ئەندامەکێ پەرلەمانێ تورکیا دیار دکەت، هەکە تورکیا ئالۆزیان بۆ رۆژئاڤایێ کوردستانێ بکەت و ببیتە پشکەک ژ سیاسەتا ژناڤبرنا دەستکەفتیێن کوردان ل سووریێ، وی دەمی دێ قووناغا ئاشتیێ یا ل تورکیا ژی ژناڤ چیت، دڤێت تورکیا ڤێ یەکێ بزانیت.
عومەر فاروق گەرگەری ئۆغلۆ ئەندامێ پەرلەمانێ تورکیا سەر ب فراکسیۆنا دەم پارتی د داخویانیەکێ دا بۆ دەزگەهێن راگەهاندنا تورکیا سەبارەت ب قووناغا نها یا ل تورکیا و ئالۆزیێن ل سووریێ ئاخڤی و دیار کر، هەلوەستێ تورکیا ل هەمبەر رۆژئاڤایێ کوردستانێ دێ کاریگەریا خوە یا هەری مەزن ژی ل سەر قووناغا ئاشتیێ یا ل تورکیا هەبیت و گۆت: (بەرپرسێن تورکیا نها هەر رۆژ بەحسێ مافێن کوردان دکەن، هەکە تورکیا براستی ژی دڤێت پرسا کوردی ل تورکیا بهێتە چارەسەرکرن وی دەمی دڤێت تورکیا ژ بۆ کوردێن سووریێ ژی ئاریشەیان دروست نەکەت، نابیت تورکیا ب هندەک بەهانەیێن جودا جودا ئاریشەیان ژ بۆ کوردێن سووریێ دروست بکەت، دڤێت تورکیا نەبیتە پشکەک ژ سیاسەتا دەستهەلاتا نها یا شامێ و گەفان ل کوردان بکەت).
ناڤهاتی ئەو یەک ژی دیار کر، قووناغا ئاشتیێ ل تورکیا ژ بۆ هەر کەسەکێ یا گرنگە، بابەت تنێ کورد نینن، چونکی هەر کەس دزانیت ب سالانە ل تورکیا شەڕ و ئالۆزی هەنە و ژ بەر شەڕی ژی گەلەک زیان گەهشتینە تورکیا و هەکە دەستهەلاتا نها بڤێت پرسا کوردی چارەسەر بکەت بێگومان ئەو یەک دێ بیتە ئەگەرێ بهێزبوونا تورکیا، ژ بەر ڤێ یەکێ ژی وەکو دەم پارتی ئەم دبێژین دڤێت تورکیا پشتەڤانیێ ل مافێن گەلێ کورد ل سووریێ ژی بکەت و نابیت تورکیا ل گەل شامێ ل دژی کوردێن سووریێ کار بکەت و گۆت: (هەکە تورکیا رێگریێ ل مافێن گەلێ کورد ل سووریێ بکەت بێگومان ئەو یەک دێ کاریگەریا خوە ل سەر قووناغا ئاشتیێ ژی هەبیت، هەکە ئەردۆغانی بڤێت قووناغا ئاشتیێ بگەهیتە ئارمانجا خوە وی دەمی دڤێت تورکیا هاریکار بیت دا کورد ل سووریێ بگەهنە مافێن خوە، هەکە تشتەک وەسا نەهێتە کرن دێ رەوشا سووریی و رۆژئاڤایێ کوردستانێ ژی ئالۆز بیت و ئەو یەک دێ بیتە ئەگەرێ ژناڤچوونا قووناغا ئاشتیێ ل تورکیا).
