وەزیرێ دەرڤەیێ ئیراقێ راگەهاند: لڤینێن داعشێ ل سنۆرێ ئیراقێ – سووریێ جهێ دلتەنگیێیە.
د. فوئاد حسێن، وەزیرێ دەرڤەیێ ئیراقێ گۆت» ئیراق رێزێ ل خواستا خەلكێ سووریێ دگریت و پەیوەندی ژی ل گەل وەزیرێ دەرڤەیێ نوو یێ سووریێ یا كری».
ل دۆر لڤینێن داعشێ ل سنۆرێن ئیراقێ و سووریێ، وەزیرێ دەرڤەیێ ئیراقێ گۆت» جهێ دلتەنگیێیە» هەروەسا ئەو رێكخراوا تیرۆرستی ژی ب «گەفەكا مەترسیدار» هەژمارت.
د. فوئاد حسێنی ئاماژە ب وێ چەندێ ژی كر» پێشهاتێن ل سووریێ دێ كاریگەری ل سەر دەڤەرێ هەبیت».
ژ ئالییەكێ دیڤە، عەمید حەیدەر كەرخی، رێڤەبەرێ راگەهاندنێ و پەیوەندییان ل فەرماندەیێ زێرەڤانێن سنۆری یێن ئیراقی دیاركر كو هێزێن زێرەڤانێن سنۆری ل سەر سنۆرێ ئیراقێ و سووریێ یێن بەلاڤبووین و پێرابوونێن توند یێن وەرگرتین بۆ رێگریكرنێ ل هەر گەفەكێ یان هاتنا ناڤ ئاخا ئیراقێ.
رێڤەبەرێ راگەهاندنێ و پەیوەندییان ل فەرماندەیێ زێرەڤانێن سنۆری یێن ئیراقی دیاركر ژی كو سەرەرای دانانا كامیرەیێن چاڤدێریێ و ئاسێكرنا سنۆری و لێدانا خەندەكان، پڕۆسەیا دانانا دیوارێ كۆنكرێتی ژی یا بەردەوامە.
دیاركر ژی» ل مەها بۆری هێزێن زێرەڤانێن سنۆری دانانا دیوارێ كۆنكرێتی ب درێژییا 90 كیلۆمەتران ل سەر سنۆرێ سووریێ، ژ شنگالێ هەتا رەبیعە ب دووماهی ئینا و نوكە زێدەتر ژ 260 كیلۆمەتران دیوارێ كۆنكرێتی ل سەر سنۆرێ ئیراقێ و سووریێ یێ هاتیە دانان و پلان یا هەی درێژییا وی دیوارێ كۆنكرێتی بگەهیننە 400 كیلۆمەتران «.

هێمن هەورامی، ئەندامێ مەكتەبا سیاسی و بەرپرسێ مەكتەبا رێكخستنا پارتی دیموكراتی كوردستان د بەردەوامییا سەرەدانا خوە دا بۆ ئەمریكا سەبارەت روانگەه و پێگەهێ هەرێما كوردستانێ د پرسا گوهۆڕینێن سووریێ دا، ل گەل بەرپرسێن بلند یێن وەزارەتا دەرڤەیا ئەمریكا كۆمبوو و د وان كۆمبوونێدا بەرپرسێن بلند یێن وەزارەتا دەرڤەیا ئەمریكا ب گرنگی ڤە رۆلێ سەرۆك بارزانی د نێزیككرنا ئالیێن كوردیدا هەلسەنگاند و بەردەوامییا وان بزاڤان ب گرنگ هەژمارت.
هێمن هەورامی، ل وەزارەتا دەرڤەیا ئەمریكا ل گەل تۆم رۆسنبێرگەر، جێگرێ هاریكارێ وەزیرێ دەرڤەیێ ئەمریكا بۆ كاروبارێن سووریێ و دەڤەرێ و سكۆت بۆلتز، هنارتیێ تایبەتێ ئەمریكا بۆ كاروبارێن باكوورێ رۆژهەلاتا سووریێ كۆمبوو.
د وێ كۆمبوونێدا هێمن هەورامی، بزاڤ و پێنگاڤێن سەرۆك بارزانی بۆ ئاشتیێ و سەقامگیریێ و ئێكڕێزییا كوردان ل گوهۆڕینان، بۆ بەرپرسێن بلند یێن وەزارەتا دەرڤەیا ئەمریكا بەرچاڤكر.
