڕیان بەردەوام بوو، هەر نەهاتە دیتن، لەو لێگەڕیان ب دوماهی هات و نڤێژا جەنازەی هاتە كرن.
دەمێ بۆری سەرۆك مەسعود بارزانی سەردانا بابێ ئاڤێستایێ كربوو ل سەر رووبارێ زێیێ‌ مەزن.
یوسف بەرزنجی، بابێ مامۆستا ئاڤێستایێ‌ سوپاسیا سەرۆك بارزانی كر كو رۆژا ئێكێ هەتا نوكە ل سەر خەت بوویە سەرەدانا وان كریە ل سەر زێیێ‌ مەزن، هەروەسا خەلكێ دەڤەرا بارزان و هەموو خەلكێ كوردستانێ.

زاخۆ، دلۆڤان هالۆ:

لقێ هەشت یێ پارتی دیموكراتی كوردستان ل زاخۆ دیار كر كو ل دووڤ وی بەرنامەیێ ژ لایێ فەرماندە مەنسور بارزانی ڤە هاتیە دارشتن، ل بارەگایێ لقێ هەشت یێ پارتی ب ئامادەبوونا دكتۆرا نازدار عارف، كارگێر و بەرپرسا بەشێ پێگەهاندن و ڕەوشەنبیری و ڕاگەهاندنێ و دلبرین هالۆ، كارگێر و بەرپرسێ بەشێ دارایی پشككێشان بۆ 90 بووك و زاڤایێن تازە هەڤژینیێ پێك بینن هاتە كرن.
لقێ هەشت یێ پارتی ئاماژە ب وێ چەندێ ژی كر كو بڕیارە ب هەلكەفتا 16ی تەباخێ د ڕێوڕەسمەكێ تایبەت دا پرۆسەیا هەڤژینییا ب كۆم یا ئەڤان 90 كور و كچان بهێتە ئەنجامدان، كو 180 كوڕ و كچێن زاخۆ ژ ڤێ پڕۆسەیێ دێ مفادار بن.

رەمەزان زەكەریا:

حكومەتا هەرێما كوردستانێ ل سنۆرێ ناوچەداریا كەلەكچی موەلیدێن كارەبێ بۆ هەژمارەكا گوندان و یاریگەها مەزنا كەلەكچی دابینكرن.
هەڤال ئاكرەیی، رێڤەبەرێ ناوچەداریا كەلەكچی بۆ ئەڤرۆ گۆت: «حكومەتا هەرێما كوردستانێ ب سەرۆكاتیا مەسرور بارزانی گرنگیەكا باش دایە گوندان ژ روویێ ئاڤەدانكردن و دابینكرنا پێدڤیێن رۆژانە یێن ژیانێ».
گۆتژی: «ل سنۆرێ ناوچەداریا كەلەكچی موەلیدەیێن كارەبێ بۆ هەژمارەكا گوندان و یاریگەها مەزنا كەلەكچی هاتنە دابینكرن».

زنار تۆڤی:

ئەحمەد جەمیل، رێڤەبەرێ گشتیێ چاندنێ ل پارێزگەها دهۆكێ، بۆ رۆژناما ئەڤرۆ دیار كر، د مەها بۆری دا 64 هزار و 127 تەنێن بەرهەمێ خۆمالی یێ پارێزگەها دهۆكێ بۆ دەڤەرێن ناڤەراست و باشوورێ ئیراقێ هاتینە هنارتن.
ناڤهاتی گۆت: «پارێزگەها دهۆكێ ب بەرهەمێ ناڤخۆیی یا ناڤدارە و سالانە رێژەكا زۆر یا كەسكاتی و فێقی ژی لێ دهێتە بەرهەمئینان، ب مەرەما پەیداكرنا بازاری بۆ ڤی بەرهەمی، كابینا نەهێ یا حكومەتا هەرێما كوردستانێ ئاسانكاریێن باش كرینە».
گۆتژی: «د ئەڤ سالەدا هەر ژ 2/1/2025 هەتا 30/6/2025، پتر ژ 81 هزار تەنێن بەرهەمێ خۆمالی یێ پارێزگەها دهۆكێ بۆ ناڤەراست و باشوورێ ئیراقێ هاتینە هنارتن، كو پێك دهێن ژ: پتات، باجانسۆرك، خیار، فلفل، شۆتی، خۆخ، باجانرەشك، گوندۆر و مشمش».