ئەندامێ پەرلەمانێ تورکیا د پشکەکا دی یا داخویانیا خوە دا ئەو یەک ژی دیار کر، پێکئینانا کۆمسیۆنا ئاشتیێ ل پەرلەمانێ تورکیا پێنگاڤەک گەلەک باشە، لێ ئەو یەک ب تنێ تێر ناکەت گرنگە کۆمسیۆن ب ئەرکێ خوە یێ دیرۆکی رابیت، کورد چاڤەرێ نە ب کریاری هندەک تشت بهێنە کرن، بەری هەر تشتەکێ ژی دڤێت هەموو گرتیێن سیاسی بهێنە ئازاد کرن، د هەمان دەمی دا دڤێت سیاسەتا قەیوومان ل تورکیا ب دووماهی بهێت و هەبوونا گەلێ کورد ل تورکیا ب فەرمی بهێتە قەبوول کرن، ژ بەر ڤێ یەکێ ژی پێدڤیا تورکیا ب دستوورەک نوو هەیە و گۆت: (ب سالانە ئەردۆغان و بەرپرسێن دی یێن ئاکپارتیێ بەحسێ دستوورەک نوو بۆ تورکیا دکەن، وەکو دەم پارتی ئەم ژی پشتەڤانیێ ل دستوورەک نوو دکەین، لێ دڤێت دستوورێ نوو دستوورەک دیموکراتی بیت، دڤێت هەبوونا کوردان د دستوورێ نوو دا بهێتە قەبوول کرن، چونکی مە دڤێت ل تورکیا کا تورکان چ ماف هەیە کوردان ژی هەمان ماف هەبیت، هەکە بەحسێ براتیێ و پێکڤەژیانێ دکەن دڤێت ئەو یەک بهێتە کرن).
پەرلەمانتارێ دەم پارتی د بەردەوامیا ئاخڤتنا خوە دا داخواز ژ ئەردۆغانی و بەرپرسێن دی یێن دەولەتێ ژی کر، زمانێ خوە بگوهۆڕن، چونکی هێشتا ژی ب رەنگەکێ گەلەک توند هندەک داخویانی دهێنە دان، کورد ڤێ یەکێ قەبوول ناکەن، دڤێت دەزگەهێن راگەهاندنا تورکیا ب تایبەتیی ژی راگەهاندنا سەر ب دەستهەلاتێ دەست ژ بەلاڤکرنا راپۆرتێن توند سەبارەت ب کوردان بەردەن، چونکی دەمی بەحسێ ئاشتیێ دهێتە کرن دڤێت زەمینە بهێتە ئامادەکرن، ژ بەر ڤێ یەکێ ژی دڤێت دەستهەلاتا نها ل هەمبەر کوردان و مافێن وان زمانەک نەرم بکار بینیت و گۆت: (پێدڤیا تورکیا ب ئاشتیێ هەیە، ژ بۆ ئاشتیێ ژی دڤێت هەموو ئالی هاریکار بن، نها هندەک هێز ل تورکیا وەسا دبینن دڤێت هەر تشتەکێ تنێ دەم پارتی بکەت، ئەو یەک گەلەک شاشە، چونکی سەرکەفتنا قووناغا ئاشتیێ د بەرژەوەندیا هەموو تورکیا دایە، وی دەمی دڤێت هەموو هێزێن سیاسی ل تورکیا ژ بۆ سەرکەفتنا قووناغا ئاشتیێ هاریکار بن).
ئەندامێ پەرلەمانێ تورکیا د دووماهیا ئاخڤتنا خوە دا ئەو یەک ژی دیار کر، وەکو کورد وەکو دەم پارتی ئەو ب هەموو هێزا خوە ژ بۆ سەرکەفتنا قووناغا ئاشتیێ کار دکەن، ژناڤبرنا چەکان ژ ئالیێ گرۆپەکێ پەکەکێ ژی سەلماند پەکەکێ ژی ئاشتیێ دڤێت، ڤێجا نها دڤێت تورکیا ژی ب کریاری بۆ جیهانێ بسەلمینیت کو وێ ژی ئاشتیێ دڤێت، کورد چاڤەرێ نە دەولەتا تورکیا ژی ب کریاری کار بۆ چارەسەرکرنا پرسا کوردی بکەت.
نيشاندان