د بەرامبەر دا، بەرپرسێن بلند یێن وەزارەتا دەرڤە یا ئەمریكا ب گرنگیڤە پێگەه و رۆلێ سەرۆك بارزانی هەلسەنگاند د نێزیككرنا ئالیێن كوردی دا و بەردەوامییا ڤان بزاڤان ب گەلەگ گرنگ هەژمارتن.
هەورامی دیاركر» ل سەر رەوشا قۆناغا ڤەگوهاستنێ ل دیمەشقێ و رەوشا ئاسایشا سووریێ و ئەنجامێن وێ بۆ ئاسایشا هەرێمایەتی و هەماهەنگییا زێدەتر ل گەل هەرێما كوردستانێ بۆ بەرژەوەندی و ئارامییا گشتییا دەڤەرێ، مە دانوستاندنێن هوور ل گەل بەرپرسێن بلند یێن وەزارەتا دەرڤە یا ئەمریكا هەبوون.

وەزیرەكێ حوكمەتا هەرێما كوردستانێ راگەهاند: رەوشا دەشتا نەینەوا یا تایبەتە و پێدڤییە هەر چ گرۆپێن میلیشییا و چەكدارێن نە قانوونی ژ وان دەڤەران خوە ڤەكێشن.
ئانۆ جەوهەر، وەزیرێ ڤەگۆهاستنێ و گەهاندنێ ل حوكمەتا هەرێما كوردستانێ د داخۆیانییەكا رۆژنامەڤانیدا گۆت» من ل دووماهی سەرەداندا بۆ ئەمریكا ل وەزارەتا دەرڤەیا ئەمریكا من باسێ رەوشا تایبەت یا پێكهاتەیان كر، هەرم ل ئیراقێ و هەم ل هەرێما كوردستانێ، یا گرنگ ئەوە داخوازیێن پێكهاتەیان بهێنە بجهئینان، كو ژ چەند خالەكان پێك دهێن، ژوان پێدڤییە میلیشییا ژ دەشتا نەینەوا بهێنە ڤەكێشان و دەلیڤە ب رۆلێن پێكهاتەیان بهێتە دان بۆ پاراستنا دەڤەرێن خوە و د رێزێن هێزێن ئەمنی یێن فەرمیدا بهێنە دامەزراندن».
گۆت ژی» راستڤەكرنا قانوونا هەلبژارتنێن جڤاتا نوونەران و حوكمەتێن خوەجهی ل سەرانسەری ئیراقێ، سەبارەت كۆتایا مەسیحییان و سنۆرداركرنا دەنگدانێ بۆ مەسیحییان، ئانكو تنێ بۆ مەسیحییان هەبیت، دەنگی بدەنە مەسیحی، ئەڤە ژی بۆ پشتڕاستبوونێیە ژ وێ چەندێ جارەكادی میلیشییا نەشێن كونترۆلێ نوونەرایەتیێن جڤاتا نوونەران بكەن و ئێدی دەست ب سەر ئیرادەیا سیاسی یا مەسیحییان نەگرن و بجهئینانا وان مادەیێن دستووری كو ل دستوورێ بەردەوامێ ئیراقێ هاتینە پەسەندكرن، ب تایبەتی مادەیا 140، بۆ پەیداكرنا چارەسەرییا دووماهیێ، كو گرەنتییا پاراستنا هەبوونا پێكهاتەیان بكەت ژ پێخەمەت مفاوەرگرتن ژ ئەزموونا پێكڤەژیانێ و لێبۆرینێ كو ل هەرێما كوردستانێ یا بەرقەرارە، ل دەڤەرێن دی یێن ئیراقێ».
ئانۆ جەوهەر هەروەسا رۆناهی ئێخستە سەر پرسا پاراستنا مافێن هەموو پێكهاتەیان ل كوردستانێ، كو ل بن سیبەرا سەركردایەتییا حەكیمانەیا سەرۆك مەسعود بارزانی، كوردستان یا بوویە مەنارەیا پێكڤەژیانێ و لێبۆرینێ و بهایێن دیموكراسی ل رۆژهەلاتا ناڤین.