سندس سالح سلێڤانەیی:

ب بڕیارەكا سەرۆكێ حوكمەتا هەرێما كوردستانێ داخواز هاتیەكرن، ژ نوكە وێڤە ل هەر پرۆژەیەكێ وەبەرهێنانێ ب رێژەیا 75% كرێكارێن خۆمالی لێ كاربكەن، د سالا بۆری دا دەلیڤەیا كاری بۆ پتر ژ (2000) كرێكارێن خۆمالی هاتە دابینكرن و ڤێ بڕیارێ ئەو دلخۆشكرینە و رێڤەرێ وەبەرهێنانێ ژی ل پارێزگەها دهۆكێ دیاردكەت كو د سالا 2024 دا موولەتا كاركرنێ ب 35 پرۆژەیێن وەبەرهێنانێ هاتیە دان و ب رێژەیا 95% كرێكارێن خۆمالی ل وان پرۆژەیان كاركریە.

ئەحمەد سادق كرێكارەكێ خەلكێ دهۆكێ یە دبێژیت: ئەو بڕیار گەلەكا د جهێ خوە دا بوو، چونكو د سالا بۆری دا كارێ مە یێ باش بوو، هەروەسا دەلیڤەیا كاری بۆ ب سەدان گەنجێن باژێری هاتە دیتن و ئەم دەستخۆشیێ ل سەرۆكێ حكومەتا هەرێما كوردستانێ دكەین بۆ وێ بڕیارا د جهێ خوە دا.
قادر حسێن، كرێكارەكێ دی یە دبێژیت: بەری وێ بڕیارێ هەتا رادەیەكی كارێ مە یێ كێم بوو، لێ پشتی ئەو بڕیار دەركەفتی ئەم وەكو كرێكارێن خۆمالی دلخۆشكرین و پتریا رۆژان ئەم دچووینە كاری و هیڤیا من ئەوە د ئەڤ سالەدا پتر بڕیار د بەرژەوەندا كرێكاران دا دەركەڤن.
خەلیل حسێن، سەرپەرشتێ پرۆژەیەكێ وەبەرهێنانێ یە دبێژیت: مە ب دروستی پێگیری ب وێ بڕیارێ كریە و پتر ژ 90% كرێكارێن ل گەل مە كاركرین خەلكێ دەڤەرێ بوون، ئانكو ئەز دشێم بێژم پتری (600) كرێكارێن خۆمالی ل سالا بۆری ل دەف مە كاركرینە و هیڤیا مە ئەوە د ئەڤ سالە زێدەتر لێ بهێن.
هەڤال ئاكرەیی رێڤەبەرێ گشتیێ‌ وەبەرهێنانێ ل پارێزگەها دهۆكێ دبێژیت: پشتی ل 22 ئیلۆنا سالا 2022 ئەو بڕیار ژلایێ سەرۆكێ حكومەتێ ڤە دەركەفتی، مە ب دروستی پێگیری پێكر و بۆ هەر پرۆژەیەكێ وەبەرهێنانێ مە كرە مەرج كو پێدڤیە ب رێژەیا 75% كرێكارێن خۆمالی لێ كاربكەن و ئەوێن دی بیانی بن، هەروەسا مەرج بوو كرێكارێن بیانی ژی كاری نیشا كرێكارێن مە یێن خۆمالی بدەن و د سالا بۆری دا مە مۆلەتا ئاڤاكرنێ دایە 35 پرۆژەیێن وەبەرهێنانێ و ئەز دشێم بێژم پتری دو هزارا كرێكاران ل وان پرۆژەیان كاركریە و ب رێژەیا 95% كرێكارێن خۆمالی بوون و ئەم وەكو حوكمەتا هەرێما كوردستانێ ڤێ چەندێ ب ئەركێ خوە دزانین كو دەلیڤەیا كاری بۆ كرێكارێن خوە پەیدابكەین، چونكو هەردەم كرێكارێن خۆمالی ب دلسوزانە كاردكەن.

ئامێدیێ‌، مەحمود نهێلی

ژ بەر خرابیا رێیا هاڤینگەها بیاوێ‌ ل سنورێ‌ ناوچەداریا دێرەلۆك، رێژا هاتنا گەشتیاران ل وێ‌ دەڤەرێ‌ كێم كریە، گەشتیار و خودانێن جهێن گەشتیاری ژی داخواز دكەن جادەیا وێ‌ دەڤەرێ‌ بهێتە چێكرن.

قاسم عوبەید ئێك ژ وان گەشتیاران بوویە یێن سەرەدانا ڤێ‌ هاڤینگەهێ‌ دكەت بۆ رۆژناما ئەڤرۆ دیار كر، ئەو بەردەوام سەرەدانا ڤێ‌ هاڤینگەهێ‌ دكەن، ئەڤ هاڤینگەهە ئێك ژ هاڤینگەهێن گەلەك خوەشە ل دەڤەرێ‌ و رۆژانە خەلكەكێ‌ زۆر قەست دكەنێ‌، لێ‌ مخابن رێیا ڤێ‌ هاڤینگەهێ‌ گەلەكا بێ‌ سەروبەرە و داخواز دكەت، ئەو رێ بهێتە چێكرن، بۆ وێ‌ یەكێ‌ گەشتیار ب ساناهی سەرەدانا وێ‌ دەڤەرێ‌ بكەن.
نەوزاد موحەمەد خودانێ‌ ئێك ژ جهێن گەشتیاریە ل بیاوێ‌ دیار كر، ئەوان مەزاختنەكا زۆر ل جهێ‌ خوە یێ‌ گەشتیاری كریە و ب رەنگەكێ‌ گەلەك جوان چێكریە، بۆ وێ‌ یەكێ‌ گەشتیار قەست بكەنێ‌ و گۆت: رۆژانە هژمارەكا زۆرا خەلكی قەستا جهێن مە دكەن، لێ‌ گازندا هەموویان ئەوە رێیا وان یا بێ‌ سەروبەر و خرابە.
عومەر هاریكی كەسەكی دی یێ‌ خودانێن جهێن گەشتیاری یە گۆت: ڤێرێ‌ دەڤەرەكا گرنگە بۆ جهێن گەشتیاری رۆژانە گەشتیارێن ناڤخوە و یێن عیراقێ‌ ژی سەرەدانا جهێ‌ مە دكەن و گۆت: ئەم شیاینە چەندین گەنجێن بێكار ل ڤان جهان بدەینە كاری و نێزیكی 100 جهێن گەشتیاری هەنە و یێن گەنجان جودانە و یێن خێزانی ژی جودانە و جهێن خوەش و دیمەنێن دلڤەكەر ل ڤێرێ‌ هەنە.
هەلبژێرێ‌ گوندێ‌ بیاوێ‌ بۆ رۆژناما ئەڤرۆ دیار كر، ئەوان گەلەك جاران بزاڤ كرینە و داخوازا خوە گەهاندیا ناوچەداریێ‌ و هەتا پارێزگەهێ‌ ژی، لێ‌ هەتا نوكە رازیبوون ل سەر نەهاتیە كرن و گۆت: زێدەباری هندێ‌ ئەڤە جهەكێ‌ گەشتیاری یە، لێ‌ ژیانا هژمارەكا زۆرا جوتیاران ژی ل سەر چەمێن ڤی گوندی نە و گۆت: ئەڤە گوندەكی ئاڤەدانە و یێ‌ خراب.
رێبەر سادق رێڤەبەرێ‌ ناحیا دێرەلۆك بۆ رۆژناما ئەڤرۆ دیاركر، ڤەدیتن بۆ رێیا گوندێ‌ بیاوێ‌ كو دكەڤیتە سنورێ‌ ناوچەداریا دێرەلۆكێ‌ كرن و هاتیە بلندكرن كو ببیتە پلان دگەل پرۆژێن سالانە ل دەڤەرێ‌ دهێنە چێكرن و گۆت: گوندێ‌ بیاوێ‌ جهەكێ‌ گەشتیاری یە و رۆژانە خەلكەكێ‌ زۆر ل سەر وێ‌ جادەیێ‌ هاتن و چونێ‌ دكەن، ژ بەر وێ‌ یەكێ‌ وان ب فەردیت جادا وی گوندی بهێتە چێكرن و ژ بەر وێ‌ یەكێ‌ كریە د پرۆژێن پلانكری دا و ئەو هیڤی دكەن ئەو پرۆژێن ل پارێزگەها دهۆكێ‌ رازیبوون ل سەر دهێتە كرن، ئێك ژ وان پرۆژێ‌ چێكرنا رێیا گوندێ‌ بیاوێ‌ بیت.